൨. സങ്ഘാദിസേസനിദ്ദേസോ

ഗരുകാ നവാതി –

൧൯. മോചേതുകാമതാ സുക്ക-സ്സുപക്കമ്മ വിമോചയം;

അഞ്ഞത്ര സുപിനന്തേന, സമണോ ഗരുകം ഫുസേ.

൨൦. ഇത്ഥിസഞ്ഞീ മനുസ്സിത്ഥിം, കായസംസഗ്ഗരാഗവാ;

സമ്ഫുസന്തോ ഉപക്കമ്മ, സമണോ ഗരുകം ഫുസേ.

൨൧. തഥാ സുണന്തിം വിഞ്ഞുഞ്ച, മഗ്ഗം വാരബ്ഭ മേഥുനം;

ദുട്ഠുല്ലവാചാരാഗേന, ഓഭാസേത്വാ ഗരും ഫുസേ.

൨൨. വത്വാത്തകാമുപട്ഠാന-വണ്ണം മേഥുനരാഗിനോ;

വാചാ മേഥുനയുത്തേന, ഗരും മേഥുനയാചനേ.

൨൩. പടിഗ്ഗഹേത്വാ സന്ദേസം, ഇത്ഥിയാ പുരിസസ്സ വാ;

വീമംസിത്വാ ഹരം പച്ചാ, സമണോ ഗരുകം ഫുസേ.

൨൪. സംയാചിതപരിക്ഖാരം, കത്വാദേസിതവത്ഥുകം;

കുടിം പമാണാതിക്കന്തം, അത്തുദ്ദേസം ഗരും ഫുസേ.

൨൫. മഹല്ലകം വിഹാരം വാ, കത്വാദേസിതവത്ഥുകം;

അത്തനോ വസനത്ഥായ, സമണോ ഗരുകം ഫുസേ.

൨൬. അമൂലകേന ചോദേന്തോ, ചോദാപേന്തോവ വത്ഥുനാ;

അന്തിമേന ച ചാവേതും, സുണമാനം ഗരും ഫുസേ.

൨൭. അഞ്ഞസ്സ കിരിയം ദിസ്വാ, തേന ലേസേന ചോദയം;

വത്ഥുനാ അന്തിമേനാഞ്ഞം, ചാവേതും ഗരുകം ഫുസേ.

൨൮. ഛാദേതി ജാനമാപന്നം, പരിവസേയ്യ താവതാ;

ചരേയ്യ സങ്ഘേ മാനത്തം, പരിവുത്ഥോ ഛ രത്തിയോ.

ചിണ്ണമാനത്തമബ്ഭേയ്യ, തം സങ്ഘോ വീസതീഗണോ.

൨൯. ആപത്തിനുക്ഖിത്തമനന്തരായ

പഹുത്തതായോ തഥസഞ്ഞിതാ ച;

ഛാദേതുകാമോ അഥ ഛാദനാതി,

ഛന്നാ ദസങ്ഗേഹ്യരുണുഗ്ഗമമ്ഹീതി.