൩൭. ഉഗ്ഗഹനിദ്ദേസോ

ഉഗ്ഗഹോതി –

൨൮൧. കമ്മചേതിയസങ്ഘഞ്ഞ-പുഗ്ഗലത്ഥം ഗണസ്സ ച;

ദസഭേദമ്പി രതനം, ഉഗ്ഗണ്ഹന്തസ്സ ദുക്കടം.

൨൮൨. നിസ്സഗ്ഗി തേസു അത്തത്ഥം, ദ്വീസു സേസേസു ദുക്കടം;

അനാമസിത്വാ വുത്തേ തു, ഗണം സങ്ഘഞ്ച പുഗ്ഗലം.

൨൮൩. ‘‘ചേത്യസ്സ നവകമ്മസ്സ, ദമ്മീ’’തി ന പടിക്ഖിപേ;

വദേ കപ്പിയകാരാനം, ‘‘വദന്തേവമിമേ’’ ഇതി.

൨൮൪. ഖേത്തം വത്ഥും തളാകം വാ, ദേന്തേ ദാസപസ്വാദികം;

പടിക്ഖിപിത്വാ ഗണ്ഹേയ്യ, കപ്പിയേന കമേന ച;

ഖേത്താദീനി വിഹാരസ്സ, വുത്തേ ദമ്മീതി വട്ടതി.

൨൮൫. നവമാതികകേദാര-തളാകകിരിയാനവേ;

മത്തികുദ്ധരണം ബന്ധോ, ഥിരകാരോ ച ആളിയാ.

൨൮൬. തിരേകഭാഗഗഹണം, കേദാരേ അനവേ നവേ;

അപരിച്ഛന്നഭാഗേ ച, സസ്സേ ‘‘ദേഥേത്തകേ’’ ഇതി;

കഹാപണുട്ഠാപനഞ്ച, സബ്ബേസമ്പി അകപ്പിയം.

൨൮൭. അവത്വാ കസ വപ്പിച്ചാദേത്തികായ ച ഭൂമിയാ;

പതിട്ഠാപേതി ഭൂമിം വാ, ഭാഗോ ദേയ്യോതി ഏത്തകോ.

൨൮൮. ഭൂമിഭാഗേ കതം സസ്സം, ഏത്തകേ ഗണ്ഹഥേത്തകം;

ഗണ്ഹനത്ഥം വദന്തേവം, പമാണം ദണ്ഡരജ്ജുഭി.

൨൮൯. മിനനേ രക്ഖണേ ഠത്വാ, ഖലേ തംനീഹരാപനേ;

കോട്ഠാദിപടിസാമനേ, തസ്സേവേതമകപ്പിയം.

൨൯൦. പടിസാമേയ്യ പാചിത്തി, യം കിഞ്ചി ഗിഹിസന്തകം;

ഭണ്ഡാഗാരികസീസേന, സചേപി പിതുസന്തകം.

൨൯൧. പിതൂനം കപ്പിയം വത്ഥും, അവസ്സം പടിസാമിയം;

അത്തനോ സന്തകം കത്വാ, ലബ്ഭതേ പടിസാമിതും.

൨൯൨. ദേഹീതി പടിസാമേത്വാ, വുത്തേ ചാപി പടിക്ഖിപേ;

പാതേത്വാന ഗതേ ലബ്ഭം, പലിബോധോതി ഗോപിതും.

൨൯൩. കമ്മം കരോന്തോ ആരാമേ, സകം വഡ്ഢകിആദയോ;

പരിക്ഖാരഞ്ച സയന-ഭണ്ഡം വാ രാജവല്ലഭാ.

൨൯൪. ദേഹീതി പടിസാമേത്വാ, വദന്തി യദി ഛന്ദതോ;

ന കരേയ്യ ഭയാ ഠാനം, ഗുത്തം ദസ്സേതു വട്ടതി.

൨൯൫. ബലക്കാരേന പാതേത്വാ, ഗതേസു പടിസാമിതും;

ഭിക്ഖും മനുസ്സാ സങ്കന്തി, നട്ഠേ വത്ഥുമ്ഹി താദിസേ.

൨൯൬. വിഹാരാവസഥസ്സന്തോ, രതനം രത്നസമ്മതം;

നിക്ഖിപേയ്യ ഗഹേത്വാന, മഗ്ഗേരഞ്ഞേപി താദിസേ;

സാമികാനാഗമം ഞത്വാ, പതിരൂപം കരീയതീതി.