൩൦. വത്തനിദ്ദേസോ

വത്തന്തി –

൨൧൩. ആഗന്തുകോ ന ആരാമം, പവിസേ സഉപാഹനോ;

സഛത്തോഗുണ്ഠിതോ സീസേ, കരിത്വാ വാപി ചീവരം.

൨൧൪. പാനീയേന ന ധോവേയ്യ, പാദേ വുഡ്ഢതരേപി ച;

ആവാസികേഭിവാദേയ്യ, പുച്ഛേയ്യ സയനാസനം.

൨൧൫. ഗമികോ പടിസാമേത്വാ, ദാരുമത്തികഭണ്ഡകം;

വിഹാരഞ്ച ഥകേത്വാന, ആപുച്ഛ സയനാസനം.

൨൧൬. ആപുച്ഛിതബ്ബേ അസതി, സംഗോപേത്വാന സാധുകം;

പക്കമേയ്യഞ്ഞഥാ തസ്സ, പക്കന്തും ന ച കപ്പതി.

൨൧൭. ആവാസികോ പഞ്ഞാപേയ്യ, വുഡ്ഢാഗന്തുസ്സ ആസനം;

ഉപനിക്ഖിപേ പാദോദ-പ്പഭുതിം പത്തചീവരം.

൨൧൮. പച്ചുഗ്ഗന്ത്വാന ഗണ്ഹേയ്യ, പാനീയേന ച പുച്ഛയേ;

ആഗന്തുകേഭിവാദേയ്യ, പഞ്ഞപേ സയനാസനം.

൨൧൯. അജ്ഝാവുത്ഥമവുത്ഥം വാ, ഗോചരാഗോചരം വദേ;

വച്ചപസ്സാവഠാനാനി, കതികം സേക്ഖസമ്മുതിം.

൨൨൦. പവേസനിക്ഖമേ കാലം, പരിഭോജിയപാനിയം;

നിസിന്നോവ നവകസ്സ, ഏതം സബ്ബം സമുദ്ദിസേതി.