൧൬. വച്ചപസ്സാവട്ഠാനികനിദ്ദേസോ

വച്ചപസ്സാവട്ഠാനികന്തി –

൧൫൬. ന കരേയ്യ യഥാവുഡ്ഢം, വച്ചം യാതാനുപുബ്ബിയാ;

വച്ചപസ്സാവകുടിയോ, ന്ഹാനതിത്ഥഞ്ച ലബ്ഭതി.

൧൫൭. പവിസേയ്യുബ്ഭജിത്വാ നോ, സഹസാ പവിസേയ്യ ച;

ഉക്കാസിത്വാവുബ്ഭജേയ്യ, പാദുകാസ്വേവ സണ്ഠിതോ.

൧൫൮. ന കരേ നിത്ഥുനം വച്ചം, ദന്തകട്ഠഞ്ച ഖാദയം;

വച്ചപസ്സാവദോണീനം, ന കരേയ്യുഭയം ബഹി.

൧൫൯. കൂപേ കട്ഠം ന പാതേയ്യ, ഖേളം പസ്സാവദോണിയാ;

നാവലേഖേയ്യ ഫരുസേ-നുഹതഞ്ചാപി ധോവയേ.

൧൬൦. ന നിക്ഖമേയ്യ സഹസാ-വുബ്ഭജിത്വാ ന നിക്ഖമേ;

ചപു ചപു നാചമേയ്യ, ഉക്ലാപഞ്ച വിസോധയേതി.