൩൧. വികപ്പനാനിദ്ദേസവണ്ണനാ

൨൨൧. സമ്മുഖാ പരമ്മുഖാതി സസ്സ മുഖം, പരസ്സ മുഖന്തി വിഗ്ഗഹോ, സമ്മുഖേന പരമ്മുഖേനാതി അത്ഥോ. സമ്മുഖാവികപ്പനാ പരമ്മുഖാവികപ്പനാതി ഭേദാ ദുവേ വികപ്പനാ വുത്താതി യോജനാ. ഭേദാതി വിസേസതോ. അഥ വാ സസ്സ മുഖം മുഖസമ്ബന്ധിവചനം അസ്സാ വികപ്പനായാതി സമാസോ. തഥാ പരമ്മുഖാ. സമ്മുഖാ ച പരമ്മുഖാ ച, തസ്സാ ഭേദോ, തതോ. സമ്മുഖായ സമ്മുഖവികപ്പനായ. ബ്യത്തസ്സാതി വികപ്പനവിധാനം പച്ചുദ്ധാരവിധാനഞ്ച ജാനന്തസ്സ.

൨൨൨. തേനാതി യസ്സ സന്തികേ വികപ്പേതി, തേന ഭിക്ഖുനാ. പരിഭോഗാദികന്തി പരിഭോഗം വിസ്സജ്ജനം അധിട്ഠാനഞ്ച.

൨൨൪-൫. അപരാ സമ്മുഖാവേകാതി ഏത്ഥ വാ-സദ്ദോ പക്ഖന്തരേ, അഥ വാതി അത്ഥോ, അപി-സദ്ദത്ഥോ വാ വാ-സദ്ദോ, സോ അപരാ-സദ്ദതോ പരം ദട്ഠബ്ബോ, അപരാപി ഏകാ സമ്മുഖാവികപ്പനാ അത്ഥീതി അത്ഥോ. കഥന്തി ആഹ ‘‘ഭിക്ഖുസ്സാ’’തിആദി. ‘‘പഞ്ചന്നം സഹധമ്മീന’’ന്തി വുത്തത്താ ‘‘തിസ്സസ്സ ഭിക്ഖുനോ’’തിആദീസു തിസ്സായ ഭിക്ഖുനിയാ തിസ്സായ സിക്ഖമാനായ തിസ്സായ സാമണേരിയാ തിസ്സസ്സ സാമണേരസ്സാതിപി വിഞ്ഞാതബ്ബം.

൨൨൬. പരമ്മുഖാവികപ്പനാതി പരമ്മുഖേന വികപ്പനേന, പരമ്മുഖാവികപ്പനാതി വാ ഗഹേതബ്ബം, പരമ്മുഖാവികപ്പനാ കഥന്തി അത്ഥോ.

൨൨൭. മിത്തോതി ദള്ഹമിത്തോ. സന്ദിട്ഠോതി ദിട്ഠമത്തമിത്തോ. ഏത്ഥ പന ദ്വിന്നം വികപ്പനാനം കിം നാനാകരണന്തി? സമ്മുഖാവികപ്പനായ താവ സയം വികപ്പേത്വാ പരേന പച്ചുദ്ധരാപേതി, തേനേവ സാ സമ്മുഖാവികപ്പനാ നാമ ജാതാ. പരമ്മുഖാവികപ്പനായ പരേനേവ വികപ്പാപേത്വാ പരേനേവ പച്ചുദ്ധരാപേതി, തേനേവ സാ പരമ്മുഖാവികപ്പനാ നാമ ജാതാതി ഇദമേത്ഥ നാനാകരണന്തി.

൨൨൮. ദൂരസന്തികത്തേകത്തന്തി ഏത്ഥ ആസന്നദൂരഭാവോ അധിട്ഠാനേ വുത്തനയേനേവ വേദിതബ്ബോ.

൨൨൯. ദസാഹം…പേ… പച്ചാസായ സതി മാസകം നാധിട്ഠിതവികപ്പിതം നിസ്സഗ്ഗിം നുപ്പാദയതീതി സമ്ബന്ധോ. ദസ അഹാനി സമാഹടാനി ദസാഹം. സബ്ബത്ഥ അച്ചന്തസംയോഗേ ദുതിയാ. തത്ഥ യം ദിവസം ചീവരം ഉപ്പന്നം, തസ്സ യോ അരുണോ, സോ ഉപ്പന്നദിവസനിസ്സിതോ, തസ്മാ ചീവരുപ്പാദദിവസേന സദ്ധിം ഏകാദസേ അരുണുഗ്ഗമനേ നിസ്സഗ്ഗിയം ഹോതീതി ആഹ ‘‘ദസാഹ’’ന്തി. മാസമേകം വാതി ‘‘അനത്ഥതേ കഥിനേ ഏകം പച്ഛിമകത്തികമാസ’’ന്തി (പാരാ. ൬൪൯ അത്ഥതോ സമാനം) വുത്തത്താ കഥിനത്ഥതേ പഞ്ച മാസേതി ലബ്ഭതി. കഥിനം അത്ഥതം യസ്മിം വിഹാരേതി സമാസോ. പാരിപൂരത്ഥന്തി പാരിപൂരി അത്ഥോ യസ്സാതി വിഗ്ഗഹോ. കിരിയാവിസേസനം, പാരിപൂരിപ്പയോജനം കത്വാതി അത്ഥോ. ഊനസ്സാതി യത്തകേന കയിരമാനം അധിട്ഠാനം ചീവരം പഹോതി, തത്തകതാഭാവതോ ഊനസ്സ ഏകാദസമാസസത്തമാസസങ്ഖാതേ പിട്ഠിസമയേ ഉപ്പന്നസ്സ മൂലചീവരസ്സ. പച്ചാസാ സതീതി ‘‘സങ്ഘാദിതോ യതോ കുതോചി ലച്ഛാമീ’’തി ഏവം സതിയാ പച്ചാസായാതി അത്ഥോ. ഉഭയമ്പി യ-കാരലോപേന നിദ്ദിട്ഠം. സതീതി വാ നിപാതോ, ലിങ്ഗവിപല്ലാസേന വാഹ. ഏത്ഥ പന ബ്യതിരേകവസേന ദസാഹാതിക്കമനാദീസു നിസ്സഗ്ഗിയം പാചിത്തിയം വേദിതബ്ബന്തി.

വികപ്പനാനിദ്ദേസവണ്ണനാ നിട്ഠിതാ.