൪൫. പവാരണാനിദ്ദേസോ

പവാരണാതി –

൪൩൩. ദ്വിന്നം തിണ്ണം ചതുന്നഞ്ച, അഞ്ഞമഞ്ഞപ്പവാരണാ;

ഏകസ്സ ച അധിട്ഠാനം, സേസാ സങ്ഘപ്പവാരണാ.

൪൩൪. പുബ്ബകിച്ചേ ച കരണേ, പത്തകല്ലേ സമാനിതേ;

ഠപേത്വാ ഞത്തിം സങ്ഘേന, കത്തബ്ബേവം പവാരണാ.

‘‘സുണാതു മേ ഭന്തേ സങ്ഘോ, അജ്ജ പവാരണാ പന്നരസീ, യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി.

൪൩൫. ഏകംസം ചീവരം കത്വാ, നിസീദിത്വാ ഉക്കുടികം;

ഥേരേന അഞ്ജലിം സങ്ഘോ, പഗ്ഗയ്ഹ സമുദീരിയോ.

൪൩൬. ‘‘സങ്ഘം, ആവുസോ, പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്തോ അനുകമ്പം ഉപാദായ, പസ്സന്തോ പടികരിസ്സാമി. ദുതിയമ്പി…പേ… തതിയമ്പി, ആവുസോ, സങ്ഘം പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്തോ അനുകമ്പം ഉപാദായ, പസ്സന്തോ പടികരിസ്സാമീ’’തി.

൪൩൭. പവാരേന്തേസു ഥേരേസു, നിസജ്ജുക്കുടികം നവോ;

പവാരേതി സയം യാവ, ഉക്കുടികോവ അച്ഛതു.

൪൩൮. പുബ്ബാരമ്ഭം സമാപേത്വാ, നവോ സങ്ഘമുദീരയേ.

൪൩൯. ‘‘സങ്ഘം, ഭന്തേ, പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്തോ അനുകമ്പം ഉപാദായ, പസ്സന്തോ പടികരിസ്സാമി. ദുതിയമ്പി…പേ… തതിയമ്പി, ഭന്തേ, സങ്ഘം പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്തോ അനുകമ്പം ഉപാദായ, പസ്സന്തോ പടികരിസ്സാമീ’’തി.

൪൪൦. ദാനേന ധമ്മസാകച്ഛാ, കലഹേഹി ച രത്തിയാ;

തേവാചികായ ഓകാസേ-സതി ഖേപിതഭാവതോ;

അന്തരായേ ദസവിധേ, ഞത്തിം വത്വാനുരൂപതോ.

൪൪൧. ‘‘സുണാതു മേ ഭന്തേ സങ്ഘോ, മനുസ്സേഹി ദാനം ദേന്തേഹി, ദ്വീഹി ഭിക്ഖൂഹി ധമ്മം സാകച്ഛന്തേഹി, കലഹം കരോന്തേഹി യേഭുയ്യേന രത്തി ഖേപിതാ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം രത്തി വിഭായിസ്സതി. അയം രാജന്തരായോ, അയം ചോരന്തരായോ, അയം അഗ്യന്തരായോ, അയം ഉദകന്തരായോ, അയം മനുസ്സന്തരായോ, അയം അമനുസ്സന്തരായോ, അയം വാളന്തരായോ, അയം സരീസപന്തരായോ, അയം ജീവിതന്തരായോ, അയം ബ്രഹ്മചരിയന്തരായോ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം ബ്രഹ്മചരിയന്തരായോ ഭവിസ്സതി. യദി സങ്ഘസ്സ പത്തകല്ലം, സങ്ഘോ ദ്വേവാചികം, ഏകവാചികം, സമാനവസ്സികം പവാരേയ്യാ’’തി.

൪൪൨. പവാരേയ്യാനുരൂപേന, യഥാഠപിതഞത്തിയാ;

ആഗച്ഛേയ്യും യദി സമാ, ആദികാ ചേത്ഥ ആഹരേ.

൪൪൩. ഏവം തിചതുവഗ്ഗോ ച, ഞത്തിം വത്വാ പവാരയേ. ‘‘സുണന്തു മേ ആയസ്മന്താ, അജ്ജ പവാരണാ പന്നരസീ, യദായസ്മന്താനം പത്തകല്ലം, മയം അഞ്ഞമഞ്ഞം പവാരേയ്യാമാ’’തി.

൪൪൪. ഏകംസം ചീവരം കത്വാ, നിസീദിത്വാ ഉക്കുടികം;

ഥേരേന അഞ്ജലിം തേവം, പഗ്ഗയ്ഹ സമുദീരിയാ.

൪൪൫. ‘‘അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്താ അനുകമ്പം ഉപാദായ, പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്താ അനുകമ്പം ഉപാദായ, പസ്സന്തോ പടികരിസ്സാമീ’’തി.

നവേനാപി ‘‘അഹം, ഭന്തേ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്താ അനുകമ്പം ഉപാദായ, പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ഭന്തേ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ, വദന്തു മം ആയസ്മന്താ അനുകമ്പം ഉപാദായ, പസ്സന്തോ പടികരിസ്സാമീ’’തി.

൪൪൬. ദ്വീസു ഥേരേന കത്തബ്ബം, നവോ കത്വേവമീരിയോ.

൪൪൭. ‘‘അഹം, ആവുസോ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ, വദതു മം ആയസ്മാ അനുകമ്പം ഉപാദായ, പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ആവുസോ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ, വദതു മം ആയസ്മാ അനുകമ്പം ഉപാദായ, പസ്സന്തോ പടികരിസ്സാമീ’’തി.

നവേനാപി ‘‘അഹം, ഭന്തേ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ, വദതു മം ആയസ്മാ അനുകമ്പം ഉപാദായ, പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ഭന്തേ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ, വദതു മം ആയസ്മാ അനുകമ്പം ഉപാദായ, പസ്സന്തോ പടികരിസ്സാമീ’’തി.

൪൪൮. പുബ്ബകിച്ചം സമാപേത്വാ, അധിട്ഠേയ്യേവമേകകോ. ‘‘അജ്ജ മേ പവാരണാ ചാതുദ്ദസീതി വാ പന്നരസീതി വാ അധിട്ഠാമീ’’തി വത്തബ്ബം.

൪൪൯. യസ്മിം വസന്തി വാ പഞ്ച, ചത്താരോ വാ തയോ ദുവേ;

പവാരണം ഹരിത്വാന, ഏകേകസ്സിതരീതരേ.

൪൫൦. തം തം പവാരണം കയിരും,

സിയാ ആപത്തി ദുക്കടം;

സേസാ ഉപോസഥേ വുത്താ,

ഗാഥായോ ചേത്ഥ ആഹരേ.

൪൫൧. പവാരിതേവ സങ്ഘമ്ഹി, പാരിസുദ്ധിഉപോസഥം;

കരേയ്യ ഛിന്നവസ്സോ വാ, അവുത്ഥോ വാനുപഗതോ.

൪൫൨. ചാതുമാസിനിയാ ചാപി, കതേ സങ്ഘേനുപോസഥേ;

വുത്ഥവസ്സാ പവാരേയ്യും, സചേ അപ്പതരാ സിയുന്തി.