൬. വത്താദികണ്ഡനിദ്ദേസോ

൯൬. ഉപജ്ഝാചരിയവത്തഞ്ച, ഗമികാഗന്തുകമ്പി ച;

സേനാസനാദിവത്തഞ്ച, കാതബ്ബം പിയസീലിനാ.

൯൭. ഹത്ഥപാസേ ഠിതോ കിഞ്ചി, ഗഹിതബ്ബം ദദേ തിധാ;

ഗഹേതുകാമോ ഗണ്ഹേയ്യ, ദ്വിധായം സമ്പടിഗ്ഗഹോ.

൯൮. സങ്ഘാടിമുത്തരാസങ്ഗം, തഥാ അന്തരവാസകം;

‘‘ഏതം ഇമം അധിട്ഠാമി’’, തഥാ ‘‘പച്ചുദ്ധരാമി’’തി.

൯൯. ‘‘ഇമം ഇമാനി ഏതാനി, ഏതമ്പി ചീവര’’ന്തി വാ;

‘‘പരിക്ഖാരചോളാനീ’’തി, തഥാ ‘‘പച്ചുദ്ധരാമി’’തി.

൧൦൦. ‘‘ഏതം ഇമം അധിട്ഠാമി, പത്തം പച്ചുദ്ധരാമി’’തി;

ഏവം പച്ചുദ്ധരേധിട്ഠേ, ചീവരാദിം യഥാവിധി.

൧൦൧. സഞ്ചരിത്തം വിനാ സേസാ, സചിത്താ ഗരുകന്തിമാ;

അച്ഛിന്നം പരിണതം ഹിത്വാ, നിസ്സഗ്ഗിയമചിത്തകം.

൧൦൨. പദസോധമ്മം ദുവേ സേയ്യാ, ഇത്ഥിയാ ധമ്മദേസനാ;

ദുവേ സേനാസനാനീപി, സിബ്ബനം ചീവരസ്സപി.

൧൦൩. പവാരിതം സുരാപാനം, പഞ്ചസന്നിധിആദികം;

ജോതിനുജ്ജാലനഞ്ചേവ, കപ്പബിന്ദുമനാദികം;

ഗാമപ്പവേസനന്തേതേ, പാചിത്തീസു അചിത്തകാ.

൧൦൪. പകിണ്ണകേസു ഉദ്ദിസ്സ-കതം ഹിത്വാഞ്ഞമംസകം;

ഏകത്ഥരണപാവുരണം, ഏകമഞ്ചേ തുവട്ടനം;

ഏകതോ ഭുഞ്ജനഞ്ചാപി, നച്ചഗീതാദിസത്തപി.

൧൦൫. അകായബന്ധനഞ്ചാപി, പത്തഹത്ഥകവാടകം;

അചിത്തകമിദം സബ്ബം, സേസമേത്ഥ സചിത്തകം.

൧൦൬. വീതിക്കമനചിത്തേന, സചിത്തകമചിത്തകം;

പഞ്ഞത്തിജാനനേനാപി, വദന്താചരിയാ തഥാ.

൧൦൭. പുബ്ബകരണാദികം കത്വാ, ഉപോസഥപ്പവാരണം;

നവധാ ദീപിതം സബ്ബം, കാതബ്ബം പിയസീലിനാ.

൧൦൮. സമ്മജ്ജനീ പദീപോ ച, ഉദകം ആസനേന ച;

ഉപോസഥസ്സ ഏതാനി, പുബ്ബകരണന്തി വുച്ചതി.

൧൦൯. ഛന്ദപാരിസുദ്ധിഉതുക്ഖാനം, ഭിക്ഖുഗണനാ ച ഓവാദോ;

ഉപോസഥസ്സ ഏതാനി, പുബ്ബകിച്ചന്തി വുച്ചതി.

൧൧൦. ഉപോസഥോ യാവതികാ ച ഭിക്ഖൂ കമ്മപ്പത്താ,

സഭാഗാപത്തിയോ ച ന വിജ്ജന്തി;

വജ്ജനീയാ ച പുഗ്ഗലാ തസ്മിം ന ഹോന്തി,

പത്തകല്ലന്തി വുച്ചതി.

൧൧൧. പുബ്ബകരണപുബ്ബകിച്ചാനി സമാപേത്വാ ദേസിതാപത്തികസ്സ സമഗ്ഗസ്സ ഭിക്ഖുസങ്ഘസ്സ അനുമതിയാ പാതിമോക്ഖം ഉദ്ദിസിതും ആരാധനം കരോമ.

൧൧൨. പാരിസുദ്ധിഅധിട്ഠാന-സുത്തുദ്ദേസവസാ തിധാ;

ഗണപുഗ്ഗലസങ്ഘാ ച, തം കരേയ്യും യഥാക്കമം.

൧൧൩. ചാതുദ്ദസോ പന്നരസോ, സാമഗ്ഗീ ദിനതോ തിധാ;

ദിനപുഗ്ഗലകത്തബ്ബാ-കാരതോ തേ നവേരിതാ.

൧൧൪. തയോ തയോതി കത്വാന, ദിനപുഗ്ഗലഭേദതോ;

തേവാചീദ്വേകവാചീതി, നവ വുത്താ പവാരണാ.

൧൧൫. കത്തികന്തിമപക്ഖമ്ഹാ, ഹേമം ഫഗ്ഗുനപുണ്ണമാ;

തസ്സ അന്തിമപക്ഖമ്ഹാ, ഗിമ്ഹം ആസാള്ഹിപുണ്ണമാ;

വസ്സകാലം തതോ സേസം, ചതുവീസതുപോസഥാ.

൧൧൬. ചാതുദ്ദസാ ഛ ഏതേസു, പക്ഖാ തതിയസത്തമാ;

ഞേയ്യാ പന്നരസാ സേസാ, അട്ഠാരസ ഉപോസഥാ.

൧൧൭. ‘‘ഛന്ദം ദമ്മി, ഛന്ദം മേ ഹര, ഛന്ദം മേ ആരോചേഹീ’’തി ഛന്ദം ദാതബ്ബം.

൧൧൮. ‘‘പാരിസുദ്ധിം ദമ്മി, പാരിസുദ്ധിം മേ ഹര, പാരിസുദ്ധിം മേ ആരോചേഹീ’’തി പാരിസുദ്ധി ദാതബ്ബാ.

൧൧൯. ‘‘പവാരണം ദമ്മി, പവാരണം മേ ഹര, പവാരണം മേ ആരോചേഹി, മമത്ഥായ പവാരേഹീ’’തി പവാരണാ ദാതബ്ബാ.

൧൨൦. ആപത്തിദേസകേന ‘‘അഹം, ഭന്തേ, സമ്ബഹുലാ നാനാവത്ഥുകാ ആപത്തിയോ ആപജ്ജിം, താ തുമ്ഹമൂലേ പടിദേസേമീ’’തി വത്വാ പടിഗ്ഗണ്ഹന്തേന ‘‘പസ്സസി, ആവുസോ, താ ആപത്തിയോ’’തി വുത്തേ ‘‘ആമ, ഭന്തേ, പസ്സാമീ’’തി വത്വാ പുന പടിഗ്ഗണ്ഹന്തേന ‘‘ആയതിം, ആവുസോ, സംവരേയ്യാസീ’’തി വുത്തേ ‘‘സാധു, സുട്ഠു, ഭന്തേ സംവരിസ്സാമീ’’തി തിക്ഖത്തും വത്വാ ദേസേതബ്ബം.

൧൨൧. വേമതിം ആരോചേന്തേന ‘‘അഹം, ഭന്തേ, സമ്ബഹുലാസു നാനാവത്ഥുകാസു ആപത്തീസു വേമതികോ, യദാ നിബ്ബേമതികോ ഭവിസ്സാമി, തദാ താ ആപത്തിയോ പടികരിസ്സാമീ’’തി തിക്ഖത്തും വത്വാ ആരോചേതബ്ബം.

൧൨൨. ‘‘അജ്ജ മേ ഉപോസഥോ ‘പന്നരസോ, ചാതുദ്ദസോ’തി വാ അധിട്ഠാമീ’’തി തിക്ഖത്തും വത്വാ പുഗ്ഗലേന അധിട്ഠാനുപോസഥോ കാതബ്ബോ.

൧൨൩. ദ്വീസു പന ഥേരേന ‘‘പരിസുദ്ധോ അഹം ആവുസോ, ‘പരിസുദ്ധോ’തി മം ധാരേഹീ’’തി തിക്ഖത്തും വത്തബ്ബം. നവകേനപി തഥേവ വത്തബ്ബം. ‘‘ഭന്തേ, ധാരേഥാ’’തി വചനം വിസേസോ.

൧൨൪. തീസു പന ‘‘സുണന്തു മേ ആയസ്മന്താ, അജ്ജുപോസഥോ പന്നരസോ, യദായസ്മന്താനം പത്തകല്ലം, മയം അഞ്ഞമഞ്ഞം പാരിസുദ്ധിഉപോസഥം കരേയ്യാമാ’’തി ഞത്തിം ഠപേത്വാ പടിപാടിയാ വുത്തനയേന പാരിസുദ്ധിഉപോസഥോ കാതബ്ബോ.

൧൨൫. ‘‘അജ്ജ മേ പവാരണാ ‘ചാതുദ്ദസീ, പന്നരസീ’തി വാ അധിട്ഠാമീ’’തി തിക്ഖത്തും വത്വാ ഏകേന പവാരേതബ്ബം.

൧൨൬. ദ്വീസു പന ഥേരേന ‘‘അഹം, ആവുസോ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ, വദതു മം ആയസ്മാ അനുകമ്പം ഉപാദായ, പസ്സന്തോ പടികരിസ്സാമീ’’തി തിക്ഖത്തും വത്വാ പവാരേതബ്ബം. നവകേനാപി തഥേവ വത്തബ്ബം. ‘‘ഭന്തേ’’തി വചനം വിസേസോ.

൧൨൭. തീസു വാ ചതൂസു വാ പന ‘‘സുണന്തു മേ ആയസ്മന്താ, അജ്ജ പവാരണാ പന്നരസീ, യദായസ്മന്താനം പത്തകല്ലം, മയം അഞ്ഞമഞ്ഞം പവാരേയ്യാമാ’’തി ഞത്തിം ഠപേത്വാ ഥേരേന ‘‘അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്താ അനുകമ്പം ഉപാദായ, പസ്സന്തോ പടികരിസ്സാമീ’’തി തിക്ഖത്തും വത്വാ പവാരേതബ്ബം. നവകേഹിപി തഥേവ പടിപാടിയാ പവാരേതബ്ബം. ‘‘ഭന്തേ’’തിവചനം വിസേസോ.

൧൨൮. ചതൂഹി അധികേസു പന ‘‘സുണാതു മേ ആവുസോ സങ്ഘോ, അജ്ജ പവാരണാ പന്നരസീ, യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി ഞത്തിം ഠപേത്വാ വുഡ്ഢതരേന ‘‘സങ്ഘം, ആവുസോ, പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്തോ അനുകമ്പം ഉപാദായ, പസ്സന്തോ പടികരിസ്സാമീ’’തി തിക്ഖത്തും വത്വാ പവാരേതബ്ബം. നവകേഹിപി തഥേവ പടിപാടിയാ ‘‘സങ്ഘം, ഭന്തേ, പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്തോ അനുകമ്പം ഉപാദായ, പസ്സന്തോ പടികരിസ്സാമീ’’തി തിക്ഖത്തും വത്വാ പവാരേതബ്ബം.

മൂലസിക്ഖാ നിട്ഠിതാ.

നമോ തസ്സ ഭഗവതോ അരഹതോ സമ്മാസമ്ബുദ്ധസ്സ