൫. പകിണ്ണകനിദ്ദേസോ

൫൩. സങ്ഘികം ഗരുഭണ്ഡം യോ, ദേതി അഞ്ഞസ്സ ഇസ്സരോ;

ഥുല്ലച്ചയം യഥാവത്ഥും, ഥേയ്യാ പാരാജികാദിപി.

൫൪. കുസാദിമയചീരാനി, കമ്ബലം കേസവാലജം;

സമയം വിനാ ധാരയതോ, ലൂകപക്ഖാജിനക്ഖിപം.

൫൫. സത്ഥകമ്മേ വത്ഥികമ്മേ, സം നിമിത്തഞ്ച ഛിന്ദതോ;

ഥുല്ലച്ചയം മനുസ്സാനം, മംസാദിഭോജനേപി വാ.

൫൬. കദലേരകക്കദുസ്സാനി, പോത്ഥകം സബ്ബനീലകം;

സബ്ബപീതാദികഞ്ചാപി, ധാരയന്തസ്സ ദുക്കടം.

൫൭. ഹത്ഥിസ്സുരഗസോണാനം, സീഹബ്യഗ്ഘച്ഛദീപിനം;

തരച്ഛസ്സ ച മംസാദിം, ഉദ്ദിസ്സകതകമ്പി ച.

൫൮. അനാപുച്ഛിതമംസഞ്ച, ഭുഞ്ജതോ ദുക്കടം സിയാ;

യാതാനുപുബ്ബം ഹിത്വാന, ദകതിത്ഥാദികം വജേ.

൫൯. സഹസാ വുബ്ഭജിത്വാന, പവിസേ നിക്ഖമേയ്യ വാ;

വച്ചപസ്സാവകുടികം, വിനാ ഉക്കാസികം വിസേ.

൬൦. നിത്ഥുനന്തോ കരേ വച്ചം, ദന്തകട്ഠഞ്ച ഖാദയം;

വച്ചപസ്സാവദോണീനം, ബഹി വച്ചാദികം കരേ.

൬൧. ഖരേന ചാവലേഖേയ്യ, കട്ഠം പാതേയ്യ കൂപകേ;

ഊഹതഞ്ച ന ധോവേയ്യ, ഉക്ലാപഞ്ച ന സോധയേ.

൬൨. ദകകിച്ചം കരോന്തസ്സ, കത്വാ ‘‘ചപുചപൂ’’തി ച;

അനജ്ഝിട്ഠോവ ഥേരേന, പാതിമോക്ഖമ്പി ഉദ്ദിസേ.

൬൩. അനാപുച്ഛായ പഞ്ഹസ്സ, കഥനേ വിസ്സജ്ജനേപി ച;

സജ്ഝായകരണേ ദീപ-ജാലനേ വിജ്ഝാപനേപി ച.

൬൪. വാതപാനകവാടാനി, വിവരേയ്യ ഥകേയ്യ വാ;

വന്ദനാദിം കരേ നഗ്ഗോ, ഗമനം ഭോജനാദികം.

൬൫. പരികമ്മം കരേ കാരേ, തിപടിച്ഛന്നകം വിനാ;

കായം നഹായം ഘംസേയ്യ, കുട്ടേ ഥമ്ഭേ തരുമ്ഹി വാ.

൬൬. കുരുവിന്ദകസുത്തേന, അഞ്ഞമഞ്ഞസ്സ കായതോ;

അഗിലാനോ ബഹാരാമേ, ചരേയ്യ സഉപാഹനോ.

൬൭. ഉപാഹനം യോ ധാരേതി, സബ്ബനീലാദികമ്പി ച;

നിമിത്തം ഇത്ഥിയാ രത്തോ, മുഖം വാ ഭിക്ഖദായിയാ.

൬൮. ഉജ്ഝാനസഞ്ഞീ അഞ്ഞസ്സ, പത്തം വാ അത്തനോ മുഖം;

ആദാസാദിമ്ഹി പസ്സേയ്യ, ഉച്ചാസനമഹാസനേ.

൬൯. നിസജ്ജാദിം കരോന്തസ്സ, ദുക്കടം വന്ദനേപി ച;

ഉക്ഖിത്താനുപസമ്പന്ന-നാനാസംവാസകാദിനം.

൭൦. ഏകതോ പണ്ഡകിത്ഥീഹി, ഉഭതോബ്യഞ്ജനേന വാ;

ദീഘാസനേ നിസീദേയ്യ, അദീഘേ ആസനേ പന.

൭൧. അസമാനാസനികേന, മഞ്ചപീഠേ സയേയ്യ വാ;

കുലസങ്ഗഹത്ഥം ദദതോ, ഫലപുപ്ഫാദികമ്പി ച.

൭൨. ഗന്ഥിമാദിം കരേ കാരേ, ജിനവാരിതപച്ചയേ;

പരിഭുഞ്ജേയ്യ അബ്യത്തോ, അനിസ്സായ വസേയ്യ വാ.

൭൩. അനുഞ്ഞാതേഹി അഞ്ഞസ്സ, ഭേസജ്ജം വാ കരേ വദേ;

കരേ സാപത്തികോ ഭിക്ഖു, ഉപോസഥപ്പവാരണം.

൭൪. ദ്വാരബന്ധാദികേ ഠാനേ, പരിവത്തകവാടകം;

അപിധായ വിനാഭോഗം, നിയോഗം വാ സയേ ദിവാ.

൭൫. ധഞ്ഞിത്ഥിരൂപരതനം, ആവുധിത്ഥിപസാധനം;

തൂരിയഭണ്ഡം ഫലം രുക്ഖേ, പുബ്ബണ്ണാദിഞ്ച ആമസേ.

൭൬. സസിത്ഥോദകതേലേഹി, ഫണഹത്ഥഫണേഹി വാ;

കേസമോസണ്ഠനേകസ്മിം, ഭാജനേ ഭോജനേപി ച.

൭൭. ഏകത്ഥരണപാവുരണാ, സയേയ്യും ദ്വേകമഞ്ചകേ;

ദന്തകട്ഠഞ്ച ഖാദേയ്യ, അധികൂനം പമാണതോ.

൭൮. യോജേതി വാ യോജാപേതി, നച്ചം ഗീതഞ്ച വാദിതം;

ദസ്സനം സവനം തേസം, കരോന്തസ്സ ച ദുക്കടം.

൭൯. വീഹാദിരോപിമേ ചാപി, ബഹിപാകാരകുട്ടകേ;

വച്ചാദിഛഡ്ഡനാദിമ്ഹി, ദീഘകേസാദിധാരണേ.

൮൦. നഖമട്ഠകരണാദിമ്ഹി, സമ്ബാധേ ലോമഹാരണേ;

പരികമ്മകതം ഭൂമിം, അക്കമേ സഉപാഹനോ.

൮൧. അധോതഅല്ലപാദേഹി, സങ്ഘികം മഞ്ചപീഠകം;

പരികമ്മകതം ഭിത്തിം, ആമസന്തസ്സ ദുക്കടം.

൮൨. സങ്ഘാടിയാപി പല്ലത്ഥേ, ദുപ്പരിഭുഞ്ജേയ്യ ചീവരം;

അകായബന്ധനോ ഗാമം, വജേ കത്വാന വച്ചകം.

൮൩. നാചമേയ്യ ദകേ സന്തേ, സമാദേയ്യ അകപ്പിയേ;

ദേസനാരോചനാദിമ്ഹി, സഭാഗാപത്തിയാപി ച.

൮൪. ന വസേ വസ്സം വിസംവാദേ, സുദ്ധചിത്തേ പടിസ്സവം;

വസ്സം വസിത്വാ ഗമനേ, അനനുഞ്ഞാതകിച്ചതോ.

൮൫. വിനാപദം തരുസ്സുദ്ധം, പോരിസമ്ഹാഭിരൂഹണേ;

അപരിസ്സാവനോദ്ധാനം, വജേ തം യാചതോ ന ദേ.

൮൬. അത്തനോ ഘാതനേ ഇത്ഥി-രൂപാദിം കാരയേയ്യ വാ;

ഹിത്വാ മാലാദികം ചിത്തം, ജാതകാദിം സയം കരേ.

൮൭. ഭുഞ്ജന്തമുട്ഠപേ തസ്സ, സാലാദീസു നിസീദതോ;

വുഡ്ഢാനം പന ഓകാസം, അദത്വാ വാപി ദുക്കടം.

൮൮. യാനാദിമഭിരൂഹേയ്യ, കല്ലകോ രതനത്തയം;

ആരബ്ഭ വദേ ദവഞ്ഞ-പരിസായോപലാലനേ.

൮൯. കായാദിം വിവരിത്വാന, ഭിക്ഖുനീനം ന ദസ്സയേ;

വാചേ ലോകായതം പലിതം, ഗണ്ഹേയ്യ ഗണ്ഹാപേയ്യ വാ.

൯൦. യത്ഥ കത്ഥചി പേളായം, ഭുഞ്ജതോ പത്തഹത്ഥകോ;

വാതപാനകവാടം വാ, പണാമേ സോദകമ്പി ച.

൯൧. ഉണ്ഹേയ്യ പടിസാമേയ്യ, അതിഉണ്ഹേയ്യ വോദകം;

ഠപേയ്യ ഭൂമിയം പത്തം, അങ്കേ വാ മഞ്ചപീഠകേ.

൯൨. മിഡ്ഢന്തേ പരിഭണ്ഡന്തേ, പാദേ ഛത്തേ ഠപേതി വാ;

ചലകാദിം ഠപേ പത്തം, പത്തേ വാ ഹത്ഥധോവനേ.

൯൩. പത്തേന നീഹരന്തസ്സ, ഉച്ഛിട്ഠമുദകമ്പി ച;

അകപ്പിയമ്പി പത്തം വാ, പരിഭുഞ്ജേയ്യ ദുക്കടം.

൯൪. വദേ ‘‘ജീവാ’’തി ഖിപിതേ, ന സിക്ഖതി അനാദരോ;

പരിമണ്ഡലകാദിമ്ഹി, സേഖിയേ ദുക്കടം സിയാ.

൯൫. യോ ഭണ്ഡഗാരേ പയുതോവ ഭണ്ഡകം,

മാതൂന പാചിത്തിയമസ്സ ഗോപയേ;

ദവായ ഹീനേനപി ജാതിആദിനാ,

വദേയ്യ ദുബ്ഭാസിതമുത്തമമ്പി യോതി.