൪൪. ഉപോസഥനിദ്ദേസോ

ഉപോസഥോതി –

൪൧൦. ദുവേ ഉപോസഥാ ചാതു-ദ്ദസോ പന്നരസോ ഇതി;

സുത്തുദ്ദേസമധിട്ഠാന-പാരിസുദ്ധിവസാ തയോ.

൪൧൧. സുത്തുദ്ദേസോവ സങ്ഘസ്സ, അധിട്ഠാനഉപോസഥോ;

പുഗ്ഗലസ്സേവ സേസാനം, പാരിസുദ്ധിഉപോസഥോ.

൪൧൨. പുബ്ബകിച്ചേ ച കരണേ, പത്തകല്ലേ സമാനിതേ;

സുത്തം ഉദ്ദിസതി സങ്ഘോ, പഞ്ചധാ സോ വിഭാവിതോ.

൪൧൩. വിനാന്തരായം സങ്ഖേപേ-നുദ്ദേസോ വിനിവാരിതോ;

‘‘ഥേരോവ ഇസ്സരോ ദ്വീസു, ഉദ്ദേസേസ്വേത്ഥ തീസു വാ;

വിസദേസൂ’’തി വുത്തത്താ, അവത്തന്തേപി വട്ടതി.

൪൧൪. ആഗച്ഛേയ്യും യദി സമാ, ഉദ്ദിസന്തേ വ ഥോകികാ;

ഉദ്ദിട്ഠം യം സുഉദ്ദിട്ഠം, സോതബ്ബമവസേസകം.

൪൧൫. ഉദ്ദിട്ഠമത്തേ സകലാ-യേകച്ചായുട്ഠിതായ വാ;

പാരിസുദ്ധിം കരേയ്യേസം, സന്തികേ ബഹുകാഥ ചേ;

കത്വാ സബ്ബവികപ്പേസു, പുബ്ബകിച്ചം പുനുദ്ദിസേ.

൪൧൬. പന്നരസോവാസികാനം, ഇതരാനം സചേതരോ;

സമാനേതരേനുവത്തന്തു, പുരിമാനം സചേധികാ;

പുരിമാ അനുവത്തന്തു, തേസം സേസേപ്യയം നയോ.

൪൧൭. പാടിപദോവാസികാനം, ഇതരാനം ഉപോസഥോ;

സമഥോകാനം സാമഗ്ഗിം, മൂലട്ഠാ ദേന്തു കാമതോ.

൪൧൮. ബഹി ഗന്ത്വാന കാതബ്ബോ, നോ ചേ ദേന്തി ഉപോസഥോ;

ദേയ്യാനിച്ഛായ സാമഗ്ഗീ, ബഹൂസു ബഹി വാ വജേ.

൪൧൯. പാടിപദേഗന്തുകാനം, ഏവമേവ അയം നയോ;

സാവേയ്യ സുത്തം സഞ്ചിച്ച, അസ്സാവേന്തസ്സ ദുക്കടം.

൪൨൦. സമ്മജ്ജിതും പദീപേതും, പഞ്ഞാപേതും ദകാസനം;

ന കരേയ്യ തഥാ കല്ലോ, മഹാഥേരേന പേസിതോ.

൪൨൧. സമ്മജ്ജിത്വാ പദീപേത്വാ, പട്ഠപേത്വാ ദകാസനം. ഗണഞത്തിം ഠപേത്വേവം, കത്തബ്ബോ തീഹുപോസഥോ. ‘‘സുണന്തു മേ ആയസ്മന്താ, അജ്ജുപോസഥോ പന്നരസോ, യദായസ്മന്താനം പത്തകല്ലം, മയം അഞ്ഞമഞ്ഞം പാരിസുദ്ധിഉപോസഥം കരേയ്യാമാ’’തി.

൪൨൨. ഏകംസം ചീവരം കത്വാ, നിസീദിത്വാ ഉക്കുടികം,. ഥേരേന അഞ്ജലിം തേവം, പഗ്ഗയ്ഹ സമുദീരിയാ. ‘‘പരിസുദ്ധോ അഹം ആവുസോ, പരിസുദ്ധോതി മം ധാരേഥാ’’തി, വദേ യാവതതീയകം.

൪൨൩. സമത്തപുബ്ബാരമ്ഭേന, തേ നവേനേവമീരിയാ. ‘‘പരിസുദ്ധോ അഹം ഭന്തേ, പരിസുദ്ധോതി മം ധാരേഥാ’’തി, വദേ യാവതതീയകം.

൪൨൪. ദ്വീസു ഥേരേന കത്തബ്ബം, കത്വേവമീരിയോ നവോ. ‘‘പരിസുദ്ധോ അഹം ആവുസോ, പരിസുദ്ധോതി മം ധാരേഹീ’’തി തിക്ഖത്തും വത്തബ്ബോ.

൪൨൫. നവേന ഥേരോ തിക്ഖത്തും, ഏവമസ്സ ഉദീരിയോ;

‘‘പരിസുദ്ധോ അഹം ഭന്തേ, പരിസുദ്ധോതി മം ധാരേഥാ’’തി.

൪൨൬. പുബ്ബകിച്ചം സമാപേത്വാ, അധിട്ഠേയ്യേവമേകകോ. ‘‘അജ്ജ മേ ഉപോസഥോ പന്നരസോതി വാ ചാതുദ്ദസോതി വാ അധിട്ഠാമീ’’തി വത്തബ്ബം, നോ ചേധിട്ഠേയ്യ ദുക്കടം.

൪൨൭. യത്ഥ വസന്തി ചത്താരോ, തയോ വാ യദി വാ ദുവേ;

പാരിസുദ്ധിം ഹരിത്വാന, ഏകേകസ്സിതരീതരേ;

തം തം ഉപോസഥം കയിരും, സിയാ ആപത്തി ദുക്കടം.

൪൨൮. വഗ്ഗേ സമഗ്ഗേ വഗ്ഗോതി, സഞ്ഞിനോ വിമതിസ്സ വാ;

ദുക്കടം കരോതോ ഭേദാ-ധിപ്പായേന ഥുല്ലച്ചയം;

വഗ്ഗേ സമഗ്ഗേനാപത്തി, സമഗ്ഗോ ഇതി സഞ്ഞിനോ.

൪൨൯. ഉക്ഖിത്തസ്സ ഗഹട്ഠസ്സ, സേസാനം സഹധമ്മിനം;

പാരാജികസ്സാഭബ്ബസ്സ, സിക്ഖാനിക്ഖിത്തകസ്സ ച.

൪൩൦. നിസിന്നപരിസായഞ്ച, സഭാഗാപത്തികോ തഥാ;

ഛന്ദേന പരിവുത്ഥേന, പാതിമോക്ഖം ന ഉദ്ദിസേ.

൪൩൧. അദേസയിത്വാനാപന്നം, നാവികത്വാന വേമതിം;

നുപോസഥേപി വാ കാതും, പോസഥോ ന ച കപ്പതി.

൪൩൨. അട്ഠിതോപോസഥാവാസാ, ന വജേ തദഹൂ വിനാ;

അന്തരായം വ സങ്ഘം വാ-ധിട്ഠാതും സീമമേവ വാതി.