൩൯. വസ്സൂപനായികനിദ്ദേസോ

വസ്സൂപനായികാ ചേവാതി –

൩൦൯. പുരിമികാ പച്ഛിമികാ, ദുവേ വസ്സൂപനായികാ;

തത്ഥാലയപരിഗ്ഗാഹോ, വചീഭേദോ ച ഏദിസോ.

൩൧൦. ‘‘ഇമസ്മിം വിഹാരേ ഇമം, തേമാസം വസ്സം ഉപേമി;

ഇധ വസ്സം ഉപേമീ’’തി, ചിത്തുപ്പാദേത്ഥ ആലയോ.

൩൧൧. നോപേതുകാമോ ആവാസം, തദഹൂതിക്കമേയ്യ വാ;

ഭവേയ്യ ദുക്കടാപത്തി, ജാനം വാനുപഗച്ഛതോ.

൩൧൨. ദുതിയം ഉപഗച്ഛേയ്യ, ഛിന്നവസ്സോനുപാഗതോ;

ന പക്കമേയ്യ തേമാസം, അവസിത്വാന ചാരികം.

൩൧൩. മാതാപിതൂനമത്ഥായ, പഞ്ചന്നം സഹധമ്മിനം;

ഗിലാനതദുപട്ഠാക-ഭത്തമേസിസ്സമോസധം.

൩൧൪. പുച്ഛിസ്സാമി ഉപട്ഠിസ്സം, ഗന്ത്വാനഭിരതം അഹം;

വൂപകാസിസ്സം കുക്കുച്ചം, ദിട്ഠിം ഗരുകമാദികം.

൩൧൫. കരിസ്സം വാപി കാരേസ്സം, വിനോദനം വിവേചനം;

വുട്ഠാനം വാപി ഉസ്സുക്കം, ഗന്തുമിച്ചേവമാദിനാ;

ലബ്ഭം സത്താഹകിച്ചേന, പഹിതാപഹിതേപി വാ.

൩൧൬. സങ്ഘകമ്മേ വജേ ധമ്മ-സ്സവനത്ഥം നിമന്തിതോ;

ഗരൂഹി പഹിതോ വാപി, ഗരൂനം വാപി പസ്സിതും.

൩൧൭. ന ഭണ്ഡധോവനുദ്ദേസ-ഞാതുപട്ഠാകദസ്സനേ;

ലബ്ഭം ന പാപുണേയ്യജ്ജേ-വാഗമിസ്സന്തുദൂരഗോ.

൩൧൮. സേസഞാതീഹി പഹിതേ, ഭിക്ഖുനിസ്സിതകേന ച;

ഉപാസകോപാസികാഹി, നിദ്ദിസിത്വാവ പേസിതേ.

൩൧൯. വസ്സച്ഛേദേ അനാപത്തി, അന്തരായേ സതത്തനോ;

സങ്ഘസാമഗ്ഗിയാ വാ നോ, ഛിന്നവസ്സോ പവാരയേ.

൩൨൦. അജ്ഝോകാസേ ച രുക്ഖസ്സ, സുസിരേ വിടപേപി വാ;

ഛവകുടിഛത്തചാടീ-സൂപഗന്തും ന വട്ടതി.

൩൨൧. അസേനാസനികേനാപി, ഉപഗന്തും ന ലബ്ഭതി;

പവാരേതുഞ്ച ലബ്ഭതി, നാവാസത്ഥവജൂപഗോതി.