൧൫. ഉപജ്ഝാചരിയവത്തനിദ്ദേസോ

ഉപജ്ഝാചരിയവത്താനീതി –

൧൪൫. നിസ്സായുപജ്ഝാചരിയേ, വസമാനോ സുപേസലോ;

ദന്തകട്ഠാസനം തോയം, യാഗും കാലേ ദദേ സദാ.

൧൪൬. പത്തേ വത്തം ചരേ ഗാമ-പ്പവേസേ ഗമനാഗമേ;

ആസനേ പാദപീഠേ ച, കഥലോപാഹനചീവരേ.

൧൪൭. പരിഭോജനീയപാനീയ-വച്ചപ്പസ്സാവഠാനിസു;

വിഹാരസോധനേ വത്തം, പുന പഞ്ഞാപനേ തഥാ.

൧൪൮. ന പപ്ഫോടേയ്യ സോധേന്തോ, പടിവാതേ ച സങ്ഗണേ;

വിഹാരം ഭിക്ഖു പാനീയ-സാമന്താ സയനാസനം.

൧൪൯. ന്ഹാനേ ന്ഹാതസ്സ കാതബ്ബേ, രങ്ഗപാകേ ച ധോവനേ;

സിബ്ബനേ ചീവരേ ഥേവേ, രജന്തോ ന വജേ ഠിതേ.

൧൫൦. ഏകച്ചസ്സ അനാപുച്ഛാ, പത്തം വാ ചീവരാനി വാ;

ന ദദേയ്യ ന ഗണ്ഹേയ്യ, പരിക്ഖാരഞ്ച കിഞ്ചനം.

൧൫൧. ഏകച്ചം പച്ഛതോ കാതും, ഗന്തും വാ തസ്സ പച്ഛതോ;

പിണ്ഡപാതഞ്ച നിന്നേതും, നീഹരാപേതുമത്തനോ.

൧൫൨. കിച്ചയം പരികമ്മം വാ, കേസച്ഛേദഞ്ച അത്തനോ;

കാരാപേതും വ കാതും വാ, അനാപുച്ഛാ ന വട്ടതി.

൧൫൩. ഗാമം സുസാനം നിസ്സീമം, ദിസം വാ ഗന്തുമിച്ഛതോ;

അത്തനോ കിച്ചയം വാപി, അനാപുച്ഛാ ന വട്ടതി.

൧൫൪. ഉപ്പന്നം അരതിം ദിട്ഠിം, കുക്കുച്ചം വാ വിനോദയേ;

കരേയ്യ വാപി ഉസ്സുക്കം, സങ്ഘായത്തേസു കമ്മസു.

൧൫൫. ഗിലാനേസു ഉപട്ഠേയ്യ, വുട്ഠാനം നേസമാഗമേ;

വത്തഭേദേന സബ്ബത്ഥ, അനാദരേന ദുക്കടന്തി.