൩൮. കുലദൂസനനിദ്ദേസോ

ദൂസനന്തി –

൨൯൭. പുപ്ഫം വേളും ഫലം ചുണ്ണം, ദന്തകട്ഠഞ്ച മത്തികം;

സങ്ഗഹണത്ഥം ദദതോ, കുലദൂസനദുക്കടം.

൨൯൮. ഥുല്ലച്ചയം ഗരുഭണ്ഡം, ഇസ്സരേനേത്ഥ സങ്ഘികം;

ദേന്തസ്സ ദുക്കടാദീനി, ഥേയ്യാ സങ്ഘഞ്ഞ സന്തകം.

൨൯൯. കുലസങ്ഗഹാ രോപേതും, രോപാപേതുഞ്ച സബ്ബഥാ;

ഫലപുപ്ഫൂപഗം രുക്ഖം, ജഗ്ഗിതുഞ്ച ന വട്ടതി.

൩൦൦. നിമിത്തോഭാസതോ കപ്പവോഹാരപരിയായതോ;

അത്തനോ പരിഭോഗത്ഥം, രോപനാദീനി ലബ്ഭരേ.

൩൦൧. വുത്താവ വേജ്ജികാ ജങ്ഘപേസനേ ഗിഹികമ്മസു;

ഠപേത്വാ പിതരോ ഭണ്ഡും, വേയ്യാവച്ചകരം സകം.

൩൦൨. ദുക്കടം പദവാരേന, ഹരണേ ദൂതസാസനം;

സാസനം അഗ്ഗഹേത്വാപി, പഠമം വദതോ പുന.

൩൦൩. ഉപ്പന്നപച്ചയാ ഏവം, പഞ്ചന്നമ്പി അകപ്പിയാ;

അഭൂതാരോചനാരൂപ-സംവോഹാരുഗ്ഗഹാദിസാ.

൩൦൪. ഹരാപേത്വാ ഹരിത്വാപി, പിതൂനം സേസഞാതിനം;

പത്താനം വത്ഥുപൂജത്ഥം, ദാതും പുപ്ഫാനി ലബ്ഭതി;

മണ്ഡനത്ഥഞ്ച ലിങ്ഗാദി-പൂജത്ഥഞ്ച ന ലബ്ഭതി.

൩൦൫. തഥാ ഫലം ഗിലാനാനം, സമ്പത്തിസ്സരിയസ്സ ച;

പരിബ്ബയവിഹീനാനം, ദാതും സപരസന്തകം.

൩൦൬. ഭാജേന്തേ ഫലപുപ്ഫമ്ഹി, ദേയ്യം പത്തസ്സ കസ്സചി;

സമ്മതേനാപലോകേത്വാ, ദാതബ്ബമിതരേന തു.

൩൦൭. വിഹാരേ വാ പരിച്ഛിജ്ജ, കത്വാന കതികം തതോ;

ദേയ്യം യഥാപരിച്ഛേദം, ഗിലാനസ്സേതരസ്സ വാ;

യാചമാനസ്സ കതികം, വത്വാ രുക്ഖാവ ദസ്സിയാ.

൩൦൮. സിരീസകസവാദീനം, ചുണ്ണേ സേസേ ച നിച്ഛയോ;

യഥാവുത്തനയോ ഏവ, പണ്ണമ്പേത്ഥ പവേസയേതി.