൪. ചതുത്ഥപാരാജികവണ്ണനാ

ഇധേവ സങ്ഗഹന്തി ‘‘ഇതി ജാനാമി, ഇതി പസ്സാമീ’’തി പദേ കഥന്തി ചേ, ‘‘ഇതി ജാനാമീ’’തിആദിമാഹ. കേവലം ‘‘പാപിച്ഛതായാ’’തി (കങ്ഖാ. അട്ഠ. ചതുത്ഥപാരാജികവണ്ണനാ) വചനതോ മന്ദത്താ മോമൂഹത്താ സമുദാചരന്തസ്സ അനാപത്തീതി ദീപിതം. ‘‘അതീതകാലേ സോതാപന്നോമ്ഹീ’’തി വദന്തോ പരിയായേന വദതി, ‘‘യോ തേ വിഹാരേ വസതി, സോ ഭിക്ഖു അരഹാ’’തിആദീസു (പരി. ൧൬൫) വിയ സിക്ഖാപദേപി ‘‘ഇതി ജാനാമീ’’തി (പാരാ. ൧൯൫, ൧൯൭) പച്ചുപ്പന്നമേവ വുത്തം.

ചതുത്ഥപാരാജികവണ്ണനാ നിട്ഠിതാ.

മാതുഘാതകപിതുഘാതകഅരഹന്തഘാതകാ തതിയപാരാജികം ആപന്നാ, ഭിക്ഖുനിദൂസകോ, ലമ്ബീആദയോ ച ചത്താരോ പഠമപാരാജികം ആപന്നാ ഏവാതി കത്വാ കുതോ ചതുവീസതീതി ചേ? ന, അധിപ്പായാജാനനതോ. മാതുഘാതകാദയോ ഹി ചത്താരോ ഇധാനുപസമ്പന്നാ ഏവ അധിപ്പേതാ, ലമ്ബീആദയോ ചത്താരോ കിഞ്ചാപി പഠമപാരാജികേന സങ്ഗഹിതാ, യസ്മാ പന ഏകേന പരിയായേന മേഥുനധമ്മം പടിസേവിനോ ഹോന്തി, തസ്മാ വിസും വുത്താ. ന ലഭതി ഭിക്ഖൂഹീതി ഏത്ഥ ‘‘ഉപോസഥാദിഭേദം സംവാസ’’ന്തി ഏത്തകം വുത്തം. വിനയട്ഠകഥായം ‘‘ഉപോസഥപ്പവാരണാപാതിമോക്ഖുദ്ദേസസങ്ഘകമ്മപ്പഭേദ’’ന്തി വുത്തം. പാളിയം ‘‘സംവാസോ നാമ ഏകകമ്മം ഏകുദ്ദേസോ സമസിക്ഖതാ’’തി (പാരാ. ൫൫, ൯൨, ൧൭൨, ൧൯൮) വുത്തം. തിവിധേനാപി സങ്ഘകമ്മം കാതും ന വട്ടതീതി പടിക്ഖിത്തം. ‘‘ന, ഭിക്ഖവേ, ഗഹട്ഠേന നിസിന്നപരിസായ പാതിമോക്ഖം ഉദ്ദിസിതബ്ബ’’ന്തിആദി (മഹാവ. ൧൫൪) പാതിമോക്ഖപ്പവാരണാസു ഏവ ആഗതം, അഞ്ഞേസു ച ഏവരൂപേസു ഠാനേസു സേസം കമ്മം കാതും നത്ഥി പടിക്ഖേപോ. ആചരിയാപി ‘‘സേസം കമ്മം കാതും വട്ടതി, നത്ഥി ആപത്തീ’’തി വദന്തി. ‘‘അന്തിമവത്ഥു അജ്ഝാപന്നം അമൂലകേന പാരാജികേന ചോദേന്തസ്സ സങ്ഘാദിസേസോ, സങ്ഘാദിസേസേന ചോദേന്തസ്സ പാചിത്തിയന്തി ഭിക്ഖുനോ വിയ വുത്തം, ന അനുപസമ്പന്നസ്സ വിയ ദുക്കടം. തസ്മാ തേന സഹസേയ്യാ, തസ്സ പടിഗ്ഗഹണഞ്ച ഭിക്ഖുസ്സ വട്ടതീതി ആചരിയാ വദന്തീ’’തി ലിഖിതം. ‘‘യഥാ പുരേ തഥാ പച്ഛാതി ‘ഏകകമ്മം ഏകുദ്ദേസോ സമസിക്ഖതാ’തി ഏവം വുത്തസംവാസസ്സ അഭബ്ബതാമത്തം സന്ധായ വുത്ത’’ന്തി വദന്തി, വീമംസിതബ്ബം.

ഇദാനി ചതുന്നമ്പി സാധാരണം പകിണ്ണകം – മേഥുനധമ്മം പടിസേവന്തോ അത്ഥി കോചി പാരാജികോ ഹോതി അസംവാസോ, അത്ഥി കോചി ന പാരാജികോ ഹോതി അസംവാസോ, അത്ഥി കോചി ന പാരാജികോ സംവാസോ ദുക്കടവത്ഥുസ്മിം വാ ഥുല്ലച്ചയവത്ഥുസ്മിം വാ പടിസേവന്തോ, അത്ഥി കോചി ന പാരാജികോ പക്ഖപണ്ഡകോ അപണ്ഡകപക്ഖേ ഉപസമ്പന്നോ പണ്ഡകപക്ഖേ മേഥുനധമ്മം പടിസേവന്തോ. സോ ആപത്തിം നാപജ്ജതീതി ന പാരാജികോ നാമ. ന ഹി അഭിക്ഖുസ്സ ആപത്തി നാമ അത്ഥി. സോ അനാപത്തികത്താ അപണ്ഡകപക്ഖേ ആഗതോ കിം അസംവാസോ ഹോതി, ന ഹോതീതി? ഹോതി. ‘‘അഭബ്ബോ തേന സരീരബന്ധനേനാ’’തി (മഹാവ. ൧൨൯) ഹി വുത്തം. ‘‘യോ പന ഭിക്ഖു ഭിക്ഖൂനം സിക്ഖാസാജീവസമാപന്നോ…പേ… അസംവാസോ’’തി (പാരാ. ൪൪) വുത്തത്താ യോ ഭിക്ഖുഭാവേന മേഥുനം ധമ്മം പടിസേവതി, സോ ഏവ അഭബ്ബോ. നായം അപാരാജികത്താതി ചേ? ന, ‘‘ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ’’തി (മഹാവ. ൧൨൬) വുത്തട്ഠാനേ യഥാ അഭിക്ഖുനാ കമ്മവാചായ സാവിതായപി കമ്മം രുഹതി കമ്മവിപത്തിയാ അസമ്ഭവതോ, ഏവംസമ്പദമിദം ദട്ഠബ്ബം. തത്രായം വിസേസോ – ഉപസമ്പന്നപുബ്ബോ ഏവം ചേ കമ്മവാചം സാവേതി, സങ്ഘോ ച തസ്മിം ഉപസമ്പന്നസഞ്ഞീ ഏവ ചേ, കമ്മം രുഹതി, നാഞ്ഞഥാതി നോ ഖന്തീതി ആചരിയോ.

ഗഹട്ഠോ വാ തിത്ഥിയോ വാ പണ്ഡകോ വാ കമ്മവാചം സാവേതി, സങ്ഘേന കമ്മവാചാ ന വുത്താ ഹോതി. ‘‘സങ്ഘോ ഉപസമ്പാദേയ്യ സങ്ഘോ ഉപസമ്പാദേതി, ഉപസമ്പന്നോ സങ്ഘേനാ’’തി (മഹാവ. ൧൨൭) ഹി വചനതോ സങ്ഘേന കമ്മവാചായ വത്തബ്ബതായ സങ്ഘപരിയാപന്നേന, സങ്ഘപരിയാപന്നസഞ്ഞിതേന വാ ഏകേന വുത്തായ സങ്ഘേന വുത്താ ഹോതീതി വേദിതബ്ബോ, ന ഗഹട്ഠതിത്ഥിയപണ്ഡകാദീസു അഞ്ഞതരേന. അയമേവ സബ്ബകമ്മേസു യുത്തി ദട്ഠബ്ബാ.

തഥാ അത്ഥി മേഥുനം ധമ്മം പടിസേവന്തോ കോചി നാസേതബ്ബോ, ‘‘യോ ഭിക്ഖുനിദൂസകോ, അയം നാസേതബ്ബോ’’തി (മഹാവ. ൧൧൪-൧൧൫ അത്ഥതോ സമാനം) വുത്തത്താ തേന ഏവ സോ അനുപസമ്പന്നോവ സഹസേയ്യാപത്തിം വാ അഞ്ഞം വാ താദിസം ജനേതി, തസ്സ ഓമസനേ ച ദുക്കടം ഹോതി. അഭിക്ഖുനിയാ മേഥുനധമ്മം പടിസേവന്തോ ന നാസേതബ്ബോ, ‘‘അന്തിമവത്ഥും അജ്ഝാപന്നോ, ഭിക്ഖവേ, അനുപസമ്പന്നോ ന ഉപസമ്പാദേതബ്ബോ’’തി പാളിയാ അഭാവതോ, തേനേവ സോ ഉപസമ്പന്നസങ്ഖം ഗച്ഛതി, സഹസേയ്യാപത്തിആദിം ന ജനേതി, കേവലം അസംവാസോതി കത്വാ ഗണപൂരകോ ന ഹോതി. ഏകകമ്മഏകുദ്ദേസോ ഹി സംവാസോതി വുത്തോ, സമസിക്ഖതാപി സംവാസോതി കത്വാ സോ തേന സദ്ധിം നത്ഥീതി. പദസോധമ്മാപത്തിം പന ജനേതീതി കാരണച്ഛായാ ദിസ്സതീതി. യഥാ ഭിക്ഖുനിയാ സദ്ധിം ഭിക്ഖുസങ്ഘസ്സ ഏകകമ്മാദിനോ സംവാസസ്സ അഭാവാ ഭിക്ഖുനീ അസംവാസാ ഭിക്ഖുസ്സ, തഥാ ഭിക്ഖു ച ഭിക്ഖുനിയാ, പദസോധമ്മാപത്തിം പന ന ജനേതി. തഥാ അന്തിമവത്ഥും അജ്ഝാപന്നോപി ഏകേച്ചോ ‘‘യോ നാസേതബ്ബോതി വുത്തോ’’തി ഇമിനാ നിദസ്സനേന സകാരണച്ഛായാ അജ്ഝുപേക്ഖിതാ ഹോതീതി ന ഗഹണം ഗച്ഛതി. അപിച ‘‘ഉഭോ നാസേതബ്ബാ, ദൂസകോ നാസേതബ്ബോ’’തി (പാരാ. ൬൬) വചനതോ, ‘‘മേത്തിയം ഭിക്ഖുനിം നാസേഥാ’’തി (പാരാ. ൩൮൪) വചനതോ ച യോ സങ്ഘമജ്ഝം പവിസിത്വാ അനുവിജ്ജകേന അനുവിജ്ജിയമാനോ പരാജിതോ, സോപി അനുപസമ്പന്നോവ, ന ഓമസവാദപാചിത്തിയം ജനേതീതി വേദിതബ്ബോ.

അപിചേത്ഥ സിക്ഖാപച്ചക്ഖാതകചതുക്കം വേദിതബ്ബം. അത്ഥി ഹി പുഗ്ഗലോ സിക്ഖാപച്ചക്ഖാതകോ ന സിക്ഖാസാജീവസമാപന്നോ, അത്ഥി പുഗ്ഗലോ ന സിക്ഖാപച്ചക്ഖാതകോ സിക്ഖാസാജീവസമാപന്നോ, അത്ഥി പുഗ്ഗലോ സിക്ഖാപച്ചക്ഖാതകോ ചേവ സിക്ഖാസാജീവസമാപന്നോ ച, അത്ഥി പുഗ്ഗലോ നേവ സിക്ഖാപച്ചക്ഖാതകോ ന സിക്ഖാസാജീവസമാപന്നോ. തത്ഥ തതിയോ ഭിക്ഖുനീ സിക്ഖാപച്ചക്ഖാതകാ വേദിതബ്ബാ. സാ ഹി യാവ ന ലിങ്ഗം പരിച്ചജതി, കാസാവേസു സഉസ്സാഹാവ സമാനാ സാമഞ്ഞാ ചവിതുകാമാ സിക്ഖം പച്ചക്ഖന്തീപി ഭിക്ഖുനീ ഏവ സിക്ഖാസാജീവസമാപന്നാവ. വുത്തഞ്ഹി ഭഗവതാ ‘‘നത്ഥി, ഭിക്ഖവേ, ഭിക്ഖുനിയാ സിക്ഖാപച്ചക്ഖാന’’ന്തി. കദാ പന സാ അഭിക്ഖുനീ ഹോതീതി? യദാ സാ വിബ്ഭന്താതി സങ്ഖം ഗച്ഛതി. വുത്തഞ്ഹി ഭഗവതാ ‘‘യദേവ സാ വിബ്ഭന്താ, തദേവ സാ അഭിക്ഖുനീ’’തി (ചൂളവ. ൪൩൪). കിത്താവതാ പന വിബ്ഭന്താ ഹോതീതി? സാമഞ്ഞാ ചവിതുകാമാ കാസാവേസു അനാലയാ കാസാവം വാ അപനേതി, നഗ്ഗാ വാ ഗച്ഛതി, തിണപണ്ണാദിനാ വാ പടിച്ഛാദേത്വാ ഗച്ഛതി, കാസാവംയേവ വാ ഗിഹിനിവാസനാകാരേന നിവാസേതി, ഓദാതം വാ വത്ഥം നിവാസേതി, ലിങ്ഗേനേവ വാ സദ്ധിം തിത്ഥിയേസു പവിസിത്വാ കേസലുഞ്ചനാദിവതം സമാദിയതി, തിത്ഥിയലിങ്ഗം വാ സമാദിയതി, തദാ വിബ്ഭന്താ നാമ ഹോതി. തത്ഥ യാ സലിങ്ഗേ ഠിതാവ തിത്ഥിയവതം സമാദിയതി, സാ തിത്ഥിയപക്കന്തഭിക്ഖു വിയ പച്ഛാ പബ്ബജ്ജമ്പി ന ലഭതി. സേസാ പബ്ബജ്ജമേവ ലഭതി, ന ഉപസമ്പദം. പാളിയം കിഞ്ചാപി ‘‘യാ, ഭിക്ഖവേ, ഭിക്ഖുനീ സകാവാസാ തിത്ഥായതനം സങ്കന്താ, സാ ആഗതാ ന ഉപസമ്പാദേതബ്ബാ’’തി (ചൂളവ. ൪൩൪) വചനതോ യാ പഠമം വിബ്ഭമിത്വാ പച്ഛാ തിത്ഥായതനം സങ്കന്താ, സാ ആഗതാ ഉപസമ്പാദേതബ്ബാതി അനുഞ്ഞാതം വിയ ദിസ്സതി. സങ്ഗീതിആചരിയേഹി പന ‘‘ചതുവീസതി പാരാജികാനീ’’തി (പാരാ. അട്ഠ. ൨.൨൩൩) വുത്തത്താ ന പുന സാ ഉപസമ്പാദേതബ്ബാ. തസ്മാ ഏവ സിക്ഖാപച്ചക്ഖാനം നാനുഞ്ഞാതം ഭഗവതാ. അന്തിമവത്ഥും അജ്ഝാപന്നാ പന ഭിക്ഖുനീ ഏവ. പക്ഖപണ്ഡകീപി ഭിക്ഖുനീ ഏവ. ഇമം നയം ചതൂസുപി യോജേത്വാ യഥാരഹം കഥേതബ്ബം.

പാരാജികവണ്ണനാ നിട്ഠിതാ.