൪. രജനനിദ്ദേസവണ്ണനാ

൫൮. മൂലഞ്ച ഖന്ധോ ച തചോ ച പത്തഞ്ച ഫലഞ്ച പുപ്ഫഞ്ച, തേസം പഭേദോതി ഛട്ഠീതപ്പുരിസോ. അഥ വാ പഭേദ-സദ്ദസ്സ കമ്മസാധനത്തേ താനിയേവ പഭേദോതി കമ്മധാരയോ, തതോ. രജന്തി ഏതേഹീതി രജനാനി, മൂലാദീനി. ‘‘അനുജാനാമി, ഭിക്ഖവേ, ഛ രജനാനി മൂലരജന’’ന്തിആദിനാ (മഹാവ. ൩൪൪) ഭഗവതാ അനുഞ്ഞാതത്താ വുത്തം ‘‘രജനാ ഛപ്പകാരാനി, അനുഞ്ഞാതാനി സത്ഥുനാ’’തി.

൫൯. മൂലേതി മൂലരജനേ ഹലിദ്ദിം വിവജ്ജിയ സബ്ബം ലബ്ഭന്തി സമ്ബന്ധോ. ഏവം സബ്ബത്ഥ. മഞ്ജേട്ഠി ച തുങ്ഗഹാരകോ ചാതി ദ്വന്ദോ. അല്ലി-സദ്ദേന നീലി-സദ്ദേന ച തേസം ഗച്ഛജാതീനം പത്താനി ഗഹിതാനി ഉപചാരേന, തഥാ ലോദ്ദ-സദ്ദേന കണ്ഡുല-സദ്ദേന ച തചോ, കുസുമ്ഭ-സദ്ദേന കിം സുക-സദ്ദേന ച പുപ്ഫാനി. തേനേവ ച താനി നപുംസകാനി. തുങ്ഗഹാരകോ നാമ ഏകോ കണ്ടകരുക്ഖോ, തസ്സ ഹരിതാലവണ്ണം ഖന്ധരജനം ഹോതി. അല്ലിപത്തേന ഏകവാരം ഗിഹിപരിഭുത്തം രജിതും വട്ടതി. ഫലരജനേ സബ്ബമ്പി വട്ടതി.

രജനനിദ്ദേസവണ്ണനാ നിട്ഠിതാ.