൪൨. ദേസനാനിദ്ദേസോ
ദേസനാതി –
൩൮൨. ചാഗോ യോ ഭിക്ഖുഭാവസ്സ, സാ പാരാജികദേസനാ;
യഥാവുത്തേന വുട്ഠാനം, ഗരുകാപത്തിദേസനാ.
൩൮൩. ഉക്കുടികം നിസീദിത്വാ, പഗ്ഗണ്ഹിത്വാന അഞ്ജലിം;
ഥുല്ലച്ചയാദിം ദേസേയ്യ, ഏവമേകസ്സ സന്തികേ.
൩൮൪. ‘‘അഹം, ഭന്തേ, ഏകം ഥുല്ലച്ചയാപത്തിം ആപജ്ജിം, തം തുമ്ഹമൂലേ പടിദേസേമീ’’തി വത്വാ തേന ‘‘പസ്സസി, ആവുസോ, തം ആപത്തി’’ന്തി വുത്തേ ‘‘ആമ, ഭന്തേ, പസ്സാമീ’’തി വത്വാ പുന തേന ‘‘ആയതിം, ആവുസോ, സംവരേയ്യാസീ’’തി വുത്തേ ‘‘സാധു സുട്ഠു, ഭന്തേ, സംവരിസ്സാമീ’’തി വത്തബ്ബം. ‘‘അഹം, ഭന്തേ, ദ്വേ ഥുല്ലച്ചയാപത്തിയോ ആപജ്ജിം, അഹം ഭന്തേ സമ്ബഹുലാ ഥുല്ലച്ചയാപത്തിയോ ആപജ്ജിം, താ തുമ്ഹമൂലേ പടിദേസേമീ’’തി വത്തബ്ബം.
നിസ്സഗ്ഗിയേസു പന ‘‘ഇദം മേ, ഭന്തേ, ചീവരം ദസാഹാതിക്കന്തം നിസ്സഗ്ഗിയം, ഇമാഹം ആയസ്മതോ നിസ്സജ്ജാമീ’’തി. ‘‘ഇമാനി മേ, ഭന്തേ, ചീവരാനി…പേ… ഏതം മേ, ഭന്തേ, ചീവരം…പേ… ഏതാനി മേ, ഭന്തേ, ചീവരാനി ദസാഹാതിക്കന്താനി നിസ്സഗ്ഗിയാനി, ഏതാനാഹം ആയസ്മതോ നിസ്സജ്ജാമീ’’തി.
൩൮൫. നിസ്സജ്ജിത്വാന ദേസേയ്യ, ആപത്തിം തേന ഭിക്ഖുനാ;
പടിഗ്ഗഹേത്വാ ആപത്തിം, ദേയ്യം നിസ്സട്ഠചീവരം.
‘‘ഇമം, ഇമാനി, ഏതം, ഏതാനി ചീവരാനി ആയസ്മതോ ദമ്മീ’’തി.
൩൮൬. (ക) ഇദം മേ, ഭന്തേ, ചീവരം രത്തിവിപ്പവുത്ഥം അഞ്ഞത്ര ഭിക്ഖുസമ്മുതിയാ നിസ്സഗ്ഗിയം.
(ഖ) ഇദം മേ, ഭന്തേ, അകാലചീവരം മാസാതിക്കന്തം നിസ്സഗ്ഗിയം.
(ഗ) ഇദം മേ, ഭന്തേ, പുരാണചീവരം അഞ്ഞാതികായ ഭിക്ഖുനിയാ ധോവാപിതം നിസ്സഗ്ഗിയം.
(ഘ) ഇദം മേ, ഭന്തേ, ചീവരം അഞ്ഞാതികായ ഭിക്ഖുനിയാ ഹത്ഥതോ പടിഗ്ഗഹിതം അഞ്ഞത്ര പാരിവത്തകാ നിസ്സഗ്ഗിയം.
(ങ) ഇദം മേ, ഭന്തേ, ചീവരം അഞ്ഞാതകം ഗഹപതികം അഞ്ഞത്ര സമയാ വിഞ്ഞാപിതം നിസ്സഗ്ഗിയം.
(ച) ഇദം മേ, ഭന്തേ, ചീവരം അഞ്ഞാതകം ഗഹപതികം തതുത്തരി വിഞ്ഞാപിതം നിസ്സഗ്ഗിയം.
(ഛ) ഇദം മേ, ഭന്തേ, ചീവരം പുബ്ബേ അപ്പവാരിതോ അഞ്ഞാതകം ഗഹപതികം ഉപസങ്കമിത്വാ വികപ്പം ആപന്നം നിസ്സഗ്ഗിയം.
(ജ) ഇദം മേ, ഭന്തേ, ചീവരം പുബ്ബേ അപ്പവാരിതോ അഞ്ഞാതകേ ഗഹപതികേ ഉപസങ്കമിത്വാ വികപ്പം ആപന്നം നിസ്സഗ്ഗിയം.
(ഝ) ഇദം മേ, ഭന്തേ, ചീവരം അതിരേകതിക്ഖത്തും ചോദനായ അതിരേകഛക്ഖത്തും ഠാനേന അഭിനിപ്ഫാദിതം നിസ്സഗ്ഗിയം.
(ഞ) ഇദം മേ, ഭന്തേ, കോസിയമിസ്സകം സന്ഥതം കാരാപിതം നിസ്സഗ്ഗിയം.
(ട) ഇദം മേ, ഭന്തേ, സുദ്ധകാളകാനം ഏളകലോമാനം സന്ഥതം കാരാപിതം നിസ്സഗ്ഗിയം.
(ഠ) ഇദം മേ, ഭന്തേ, സന്ഥതം അനാദിയിത്വാ തുലം ഓദാതാനം തുലം ഗോചരിയാനം കാരാപിതം നിസ്സഗ്ഗിയം.
(ഡ) ഇദം മേ, ഭന്തേ, സന്ഥതം ഊനകഛബ്ബസ്സാനി കാരാപിതം അഞ്ഞത്ര ഭിക്ഖുസമ്മുതിയാ നിസ്സഗ്ഗിയം.
(ഢ) ഇദം മേ, ഭന്തേ, നിസീദനസന്ഥതം അനാദിയിത്വാ പുരാണസന്ഥതസ്സ സാമന്താ സുഗതവിദത്ഥിം കാരാപിതം നിസ്സഗ്ഗിയം.
(ണ) ഇമാനി മേ, ഭന്തേ, ഏളകലോമാനി തിയോജനപരമം അതിക്കാമിതാനി നിസ്സഗ്ഗിയാനി.
(ത) ഇമാനി മേ, ഭന്തേ, ഏളകലോമാനി അഞ്ഞാതികായ ഭിക്ഖുനിയാ ധോവാപിതാനി നിസ്സഗ്ഗിയാനി.
(ഥ) അഹം, ഭന്തേ, രൂപിയം പടിഗ്ഗഹേസിം, ഇദം മേ, ഭന്തേ, നിസ്സഗ്ഗിയം, ഇമാഹം സങ്ഘസ്സ നിസ്സജ്ജാമി.
(ദ) അഹം, ഭന്തേ, നാനപ്പകാരകം രൂപിയസംവോഹാരം സമാപജ്ജിം, ഇദം മേ, ഭന്തേ, നിസ്സഗ്ഗിയം, ഇമാഹം സങ്ഘസ്സ നിസ്സജ്ജാമീതി.
൩൮൭. നിസ്സജ്ജിത്വാന ആപത്തിം, ദേസേയ്യാഥ ഗിഹിം വദേ;
‘‘ജാനാഹിമ’’ന്തി ഇമിനാ, സോ വദേയ്യാഹരാമി കിം.
൩൮൮. അവത്വാമന്തി തേലാദിം, വദേ ഭിക്ഖൂന കപ്പിയം;
യം ആഹരതി സോ തേന, പരിവത്തേത്വാന കപ്പിയം.
൩൮൯. ലബ്ഭം ഠപേത്വാ ദ്വേപേതേ, സേസേഹി പരിഭുഞ്ജിതും;
തതോ അഞ്ഞേന ലദ്ധോപി, ഭാഗോ തേസം ന കപ്പതി.
൩൯൦. രുക്ഖച്ഛായാപ്യന്തമസോ, തന്നിബ്ബത്താ ന കപ്പതി;
നിസ്സട്ഠം പടിലദ്ധമ്പി, ആദിതോ സന്ഥതത്തയം.
൩൯൧. നോ ചേ ലഭേഥ ഏവം സോ, ഇമം ഛഡ്ഡേഹി സംസിയോ;
ഏവമ്പി ഭിക്ഖു ഛഡ്ഡേയ്യ, നോ ചേ ലഭേഥ സമ്മതോ.
൩൯൨. ഏതാനി ദുതിയോ പത്തോ, സങ്ഘേ സേസാനി ലബ്ഭരേ;
സങ്ഘേകസ്മിം ഗണേ വത്തും, ലബ്ഭം ഭാസന്തരേനപി.
൩൯൩. (ക) അഹം, ഭന്തേ, നാനപ്പകാരകം കയവിക്കയം സമാപജ്ജിം, ഇദം മേ, ഭന്തേ, നിസ്സഗ്ഗിയം.
(ഖ) അയം മേ, ഭന്തേ, പത്തോ ദസാഹാതിക്കന്തോ നിസ്സഗ്ഗിയോ.
(ഗ) അയം മേ, ഭന്തേ, പത്തോ ഊനപഞ്ചബന്ധനേന പത്തേന ചേതാപിതോ നിസ്സഗ്ഗിയോ, ഇമാഹം സങ്ഘസ്സ നിസ്സജ്ജാമീതി.
൩൯൪. നിസ്സജ്ജിത്വാന ദേസേയ്യ, ആപത്തിം പത്തഗാഹകം;
സമ്മന്നിത്വാന സങ്ഘസ്സ, പത്തന്തം തസ്സ ദാപയേ.
൩൯൫. (ക) ഇദം മേ, ഭന്തേ, ഭേസജ്ജം സത്താഹാതിക്കന്തം നിസ്സഗ്ഗിയം.
(ഖ) ഇദം മേ, ഭന്തേ, വസ്സികസാടികചീവരം അതിരേകമാസേ സേസേ ഗിമ്ഹാനേ പരിയിട്ഠം, അതിരേകഡ്ഢമാസേ സേസേ ഗിമ്ഹാനേ കത്വാ പരിദഹിതം നിസ്സഗ്ഗിയം.
(ഗ) ഇദം മേ, ഭന്തേ, ചീവരം ഭിക്ഖുസ്സ സാമം ദത്വാ അച്ഛിന്നം നിസ്സഗ്ഗിയം.
(ഘ) ഇദം മേ, ഭന്തേ, ചീവരം സാമം സുത്തം വിഞ്ഞാപേത്വാ തന്തവായേഹി വായാപിതം നിസ്സഗ്ഗിയം.
(ങ) ഇദം മേ, ഭന്തേ, ചീവരം പുബ്ബേ അപ്പവാരിതോ അഞ്ഞാതകസ്സ ഗഹപതികസ്സ തന്തവായേ ഉപസങ്കമിത്വാ വികപ്പം ആപന്നം നിസ്സഗ്ഗിയം.
(ച) ഇദം മേ, ഭന്തേ, അച്ചേകചീവരം ചീവരകാലസമയം അതിക്കാമിതം നിസ്സഗ്ഗിയം.
(ഛ) ഇദം മേ, ഭന്തേ, ചീവരം അതിരേകഛാരത്തം വിപ്പവുത്ഥം അഞ്ഞത്ര ഭിക്ഖുസമ്മുതിയാ നിസ്സഗ്ഗിയം.
(ജ) ഇദം മേ, ഭന്തേ, ജാനം സങ്ഘികം ലാഭം പരിണതം അത്തനോ പരിണാമിതം നിസ്സഗ്ഗിയം, ഇമാഹം ആയസ്മതോ നിസ്സജ്ജാമീതി.
൩൯൬. സേസം സബ്ബം യഥായോഗം, ആദിമ്ഹി വിയ യോജയേ.
൩൯൭. (ക) അഹം, ഭന്തേ, ഏകം പാചിത്തിയാപത്തിം ആപജ്ജിം. ദ്വേ സമ്ബഹുലാ പാചിത്തിയാപത്തിയോ ആപജ്ജിം.
(ഖ) ഗാരയ്ഹം, ഭന്തേ, ധമ്മം ആപജ്ജിം അസപ്പായം പാടിദേസനീയം, തം പടിദേസേമീതി. തേന ‘‘പസ്സസി, ആവുസോ, തം ധമ്മ’’ന്തി വത്തബ്ബം.
(ഗ) അഹം, ഭന്തേ, ഏകം ദുക്കടാപത്തിം ആപജ്ജിം. ദ്വേ സമ്ബഹുലാ ദുക്കടാപത്തിയോ ആപജ്ജിം.
(ഘ) അഹം, ഭന്തേ, ഏകം ദുബ്ഭാസിതാപത്തിം ആപജ്ജിം. ദ്വേ സമ്ബഹുലാ ദുബ്ഭാസിതാപത്തിയോ ആപജ്ജിം. താ തുമ്ഹമൂലേ പടിദേസേമീതി.
(ങ) ‘‘അഹം, ഭന്തേ, ദ്വേ നാനാവത്ഥുകാ ഥുല്ലച്ചയാപത്തിയോ ആപജ്ജിം. സമ്ബഹുലാ നാനാവത്ഥുകാ ഥുല്ലച്ചയാപത്തിയോ ആപജ്ജിം, താ തുമ്ഹമൂലേ പടിദേസേമീ’’തി വത്വാ തേന ‘‘പസ്സസി, ആവുസോ, താ ആപത്തിയോ’’തി വുത്തേ ‘‘ആമ, ഭന്തേ, പസ്സാമീ’’തി വത്വാ പുന തേന ‘‘ആയതിം, ആവുസോ, സംവരേയ്യാസീ’’തി വുത്തേ ‘‘സാധു സുട്ഠു, ഭന്തേ, സംവരിസ്സാമീ’’തി വത്തബ്ബം.
൩൯൮. അദേസനാഗാമിനിയം, അനാപത്തിഞ്ച ദേസിതം;
നാനാ സംവാസനിസ്സീമട്ഠിതാനം ചതുപഞ്ചഹി;
മനസാ പകതത്താനം, നാനേകാതി ന ദേസയേതി.