൧. പാരാജികനിദ്ദേസോ

പാരാജികാ ച ചത്താരോതി –

൧. മഗ്ഗത്തയേ അനിക്ഖിത്തസിക്ഖോ സന്ഥതസന്ഥതേ;

അല്ലോകാസേ നിമിത്തം സം, തിലമത്തമ്പി സന്ഥതം.

൨. അസന്ഥതമുപാദിണ്ണം, പവേസന്തോ ചുതോഥ വാ;

പവേസനട്ഠിതുദ്ധാരപവിട്ഠക്ഖണസാദകോ.

൩. ആദിയേയ്യ ഹരേയ്യാവഹരേയ്യ ഇരിയാപഥം;

കോപേയ്യ ഠാനാ ചാവേയ്യ, സങ്കേതം വീതിനാമയേ.

൪. അദിന്നം ഥേയ്യചിത്തേന, ഭവേ പാരാജികോഥ വാ;

ഥേയ്യാബലകുസച്ഛന്നപരികപ്പാവഹാരകോ;

ഭണ്ഡകാലഗ്ഘദേസേഹി, പരിഭോഗേത്ഥ നിച്ഛയോ.

൫. മനുസ്സവിഗ്ഗഹം ചിച്ച, ജീവിതാ വാ വിയോജയേ;

സത്ഥഹാരകം വാസ്സ മരണചേതനോ ഉപനിക്ഖിപേ.

൬. ഗാഹേയ്യ മരണൂപായം, വദേയ്യ മരണേ ഗുണം;

ചുതോ പയോഗാ സാഹത്ഥിനിസ്സഗ്ഗാണത്തിഥാവരാ.

൭. ഇദ്ധിവിജ്ജാമയാ കാലവത്ഥാവുധിരിയാപഥാ;

ക്രിയാവിസേസോ ഓകാസോ, ഛ ആണത്തിനിയാമകാ.

൮. ഝാനാദിഭേദ നോസന്തമത്തനത്തുപനായികം;

കത്വാ കോട്ഠാസമേകേകം, പച്ചുപ്പന്നഭവസ്സിതം.

൯. അഞ്ഞാപദേസരഹിതം, ദീപേന്തോനധിമാനികോ;

കായേന വാചാ വിഞ്ഞത്തി-പഥേ ഞാതേ ചുതോ ഭവേ.

൧൦. പാരാജികേതേ ചത്താരോ, അസംവാസാ യഥാ പുരേ;

അഭബ്ബാ ഭിക്ഖുഭാവായ, സീസച്ഛിന്നോവ ജീവിതും.

൧൧. പരിയായോ ച ആണത്തി, തതിയേ ദുതിയേ പന;

ആണത്തിയേവ സേസേസു, ദ്വയമേതം ന ലബ്ഭതി.

൧൨. സേവേതുകാമതാചിത്തം, മഗ്ഗേ മഗ്ഗപ്പവേസനം;

ഇമം മേഥുനധമ്മസ്സ, ആഹു അങ്ഗദ്വയം ബുധാ.

൧൩. മനുസ്സസം തഥാസഞ്ഞീ, ഥേയ്യചിത്തഞ്ച വത്ഥുനോ;

ഗരുതാ അവഹാരോ ച, അദിന്നാദാനഹേതുയോ.

൧൪. പാണോ മാനുസ്സകോ പാണ-സഞ്ഞിതാ ഘാതചേതനാ;

പയോഗോ തേന മരണം, പഞ്ചേതേ വധഹേതുയോ.

൧൫. അസന്തതാ അത്തനി പാപമിച്ഛതാ-

യാരോചനാ തസ്സ മനുസ്സജാതിതാ;

നാഞ്ഞാപദേസോ ച തദേവ ജാനനം,

പഞ്ചേത്ഥ അങ്ഗാനി അസന്തദീപനേ.

൧൬. അസാധാരണാ ചത്താരോ, ഭിക്ഖുനീനമഭബ്ബകാ;

ഏകാദസ ച വിബ്ഭന്താ, ഭിക്ഖുനീ മുദുപിട്ഠികോ.

൧൭. ലമ്ബീ മുഖേന ഗണ്ഹന്തോ, അങ്ഗജാതം പരസ്സ ച;

തത്ഥേവാഭിനിസീദന്തോ, ചത്താരോ അനുലോമികാ.

൧൮. മഗ്ഗേ മഗ്ഗപ്പവേസനാ, മേഥുനസ്സ ഇധാഗതാ;

ചത്താരോതി ചതുബ്ബീസ, സമോധാനാ പരാജികാതി.