൨൪. അഞ്ജനീനിദ്ദേസവണ്ണനാ

൧൮൨. വട്ടാ വാ അട്ഠസോളസംസാ വാ മട്ഠാ അഞ്ജനീ വട്ടതീതി യോജനാ. അട്ഠ ച സോളസ ച അംസാ കോണാ യസ്സാ സാതി വിഗ്ഗഹോ. സോളസംസപദേസവിഭത്തായ അട്ഠംസാസുതിയാ അട്ഠംസപദേസവിഭത്താ ചതുരംസാപി സാമത്ഥിയാ ഗയ്ഹതീതി ഞാതബ്ബം. ‘‘ഉജുകമേവ പന ചതുരംസാവാ’’തി ഹി അട്ഠകഥായം (പാരാ. അട്ഠ. ൧.൮൫) വുത്തം. അഞ്ജനീതി അഞ്ജനനാളി. മൂലേ തിസ്സോപി ലേഖാ വട്ടന്തീതി യോജനാ. മൂലേതി ബുന്ദേ, ഹേട്ഠതോതി വുത്തം ഹോതി. ലേഖാതി വട്ടലേഖാ. ബന്ധിതും ഗീവായം ഏകാ ഏവ ലേഖാ വട്ടതീതി സമ്ബന്ധോ. ബന്ധിതുന്തി പിധാനബന്ധനത്ഥം.

൧൮൩. യം കിഞ്ചി രൂപന്തി ഇത്ഥിരൂപാദി യം കിഞ്ചി രൂപം. മാലാദികമ്മന്തി മാലാകമ്മം ലതാകമ്മം. അഡ്ഢചന്ദാദീതി ഏത്ഥ ആദി-സദ്ദേന അഗ്ഘിയാദികം ഗഹിതം. ഏത്ഥാതി അഞ്ജനിയം.

൧൮൪. ഥവികാതി അഞ്ജനിഥവികാ. സിപാടീതി ഖുരസിപാടികാ. സലാകാപി അചിത്തകാ ലബ്ഭാതി സമ്ബന്ധോ. സലാകാതി അഞ്ജനിസലാകാ. നത്ഥി ചിത്തമേതിസ്സാതി അചിത്തകാ. താദിസം പന ലഭിത്വാ ഉപാഹനായോ വിയ നാസേത്വാ പരിഭുഞ്ജിതബ്ബം.

൧൮൫. അട്ഠി-സദ്ദേന മനുസ്സട്ഠിം ഠപേത്വാ യം കിഞ്ചി അട്ഠി ഗഹിതം.

൧൮൬. ധൂമനേത്താതി ധൂമനാളികാ, നിസ്സ ആ-കാരാദേസവസേന വുത്തം. സത്ഥകദണ്ഡാനീതി സത്ഥദണ്ഡാ. നത്ഥും ദേന്തി ഏതായാതി നത്ഥുദാനാ. അനിയമേന ഹി നദാദിതോ വാ ഈ. തേഹി സങ്ഖനാഭിആദീഹി നിബ്ബത്താ തമ്മയാ.

അഞ്ജനീനിദ്ദേസവണ്ണനാ നിട്ഠിതാ.