൫. പകിണ്ണകനിദ്ദേസവണ്ണനാ

൫൩. ഇദാനി പകിണ്ണകം ദസ്സേതും ‘‘സങ്ഘിക’’ന്ത്യാദി ആരദ്ധം. തത്ഥ യോ ഭിക്ഖു ഇസ്സരോ ഹുത്വാ സങ്ഘികം ഗരുഭണ്ഡം അഞ്ഞസ്സ ദേതി, തസ്സ ഥുല്ലച്ചയം സിയാ. ഥേയ്യായ അഞ്ഞസ്സ ദേതി, യഥാവത്ഥു പാരാജികാദി സിയാ, ദുക്കടവത്ഥു ദുക്കടം, ഥുല്ലച്ചയവത്ഥു ഥുല്ലച്ചയം, പാരാജികവത്ഥു പാരാജികം സിയാതി വുത്തം ഹോതി.

൫൪. കുസാദിമയചീരാനീതി ഏത്ഥ ആദി-സദ്ദോ വാകഫലകം സങ്ഗണ്ഹാതി, കുസമയചീരം വാകമയചീരം ഫലകമയചീരന്തി. തത്ഥ കുസേ ഗന്ഥേത്വാ കതചീരം കുസമയചീരം. വാകമയചീരം നാമ താപസാനം വക്കലം. ഫലകമയചീരം നാമ ഫലകസണ്ഠാനാനി ഫലകാനി സിബ്ബേത്വാ കതചീരം. കമ്ബലം കേസവാലജന്തി കേസജം കമ്ബലം വാലജം കമ്ബലം, കേസകമ്ബലം വാലകമ്ബലന്തി അത്ഥോ. കേസേഹി തന്തേ വായിത്വാ കതകമ്ബലം കേസകമ്ബലം. ചമരിവാലേഹി വായിത്വാ കതകമ്ബലം വാലകമ്ബലം. സമയം വിനാതി നട്ഠചീവരകാലം ഠപേത്വാ. ധാരയതോ ധാരയന്തസ്സ. ലൂകപക്ഖാജിനക്ഖിപന്തി ഉലൂകപക്ഖിഅജിനക്ഖിപം. തത്ഥ ഉലൂകപക്ഖീതി ഉലൂകസകുണപക്ഖേഹി കതനിവാസനം. അജിനക്ഖിപന്തി സലോമം സഖുരം അജിനമിഗചമ്മം. നട്ഠചീവരകാലം ഠപേത്വാ ഇമേസു സത്തസു വത്ഥൂസു യം കിഞ്ചി ധാരയതോ ഥുല്ലച്ചയം സിയാതി അത്ഥോ.

൫൫. സത്ഥകേന കത്തബ്ബം കമ്മം സത്ഥകമ്മം, തസ്മിം സത്ഥകമ്മേ. വത്ഥിമ്ഹി കത്തബ്ബം കമ്മം വത്ഥികമ്മം, തസ്മിം വത്ഥികമ്മേ. സം നിമിത്തന്തി അത്തനോ അങ്ഗജാതം. തം ഛിന്ദതോ ഥുല്ലച്ചയം സിയാതി സമ്ബന്ധോ. മംസാദിഭോജനേതി ഏത്ഥ ആദി-സദ്ദോ അട്ഠിലോഹിതചമ്മലോമാനി സങ്ഗണ്ഹാതി. തസ്മാ മനുസ്സാനം മംസഅട്ഠിലോഹിതചമ്മലോമഭോജനപച്ചയാ ഥുല്ലച്ചയം സിയാതി അത്ഥോ.

൫൬. കദലേരകക്കദുസ്സാനീതി ഏത്ഥ കദലിഏരകഅക്കവാകേഹി കതാനി വത്ഥാനി ധാരയന്തസ്സ ദുക്കടം. പോത്ഥകന്തി മകചിവാകേഹി കതം പോത്ഥകദുസ്സം. സബ്ബപീതാദികന്തി ഏത്ഥ ആദി-സദ്ദേന സബ്ബലോഹിതകസബ്ബകണ്ഹകസബ്ബമഞ്ജേട്ഠികം സങ്ഗണ്ഹാതി. തത്ഥ സബ്ബമേവ നീലകം സബ്ബനീലകം. ഏവം സേസേസുപി. നീലം ഉമ്മാരപുപ്ഫവണ്ണം. പീതം കണികാരപുപ്ഫവണ്ണം. ലോഹിതം ജയസുമനപുപ്ഫവണ്ണം. കണ്ഹകം അദ്ദാരിട്ഠകവണ്ണം. മഞ്ജേട്ഠികം ലാഖാരസവണ്ണം. ഇമേസു അട്ഠസു വത്ഥൂസു യം കിഞ്ചി ധാരയന്തസ്സ ദുക്കടം സിയാതി അത്ഥോ.

൫൭-൮. ഹത്ഥിസ്സുരഗസോണാനന്തി ഹത്ഥിഅസ്സഉരഗസോണാനം മംസം അട്ഠിരുധിരചമ്മലോമാനി. സീഹബ്യഗ്ഘച്ഛദീപിനന്തി സീഹബ്യഗ്ഘഅച്ഛദീപീനം മംസാദീനി. തരച്ഛസ്സ ച മംസാദിം ഉദ്ദിസ്സകതമംസഞ്ച അനാപുച്ഛിതമംസഞ്ച ഭുഞ്ജതോ ദുക്കടം സിയാ. ദകതിത്ഥാദികന്തി ഏത്ഥ ആദി-സദ്ദോ വച്ചപസ്സാവകുടിയോ സങ്ഗണ്ഹാതി. തേന യാതാനുപുബ്ബം ആഗതപ്പടിപാടിം ഹിത്വാന വജ്ജേത്വാ നഹാനതിത്ഥഞ്ച വച്ചകുടിഞ്ച പസ്സാവകുടിഞ്ച വജേ വജേയ്യ ഗച്ഛേയ്യ, ദുക്കടം തസ്സ സിയാതി അത്ഥോ.

൫൯. സഹസാതി വേഗസാ വേഗേന. വുബ്ഭജിത്വാനാതി അന്തരവാസകം ദൂരതോവ ഉക്ഖിപിത്വാ, വ-കാരോ സന്ധിവസേനാഗതോ. പവിസേതി പവിസേയ്യ. വച്ചപസ്സാവകുടികന്തി വച്ചകുടികം പസ്സാവകുടികം. വിസേതി പവിസേയ്യ. യോ ഭിക്ഖു വച്ചപസ്സാവകുടികം സഹസാ പവിസേയ്യ വാ നിക്ഖമേയ്യ വാ, ഉബ്ഭജിത്വാ വാ പവിസേയ്യ വാ നിക്ഖമേയ്യ വാ, ഉക്കാസികം വജ്ജേത്വാ തം പവിസേയ്യ, തസ്സ ദുക്കടം സിയാതി യോജനാ.

൬൦. നിത്ഥുനന്തോ വച്ചം കരേയ്യ ദന്തകട്ഠഞ്ച ഖാദന്തോ, തസ്സ ദുക്കടം സിയാതി അത്ഥോ. വച്ചപസ്സാവദോണീനം ബഹി വച്ചാദികം വച്ചപസ്സാവം കരേയ്യ, തസ്സ ദുക്കടം സിയാ.

൬൧. ഖരേന ചാവലേഖേയ്യാതി ഫാലിതകട്ഠേന വാ ഫരുസേന വാ ഗണ്ഠികേന വാ പൂതികട്ഠേന വാ സുസിരേന വാ അവലേഖേയ്യാതി അത്ഥോ. കട്ഠന്തി അവലേഖനകട്ഠം. കൂപകേതി വച്ചകൂപകേ. ഊഹതഞ്ചാതി ഗൂഥമക്ഖിതഞ്ച. ന ധോവേയ്യാതി അത്തനാ വാ ന ധോവേയ്യ പരേന വാ ന ധോവാപേയ്യ. ഉക്ലാപഞ്ചാതി കചവരഞ്ച. ന സോധയേന സമ്മജ്ജേയ്യ.

൬൨. ചപുചപൂതി സദ്ദം കത്വാ ഉദകകിച്ചം കരോന്തസ്സ ആചമന്തസ്സ ദുക്കടം സിയാതി അത്ഥോ. അനജ്ഝിട്ഠോവാതി അനാണത്തോയേവ. ഥേരേനാതി സങ്ഘത്ഥേരേന. പാതിമോക്ഖന്തി പാതിമോക്ഖുദ്ദേസം. ഉദ്ദിസേ ഉദ്ദിസേയ്യ, ദുക്കടം സിയാ.

൬൩. അനാപുച്ഛായ പഞ്ഹസ്സ കഥനേ, അനാപുച്ഛായ പഞ്ഹസ്സ വിസ്സജ്ജനേ, അനാപുച്ഛായ സജ്ഝായകരണേ, അനാപുച്ഛായ പദീപജാലനേ, അനാപുച്ഛായ പദീപവിജ്ഝാപനേതി ഇമേസു ചതൂസു പച്ചയേസു തസ്സ ദുക്കടം സിയാ.

൬൪. അനാപുച്ഛാ വാതപാനകവാടാനി വിവരേയ്യ വാ ഥകേയ്യ വാ, തസ്സ ദുക്കടം സിയാതി സമ്ബന്ധോ. വന്ദനാദിന്തി ഏത്ഥ ആദി-സദ്ദോ വന്ദാപനം സങ്ഗണ്ഹാതി. യോ ഭിക്ഖു നഗ്ഗോ വന്ദനം കരേയ്യ, വന്ദാപനം കരേയ്യ, ഗമനം കരേയ്യ, ഭോജനം കരേയ്യ, പിവനം കരേയ്യ, ഖാദനം കരേയ്യ, ഗഹണം കരേയ്യ, ദാനം കരേയ്യ, തസ്സ സബ്ബത്ഥ ദുക്കടന്തി സമ്ബന്ധോ.

൬൫. തിപടിച്ഛന്നകം വിനാതി ‘‘അനുജാനാമി, ഭിക്ഖവേ, തിസ്സോ പടിച്ഛാദിയോ ജന്താഘരപ്പടിച്ഛാദിം ഉദകപ്പടിച്ഛാദിം വത്ഥപ്പടിച്ഛാദി’’ന്തി (ചൂളവ. ൨൬൧) ഏവം വുത്താ തിസ്സോ പടിച്ഛാദിയോ സമാഹടാതി ‘‘തിപടിച്ഛാദീ’’തി വുത്തം. തിപടിച്ഛന്നകം ഠപേത്വാ പരികമ്മം സയം കരേയ്യ, പരം കാരാപേയ്യ, തസ്സ ദുക്കടം സിയാതി അത്ഥോ. യോ ഭിക്ഖു നഹായം നഹായന്തോ കുട്ടേ വാ ഥമ്ഭേ വാ തരുമ്ഹി വാ കായം ഉപഘംസേയ്യ, തസ്സ ദുക്കടം സിയാ.

൬൬. യോ ഭിക്ഖു നഹായന്തോ കുരുവിന്ദകസുത്തേന കായം ഘംസേയ്യ, കായതോ കായേന അഞ്ഞമഞ്ഞം ഘംസേയ്യ, തസ്സ ദുക്കടം സിയാതി സമ്ബന്ധോ. യോ അഗിലാനോ സഉപാഹനോ ബഹാരാമേ ബഹിആരാമേ ചരേയ്യ, തസ്സ ദുക്കടം സിയാതി സമ്ബന്ധോ.

൬൭. സബ്ബനീലാദികമ്പി ചാതി ഏത്ഥ ആദി-സദ്ദോ ലോഹിതോദാതപീതകണ്ഹമഞ്ജേട്ഠമഹാരങ്ഗമഹാനാമരങ്ഗരത്താദയോ ഉപാഹനായോ സങ്ഗണ്ഹാതി. യോ ഭിക്ഖു സബ്ബനീലസബ്ബലോഹിതാദികം ഉപാഹനം ധാരേതി, തസ്സ ദുക്കടം സിയാതി സമ്ബന്ധോ. യോ ഭിക്ഖു രത്തോ രത്തചിത്തോ തദഹുജാതായപി ഇത്ഥിയാ നിമിത്തം പസ്സേയ്യ, തസ്സ ദുക്കടം സിയാ. യോ ഭിക്ഖു ഭിക്ഖദായിയാ ഭിക്ഖദായികായ ഇത്ഥിയാ മുഖം പസ്സേയ്യ, തസ്സ ദുക്കടം സിയാ.

൬൮-൯. യോ ഭിക്ഖു ഉജ്ഝാനസഞ്ഞീ ഹുത്വാ അഞ്ഞസ്സ ഭിക്ഖുനോ പത്തം വാ പസ്സേയ്യ, തസ്സ ദുക്കടം സിയാ. ആദാസാദിമ്ഹി ഉദകപത്തേ അത്തനോ മുഖം പസ്സേയ്യ, തസ്സ ദുക്കടം സിയാ. ഉച്ചാസനമഹാസനേ നിസജ്ജാദിം നിസീദനസയനാദിം കരോന്തസ്സ ഭിക്ഖുനോ ദുക്കടം സിയാ. ഉക്ഖിത്താനുപസമ്പന്നനാനാസംവാസകാദീനം വന്ദനേപി ദുക്കടം സിയാതി സമ്ബന്ധോ. തത്ഥ ഉക്ഖിത്തോതി ആപത്തിയാ അദസ്സനേ ഉക്ഖിത്തകോ, ആപത്തിയാ അപ്പടികമ്മേ ഉക്ഖിത്തകോ, പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോതി തിവിധോപി ഇധാധിപ്പേതോ. അനുപസമ്പന്നോതി ഇമിനാ ഭിക്ഖുനിസാമണേരസാമണേരിസിക്ഖമാനപണ്ഡകഇത്ഥിസിക്ഖാപച്ചക്ഖാതകാ ഗഹിതാ. നാനാസംവാസകാതി ലദ്ധിനാനാസംവാസകാ ഗഹിതാ. ആദി-സദ്ദേന ഛിന്നമൂലകാ ഗഹിതാ.

൭൦-൭൧. യോ ദീഘാസനേ പണ്ഡകിത്ഥീഹി പണ്ഡകേന വാ ഇത്ഥിയാ വാ ഉഭതോബ്യഞ്ജനേന വാ ഏകതോ നിസീദേയ്യ, തസ്സ ദുക്കടം സിയാ. അദീഘേ ആസനേതി രസ്സേ ആസനേ. യോ ഭിക്ഖു രസ്സാസനേ മഞ്ചേ വാ പീഠേ വാ അസമാനാസനികേന ഏകതോ സയേയ്യ, തസ്സ ദുക്കടം സിയാതി അത്ഥോ. ഫലപുപ്ഫാദികന്തി ഏത്ഥ ആദി-സദ്ദേന വേളുചുണ്ണദന്തകട്ഠമത്തികാദയോ സങ്ഗഹിതാ. കുലസങ്ഗഹത്ഥായ ഫലപുപ്ഫാദികം ദദതോ ദുക്കടം സിയാതി സമ്ബന്ധോ.

൭൨-൩. യോ ഭിക്ഖു ഗന്ഥിമാദിം സയം കരേയ്യ, പരം കാരാപേയ്യ, തസ്സ ദുക്കടം സിയാ. യോ ഭിക്ഖു ജിനേന വാരിതപച്ചയേ പരിഭുഞ്ജേയ്യ, തസ്സ ദുക്കടം സിയാ. അബ്യത്തോ ബാലോ യോ ഭിക്ഖു ആചരിയുപജ്ഝായേ അനിസ്സായ നിസ്സയം അഗ്ഗഹേത്വാ വസേയ്യ, തസ്സ ദുക്കടം സിയാ. യോ ഭിക്ഖു അനുഞ്ഞാതേഹി മാതാപിതുആദീഹി പുഗ്ഗലേഹി അഞ്ഞസ്സ പുഗ്ഗലസ്സ ഭേസജ്ജം കരേയ്യ വാ വദേയ്യ വാ, തസ്സ ദുക്കടം സിയാ. സാപത്തികോ യോ ഭിക്ഖു ഉപോസഥപ്പവാരണം കരേയ്യ, തസ്സ ദുക്കടം സിയാതി സമ്ബന്ധോ. തത്ഥ ജിനേന ഭഗവതാ വാരിതാ ജിനവാരിതാ, ജിനവാരിതാ ച തേ പച്ചയാ ചേതി ജിനവാരിതപച്ചയാ, തേ ജിനവാരിതപച്ചയേ. ദ്വേമാതികാഅപ്പഗുണതായ അബ്യത്തോ.

൭൪. യോ ഭിക്ഖു ആഭോഗം വാ നിയോഗം വാ വജ്ജേത്വാ ദ്വാരബന്ധാദികേ ഠാനേ പരിവത്തകവാടകം അപിധായ ദിവാ സയേയ്യ, തസ്സ ദുക്കടം സിയാതി സമ്ബന്ധോ. ദ്വാരബന്ധാദികേതി യേന കേനചി പരിക്ഖിത്തേ അബ്ഭോകാസേപി രുക്ഖമൂലേപി അന്തമസോ ഇമിനാ ലക്ഖണേന യുത്തആകാസങ്ഗണേപി. അപിധായാതി അപിദഹിത്വാ. വിനാഭോഗന്തി ‘‘ഏസ ദ്വാരം ജഗ്ഗിസ്സതീ’’തി ആഭോഗം ഠപേത്വാതി അത്ഥോ. നിയോഗന്തി അവസട്ഠാനം, അത്തനോ അവസം ബഹുസാധാരണട്ഠാനം ഠപേത്വാ. ‘‘സവസോ’’തി വാ പാഠോ, സവസോ ഹുത്വാതി അത്ഥോ. ദിവാതി ദിവാകാലേ.

൭൫. ധഞ്ഞന്തി സാലി വീഹി യവോ ഗോധുമോ കങ്ഗു വരകോ കുദ്രൂസകോതി സത്തവിധം ധഞ്ഞം. ഇത്ഥിരൂപന്തി ദാരുലോഹമയാദിഇത്ഥിരൂപം. രതനന്തി മുത്താദിദസവിധം രതനം. ആവുധന്തി സത്തിതോമരാദിസബ്ബാവുധഭണ്ഡം. ഇത്ഥിപസാധനന്തി ഇത്ഥിയാ സീസാദിഅലങ്കാരം. തൂരിയഭണ്ഡന്തി ധമനസങ്ഖാദിസബ്ബം തൂരിയഭണ്ഡം. ഫലരുക്ഖേതി ഫലിതരുക്ഖേ. പുബ്ബണ്ണാദികന്തി മുഗ്ഗമാസാദികം. ആദി-സദ്ദേന വാകുരകുമിനാദയോ ഗഹിതാ. ഏതേസു യം കിഞ്ചി ആമസേയ്യ, തസ്സ ദുക്കടം സിയാതി അത്ഥോ.

൭൬. സസിത്ഥോദകതേലേഹീതി യോ പന മധുസിത്ഥകതേലേന വാ ഉദകമിസ്സകതേലേന വാ യേന കേനചി ചിക്ഖല്ലേന വാ. ഫണഹത്ഥഫണേഹി വാതി ദന്തമയാദിഫണേന വാ ഫണകിച്ചസാധകേഹി ഹത്ഥങ്ഗുലീഹി വാ കോച്ഛേന വാ കേസമോസണ്ഠനേ ദുക്കടം സിയാതി അത്ഥോ. ഏകസ്മിം ഭാജനേ ഭോജനനിമിത്തേ ദുക്കടം സിയാതി അത്ഥോ.

൭൭. ദ്വേ ഭിക്ഖൂ ഏകത്ഥരണാ സയേയ്യൂം, ദ്വേ ഭിക്ഖൂ ഏകപാവുരണാ സയേയ്യും, ദ്വേ ഭിക്ഖൂ ഏകമഞ്ചകേ സയേയ്യും, തേസം ദുക്കടാനി ഹോന്തീതി സമ്ബന്ധോ. പമാണതോ അധികം വാ ഊനം വാ ദന്തകട്ഠം ഖാദേയ്യ, തസ്സ ദുക്കടം സിയാതി യോജനാ. തത്ഥ അധികന്തി അട്ഠങ്ഗുലതോ അധികം. ഊനന്തി ചതുരങ്ഗുലതോ ഊനം.

൭൮. യോ ഭിക്ഖു നച്ചഞ്ച ഗീതഞ്ച വാദിതഞ്ച യോജേതി വാ യോജാപേതി വാ, തസ്സ ദുക്കടം സിയാ. തേസം നച്ചാനം ദസ്സനം, തേസം ഗീതാനം സവനം, തേസം വാദിതാനം സവനഞ്ച കരോന്തസ്സ ദുക്കടം സിയാതി അത്ഥോ.

൭൯. വീഹാദിരോപിമേതി വീഹിആദീനം രുഹനട്ഠാനേ. ബഹിപാകാരകുട്ടകേതി പാകാരകുട്ടാനം ബഹി. വച്ചാദിഛഡ്ഡനാദിമ്ഹീതി വച്ചപസ്സാവസങ്കാരചലകാദീനം ഛഡ്ഡനവിസ്സജ്ജനപച്ചയാ ദുക്കടം സിയാതി അത്ഥോ. ദീഘകേസാദിധാരണേതി ദീഘകേസധാരണേ ദീഘനഖധാരണേ ദുക്കടം സിയാതി അത്ഥോ.

൮൦. നഖമട്ഠകരണാദിമ്ഹീതി ഏത്ഥ ആദി-സദ്ദേന രജനകരണം ഗഹിതം. സമ്ബാധേ ലോമഹാരണേതി സമ്ബാധേ ഉപകച്ഛകമുത്തകരണട്ഠാനേ ലോമുദ്ധരണേ. സഉപാഹനോ ഭിക്ഖു പരികമ്മകതം ഭൂമിം അക്കമേയ്യാതി സമ്ബന്ധോ.

൮൧. അധോതഅല്ലപാദേഹീതി യോ ഭിക്ഖു അധോതപാദേഹി വാ അല്ലപാദേഹി വാ സങ്ഘികം മഞ്ചം വാ പീഠം വാ അക്കമേയ്യ, പരികമ്മകതം ഭിത്തിം വാ കായതോ ആമസന്തസ്സ ദുക്കടം സിയാതി അത്ഥോ.

൮൨-൩. സങ്ഘാടിയാപി പല്ലത്ഥേതി അധിട്ഠിതചീവരേന വിഹാരേ വാ അന്തരഘരേ വാ പല്ലത്ഥികം കരേയ്യ, തസ്സ ദുക്കടം. ദുപ്പരിഭുഞ്ജേയ്യ ചീവരന്തി തിണ്ണം ചീവരാനം അഞ്ഞതരം ചീവരം ദുപ്പരിഭോഗേന പരിഭുഞ്ജേയ്യ. അകായബന്ധനോതി കായബന്ധനവിരഹിതോ ഭിക്ഖു ഗാമം വജേയ്യ ഗച്ഛേയ്യ. യോ ഭിക്ഖു വച്ചകം ഉച്ചാരം കത്വാന ഉദകേ സന്തേ നാചമേയ്യ ഉദകസുദ്ധിം ന കരേയ്യ, തസ്സ ദുക്കടം സിയാതി അത്ഥോ. സമാദേയ്യ അകപ്പിയേതി ഭിക്ഖും വാ സാമണേരാദികേ സേസസഹധമ്മികേ വാ അകപ്പിയേ നിയോജേയ്യ, തസ്സ ദുക്കടം സിയാതി അത്ഥോ. സഭാഗാപത്തിയാ ദേസനാരോചനപച്ചയാ ദുക്കടം സിയാതി അത്ഥോ. സഭാഗാതി ഏത്ഥ വത്ഥുസഭാഗതാവ ഇധാധിപ്പേതാ, ന ആപത്തിസഭാഗതാ.

൮൪. ന വസേ വസ്സന്തി യോ ഭിക്ഖു വസ്സം ന വസേയ്യ ന ഉപഗച്ഛേയ്യ, തസ്സ ദുക്കടം സിയാ. വിസംവാദേ സുദ്ധചിത്തേതി ഏത്ഥ സമ്പദാനത്ഥേ ഭുമ്മവചനം, പടിസ്സവം വിസംവാദേന്തസ്സ സുദ്ധചിത്തസ്സ ദുക്കടം സിയാതി അത്ഥോ. വസ്സം വസിത്വാ അനനുഞ്ഞാതകിച്ചതോ അനനുഞ്ഞാതകിച്ചേന ഭിക്ഖുനോ ഗമനേ ദുക്കടം സിയാതി യോജനാ.

൮൫. ആപദം വജ്ജേത്വാ തരുസ്സ ഉദ്ധം പോരിസമ്ഹാ അഭിരുഹണേ ദുക്കടം സിയാതി സമ്ബന്ധോ. ആപദന്തി അന്തരായം. തരുസ്സാതി രുക്ഖസ്സ. പോരിസമ്ഹാതി ഏകപോരിസപ്പമാണാ മജ്ഝിമസ്സ പുരിസസ്സ പഞ്ചഹത്ഥാ. അപരിസ്സാവനോ യോ ഭിക്ഖു അദ്ധാനം ഗച്ഛേയ്യ, യോ ച ഭിക്ഖു തം പരിസ്സാവനം യാചതോ ന ദദേയ്യ, തസ്സ ദുക്കടം സിയാതി യോജനാ. അദ്ധാനന്തി അദ്ധയോജനമേവ അന്തിമമദ്ധാനം.

൮൬. അത്തനോ ഘാതനേ ദുക്കടം സിയാതി സമ്ബന്ധോ. യോ ഭിക്ഖു ഇത്ഥിരൂപാദിരൂപം കരേയ്യ വാ കാരാപേയ്യ വാ, തസ്സ ദുക്കടം സിയാ. മാലാദികം വിചിത്തം ഠപേത്വാ ജാതകാദിവത്ഥും സയം കരേയ്യ, ദുക്കടം സിയാതി സമ്ബന്ധോ.

൮൭. ഭുഞ്ജന്തമുട്ഠപേതി യോ ഭിക്ഖു ഭുഞ്ജന്തം ഉട്ഠാപേയ്യ, തസ്സ ദുക്കടം സിയാ. ഭത്തസാലാദീസു വുഡ്ഢാനം ഓകാസം അദത്വാ നിസീദതോ ദുക്കടം സിയാതി യോജനാ.

൮൮. യാനാനീതി വയ്ഹം രഥോ സകടം സന്ദമാനികാദീനി. കല്ലകോതി അഗിലാനോ. അഗിലാനോ യോ ഭിക്ഖു യാനാനി അഭിരുഹേയ്യ, തസ്സ ദുക്കടം സിയാതി അത്ഥോ. വദേ ദവന്തി കേളിം വദേയ്യ, രതനത്തയം ആരബ്ഭ കേളിം വദേയ്യ, തസ്സ ദുക്കടം സിയാതി അത്ഥോ. അഞ്ഞപരിസായ ഉപലാലനേ ദുക്കടം ഹോതി.

൮൯. കായാദിന്തി ഏത്ഥ ആദി-സദ്ദോ ഊരുനിമിത്തം സങ്ഗണ്ഹാതി. കായം വാ ഊരും വാ നിമിത്തം വാ വിവരിത്വാ ഭിക്ഖുനീനം ന ദസ്സയേ ന ദസ്സേയ്യാതി അത്ഥോ. ലോകായതം തിരച്ഛാനാദിവിജ്ജം ന ച സയം വാചേയ്യ, പരഞ്ച ന വാചാപേയ്യ. പലിതം ഗണ്ഹേയ്യ വാ ഗണ്ഹാപേയ്യ വാ, തസ്സ ദുക്കടം സിയാതി യോജനാ.

൯൦-൯൨. യത്ഥ കത്ഥചി പേളായം പക്ഖിപിത്വാ ഭത്തം ഭുഞ്ജന്തസ്സ ദുക്കടം സിയാതി സമ്ബന്ധോ. പത്തഹത്ഥകോ യോ ഭിക്ഖു വാതപാനം വാ കവാടം വാ പണാമേ പണാമേയ്യ, സോദകം പത്തം ഉണ്ഹേയ്യ ഉണ്ഹേ ഓതാപേയ്യ വാ പടിസാമേയ്യ വാ, വോദകം പത്തം അതിഉണ്ഹേയ്യ അതിഠപേയ്യ, തസ്സ ദുക്കടം സിയാതി അത്ഥോ. യോ ഭിക്ഖു പത്തം ഭൂമിയം വാ അങ്കേ വാ മഞ്ചേ വാ പീഠേ വാ മിഡ്ഢന്തേ വാ പരിഭണ്ഡന്തേ വാ പാദേ വാ ഛത്തേ വാ ഠപേയ്യ, തസ്സ ദുക്കടം സിയാതി സമ്ബന്ധോ. ഭൂമിയന്തി യേന കേനചി അനത്ഥതായ പംസുസക്ഖരമിസ്സായ. അങ്കേതി ദ്വിന്നം ഊരൂനം മജ്ഝേ. മിഡ്ഢന്തേതി മിഡ്ഢപരിയന്തേ. പരിഭണ്ഡന്തേതി ബാഹിരപസ്സേ കതായ തനുകമിഡ്ഢിയാ അന്തേ. യോ ഭിക്ഖു ചലകാദിം വാ പത്തേ ഠപേയ്യ, പത്തേ വാ ഹത്ഥധോവനേ ഹത്ഥസ്സ ധോവനപ്പച്ചയാ തസ്സ ദുക്കടം സിയാതി സമ്ബന്ധോ.

൯൩. ഉച്ഛിട്ഠം മുഖധോവനം ഉദകമ്പി പത്തേന നീഹരന്തസ്സ ഭിക്ഖുനോ ദുക്കടം സിയാ. യോ ഭിക്ഖു അകപ്പിയം പത്തം പരിഭുഞ്ജേയ്യ, തസ്സ ദുക്കടം സിയാതി അത്ഥോ. തത്ഥ അകപ്പിയം പത്തന്തി ദാരുമയപത്താദിം.

൯൪. യോ ഭിക്ഖു ഖിപിതേ ‘‘ജീവാ’’തി വദേ വദേയ്യ, തസ്സ ദുക്കടം സിയാതി അത്ഥോ. യോ ഭിക്ഖു പരിമണ്ഡലകാദിമ്ഹി പഞ്ചസത്തതി സേഖിയേ അനാദരോ ഹുത്വാ ന സിക്ഖതി, തസ്സ ദുക്കടം സിയാതി സമ്ബന്ധോ.

൯൫. യോ ഭിക്ഖു ഭണ്ഡാഗാരേ പയുതോ മാതുയാ പിതുനോ ച ഭണ്ഡകം ഗോപേയ്യ, അസ്സ ഭിക്ഖുനോ പാചിത്തിയം സിയാതി സമ്ബന്ധോ. തത്ഥ പയുതോതി ഭണ്ഡാഗാരേ ബ്യാപാരവസേന യുത്തപ്പയുത്തോ. ഗോപയേതി ഗോപേയ്യ. യോ ഭിക്ഖു ദവായ ഹീനേന ജാതിആദിനാ ഉത്തമമ്പി വദേയ്യ, ദുബ്ഭാസിതം സിയാതി സമ്ബന്ധോ. തത്ഥ ഹീനേഹി വാ ഉക്കട്ഠേഹി വാ ജാതിആദീഹി ഏവം ഉക്കട്ഠം വാ ഹീനം വാ ‘‘ചണ്ഡാലോസീ’’തിആദിനാ നയേന ഉജും വാ ‘‘സന്തി ഇധേകച്ചേ ചണ്ഡാലവേനനേസാദാ’’തിആദിനാ നയേന അഞ്ഞാപദേസേന വാ ഉപസമ്പന്നം വാ അനുപസമ്പന്നം വാ അക്കോസാധിപ്പായം വിനാ കേവലം കീളാധിപ്പായേന വദേയ്യ, ദുബ്ഭാസിതം സിയാതി.

പകിണ്ണകനിദ്ദേസവണ്ണനാ നിട്ഠിതാ.