൨൭. അസംവാസികനിദ്ദേസവണ്ണനാ

൧൯൮. ഉക്ഖിത്തോതി ആപത്തിയാ അദസ്സനേ, അപ്പടികമ്മേ, പാപികായ ദിട്ഠിയാ അപ്പടിനിസ്സഗ്ഗേ വാ ഉക്ഖിത്തകോതി തിവിധോപി ഇധ ഉക്ഖിത്തോ ഗഹിതോ. അനുപസമ്പന്നോതി ഇമിനാ സിക്ഖമാനസാമണേരസാമണേരീസിക്ഖാപച്ചക്ഖാതകാ ഗഹിതാതി വേദിതബ്ബാ. ഛിന്നമൂലകോ നാമ അന്തിമവത്ഥും അജ്ഝാപന്നകോ. നാനാസംവാസോതി ലദ്ധിനാനാസംവാസകോ. ‘‘നാനാസീമായ ഠിതചതുത്ഥോ കമ്മം കരേയ്യ, ഇദ്ധിയാ വേഹാസേ ഠിതചതുത്ഥോ കമ്മം കരേയ്യ, അകമ്മം ന ച കരണീയ’’ന്തി ഹി വുത്തത്താ ഇമേപി ‘‘അസംവാസികാ’’തി വുത്താ. ഏതേസു പന ഉക്ഖിത്തകേഹി സദ്ധിം ഉപോസഥാദീനി കരോന്തോ പാചിത്തിയം ആപജ്ജതി. നിസ്സീമട്ഠവേഹാസട്ഠേഹി കരോന്തസ്സ കമ്മം കുപ്പതി, ദുക്കടഞ്ച ഹോതി, ഇതരേഹി ദുക്കടം. അസംവാസികവിനിച്ഛയോ.

അസംവാസികനിദ്ദേസവണ്ണനാ നിട്ഠിതാ.