൪൩. ഛന്ദദാനനിദ്ദേസോ

ഛന്ദദാനാദീതി –

൩൯൯. ഭേരിം ഘണ്ടിം പതാളേത്വാ, കമ്മപ്പത്തേ സമാഗതേ;

സങ്ഘേ ഹരേയ്യ ഛന്ദം വാ, പാരിസുദ്ധിം പവാരണം.

൪൦൦. ഏകം ഭിക്ഖും ഉപഗ്ഗമ്മ, നിസീദിത്വാ ഉക്കുടികം;

അഞ്ജലിം പഗ്ഗണ്ഹിത്വാന, ദദേ ഛന്ദം വിചക്ഖണോ.

൪൦൧. (ക) ‘‘ഛന്ദം ദമ്മി, ഛന്ദം മേ ഹര, ഛന്ദം മേ ആരോചേഹീ’’തി വത്തബ്ബം.

(ഖ) പാരിസുദ്ധിം ദേന്തേന ‘‘പാരിസുദ്ധിം ദമ്മി, പാരിസുദ്ധിം മേ ഹര, പാരിസുദ്ധിം മേ ആരോചേഹീ’’തി വത്തബ്ബം.

൪൦൨. പാരിസുദ്ധിപ്പദാനേന, സമ്പാദേതി ഉപോസഥം;

സങ്ഘസ്സ അത്തനോ ചാപി, സേസകമ്മം വിബാധതി.

൪൦൩. ഛന്ദദാനേന സങ്ഘസ്സ, ദ്വയം സാധേതി നത്തനോ;

തസ്മാ ഛന്ദം ദദന്തേന, ദാതബ്ബാ പാരിസുദ്ധിപി.

൪൦൪. ഹരേയ്യേകോ ബഹൂനമ്പി, പരമ്പരാ ന ഹാരയേ;

പരമ്പരാഹടാ ഛന്ദ-പാരിസുദ്ധി ന ഗച്ഛതി.

൪൦൫. സബ്ബൂപചാരം കത്വാന, ഏവം ദേയ്യാ പവാരണാ. ‘‘പവാരണം ദമ്മി, പവാരണം മേ ഹര, പവാരണം മേ ആരോചേഹി, മമത്ഥായ പവാരേഹീ’’തി.

൪൦൬. ആരോചേത്വാഥ സോ സങ്ഘം, പവാരേയ്യേവമാഗതോ. ‘‘ഇത്ഥന്നാമോ, ഭന്തേ, സങ്ഘം പവാരേതി ദിട്ഠേന വാ സുതേന വാ പരിസങ്കായ വാ, വദതു തം സങ്ഘോ അനുകമ്പം ഉപാദായ, പസ്സന്തോ പടികരിസ്സതീ’’തി.

൪൦൭. ഗഹേത്വാ പാരിസുദ്ധിം വാ, ഛന്ദം വാപി പവാരണം;

ഹാരകോ സങ്ഘമപ്പത്വാ, വിബ്ഭമേയ്യ മരേയ്യ വാ.

൪൦൮. സാമണേരാദിഭാവം വാ,

പടിജാനേയ്യ നാഹടാ;

പത്വാ സങ്ഘം തഥാ ഹേയ്യ,

ആഹടാ ഹോതി ഹാരകോ.

൪൦൯. സങ്ഘപ്പത്തോ പമത്തോ വാ, സുത്തോ നാരോചയേയ്യ വാ;

അനാപത്തിവ സഞ്ചിച്ച, നാരോചേന്തസ്സ ദുക്കടന്തി.