൨൬. സമാനാസനികനിദ്ദേസവണ്ണനാ

൧൯൫. തിണ്ണം വസ്സാനം അന്തരം തിവസ്സന്തരം. ‘‘അനുജാനാമി, ഭിക്ഖവേ, തിവസ്സന്തരേന സഹ നിസീദിതു’’ന്തി (ചൂളവ. ൩൨൦) ഹി വുത്തം. യോ ദ്വീഹി വസ്സേഹി (ചൂളവ. അട്ഠ. ൩൨൦) വുഡ്ഢോ വാ നവോ വാ, സോ തിവസ്സന്തരോ നാമ.

൧൯൬. മുനീതി ബുദ്ധമുനി. സബ്ബേഹേവാതി അനുപസമ്പന്നേഹിപി.

൧൯൭. അന്തന്തി പച്ഛിമം. ‘‘അനുജാനാമി, ഭിക്ഖവേ, യം തിണ്ണം പഹോതി, ഏത്തകം പച്ഛിമം ദീഘാസന’’ന്തി (ചൂളവ. ൩൨൦) വുത്തത്താ യം തിണ്ണം പഹോതി, ഏതം സംഹാരിമം വാ ഹോതു അസംഹാരിമം വാ, തഥാരൂപേസു ഫലകഖണ്ഡേസുപി നിസീദിതും വട്ടതി. ദ്വിന്നന്തി ദ്വിന്നം സമാനാസനികാനം. ‘‘അനുജാനാമി, ഭിക്ഖവേ, ദുവഗ്ഗസ്സ മഞ്ചം ദുവഗ്ഗസ്സ പീഠ’’ന്തി (ചുളവ. ൩൨൦) വുത്തത്താ ദ്വേ സമാനാസനികാ സഹ നിസീദിതും ലഭന്തി. അഞ്ഞേഹി അസമാനാസനികേഹി, അനുപസമ്പന്നാദീഹി വാ ദ്വേ ഹുത്വാപി നിസീദിതും ന ലഭന്തി. സമാനാസനികവിനിച്ഛയോ.

സമാനാസനികനിദ്ദേസവണ്ണനാ നിട്ഠിതാ.