൪൮. സന്തോസനിദ്ദേസവണ്ണനാ

൪൫൯. ‘‘ചത്താരിമാനി, ഭിക്ഖവേ, അപ്പാനി ചേവ സുലഭാനി ച, താനി ച അനവജ്ജാനി. കതമാനി ചത്താരി? പംസുകൂലം, ഭിക്ഖവേ, ചീവരാനം അപ്പഞ്ച സുലഭഞ്ച, തഞ്ച അനവജ്ജം. പിണ്ഡിയാലോപോ, ഭിക്ഖവേ, ഭോജനാനം അപ്പഞ്ച സുലഭഞ്ച, തഞ്ച അനവജ്ജം. രുക്ഖമൂലം, ഭിക്ഖവേ, സേനാസനാനം അപ്പഞ്ച സുലഭഞ്ച, തഞ്ച അനവജ്ജം. പൂതിമുത്തഭേസജ്ജം, ഭിക്ഖവേ, ഭേസജ്ജാനം അപ്പഞ്ച സുലഭഞ്ച, തഞ്ച അനവജ്ജം. ഇമാനി ഖോ, ഭിക്ഖവേ, ചത്താരി അപ്പാനി ചേവ സുലഭാനി ച, താനി ച അനവജ്ജാനീ’’തി (അ. നി. ൪.൨൭; ഇതിവു. ൧൦൧) വചനതോ ‘‘അപ്പേനാ’’തിആദി വുത്തം.

സന്തുട്ഠോതി ഏത്ഥ യഥാലാഭയഥാബലയഥാസാരുപ്പസന്തോസാനം വസേന ഏകേകസ്മിം പച്ചയേ തയോ തയോ കത്വാ ചതൂസു പച്ചയേസു ദ്വാദസ സന്തോസാ ഹോന്തി. മത്തഞ്ഞൂതി ഏത്ഥ (മ. നി. അട്ഠ. ൧.൪൨൨; സം. നി. അട്ഠ. ൩.൪.൨൩൯; അ. നി. അട്ഠ. ൨.൩.൧൬; ഇതിവു. അട്ഠ. ൨൮; ധ. സ. അട്ഠ. ൧൨൪-൧൩൪) ചത്താരോ മത്താ പരിയേസനമത്താ പടിഗ്ഗഹണമത്താ പരിഭോഗമത്താ വിസ്സജ്ജനമത്താതി. ഇതരീതരേന യാപേന്തോ സുഭരോ നാമ. സന്തോസവിനിച്ഛയോ.

സന്തോസനിദ്ദേസവണ്ണനാ നിട്ഠിതാ.