൩൧. വികപ്പനാനിദ്ദേസോ

വികപ്പനാ ചേവാതി –

൨൨൧. സമ്മുഖാ പരമ്മുഖാതി, ദുവേ വുത്താ വികപ്പനാ;

സമ്മുഖായ വികപ്പേന്തോ, ബ്യത്തസ്സേകസ്സ സന്തികേ;

‘‘ഇമം ചീവരം തുയ്ഹം, വികപ്പേമീ’’തി ഭാസയേ.

൨൨൨. ഏത്താവതാ നിധേതുംവ, കപ്പതീ ന ച കപ്പതി;

പരിഭോഗാദികം തേന, അപ്പച്ചുദ്ധടഭാവതോ.

൨൨൩. ‘‘മയ്ഹം സന്തകം പരിഭുഞ്ജ വാ വിസ്സജ്ജേഹി വാ യഥാപച്ചയം വാ കരോഹീ’’തി –

തേന പച്ചുദ്ധടേയേവ, പരിഭോഗാദി കപ്പതി.

൨൨൪. അപരാ സമ്മുഖാവേകാ, ഭിക്ഖുസ്സേകസ്സ സന്തികേ;

ഗഹേത്വാ നാമമേകസ്സ, പഞ്ചന്നം സഹധമ്മിനം.

൨൨൫. ‘‘ഇമം ചീവരം തിസ്സസ്സ ഭിക്ഖുനോ, തിസ്സായ ഭിക്ഖുനിയാ, തിസ്സസ്സ സാമണേരസ്സ, തിസ്സായ സാമണേരിയാ, തിസ്സായ സിക്ഖമാനായ വികപ്പേമീ’’തി വത്തബ്ബം.

തേന ഭിക്ഖുനാ ‘‘തിസ്സസ്സ ഭിക്ഖുനോ, തിസ്സായ ഭിക്ഖുനിയാ, തിസ്സസ്സ സാമണേരസ്സ, തിസ്സായ സാമണേരിയാ, തിസ്സായ സിക്ഖമാനായ സന്തകം പരിഭുഞ്ജ വാ വിസ്സജ്ജേഹി വാ യഥാപച്ചയം വാ കരോഹീ’’തി വത്തബ്ബം.

൨൨൬. പരമ്മുഖാവികപ്പനേ-കസ്സന്തികേവമീരയേ;

‘‘ഇമം ചീവരം തുയ്ഹം വികപ്പനത്ഥായ ദമ്മീ’’തി.

൨൨൭. തേന വത്തബ്ബോ ‘‘കോ തേ മിത്തോ വാ സന്ദിട്ഠോ വാ’’തി. ഇതരേന ചേവം വത്തബ്ബം ‘‘തിസ്സോ ഭിക്ഖൂ’’തി വാ ‘‘തിസ്സാ ഭിക്ഖുനീ’’തി വാ ‘‘തിസ്സോ സാമണേരോ’’തി വാ ‘‘തിസ്സാ സാമണേരീ’’തി വാ ‘‘തിസ്സാ സിക്ഖമാനാ’’തി വാ.

പുന തേന ‘‘അഹം തിസ്സസ്സ തിസ്സായ വാ ദമ്മീ’’തി വികപ്പേത്വാ തേനേവ ‘‘തിസ്സസ്സ ഭിക്ഖുനോ, തിസ്സായ ഭിക്ഖുനിയാ, തിസ്സസ്സ സാമണേരസ്സ, തിസ്സായ സാമണേരിയാ, തിസ്സായ സിക്ഖമാനായ സന്തകം പരിഭുഞ്ജ വാ വിസ്സജ്ജേഹി വാ യഥാപച്ചയം വാ കരോഹീ’’തി പച്ചുദ്ധരിതബ്ബം.

൨൨൮. ദൂരസന്തികത്തേകത്തബഹുഭാവം വിജാനിയ;

‘‘ഏതം ഇമ’’ന്തി ‘‘ഏതാനി, ഇമാനീ’’തേത്ഥ യോജയേ.

൨൨൯. ദസാഹം മാസമേകം വാ, പഞ്ച വാ കഥിനത്ഥതേ;

പാരിപൂരത്ഥമൂനസ്സ, പച്ചാസാ സതി മാസകം;

നുപ്പാദയതി നിസ്സഗ്ഗിം, നാധിട്ഠിതവികപ്പിതന്തി.