൮. കുമാരിഭൂതവഗ്ഗോ

൧-൫. പഠമകുമാരിഭൂതാദിസിക്ഖാപദവണ്ണനാ

സബ്ബപഠമാ ദ്വേ മഹാസിക്ഖമാനാതി ഗബ്ഭിനിവഗ്ഗേ വുത്താ ദ്വേ സിക്ഖമാനാ. ‘‘സിക്ഖമാനാ’’ഇച്ചേവ വത്തബ്ബാതി സമ്മുതികമ്മാദീസു ഏവം വത്തബ്ബാ. ‘‘ഗിഹിഗതാ’’തി വാ ‘‘കുമാരിഭൂതാ’’തി വാ ന വത്തബ്ബാതി സചേ വദന്തി, കമ്മം കുപ്പതീതി അധിപ്പായോ.

ചതുത്ഥപഞ്ചമാനി ഉത്താനത്ഥാനേവ.

പഠമകുമാരിഭൂതാദിസിക്ഖാപദവണ്ണനാ നിട്ഠിതാ.

൬-൮. ഖീയനധമ്മാദിസിക്ഖാപദവണ്ണനാ

വുട്ഠാപനസമ്മുതിയാ യാചിതായാതി ഉപസമ്പദാസമ്മുതിയാ യാചിതായ.

സത്തമട്ഠമാനി ഉത്താനത്ഥാനേവ.

ഖീയനധമ്മാദിസിക്ഖാപദവണ്ണനാ നിട്ഠിതാ.

൯. സോകാവാസസിക്ഖാപദവണ്ണനാ

ആഗച്ഛമാനാതി ആഗച്ഛന്തീ.

സോകാവാസസിക്ഖാപദവണ്ണനാ നിട്ഠിതാ.

൧൦. അനനുഞ്ഞാതസിക്ഖാപദവണ്ണനാ

തേസം അത്ഥിഭാവം അജാനന്തിയാതി (പാചി. അട്ഠ. ൧൧൬൩) തേസം മാതാദീനം അത്ഥിഭാവം അജാനന്തിയാ. അനനുഞ്ഞാതസമുട്ഠാനന്തി യം വാചതോ, കായവാചതോ, വാചാചിത്തതോ, കായവാചാചിത്തതോ ച സമുട്ഠാതി, തം അനനുഞ്ഞാതസമുട്ഠാനം. കഥം? അബ്ഭാനകമ്മാദീസു കേനചിദേവ കരണീയേന ഖണ്ഡസീമായം നിസിന്നാ ‘‘പക്കോസഥ സിക്ഖമാനം, ഇധേവ നം ഉപസമ്പാദേസ്സാമാ’’തി ഉപസമ്പാദേതി, ഏവം വാചതോ സമുട്ഠാതി. ‘‘ഉപസ്സയതോ ഉട്ഠായ ഉപസമ്പാദേസ്സാമീ’’തി വത്വാ ഖണ്ഡസീമം ഗച്ഛന്തിയാ കായവാചതോ സമുട്ഠാതി. ദ്വീസു ഠാനേസു പണ്ണത്തിം ജാനിത്വാ വീതിക്കമം കരോന്തിയാ വാചാചിത്തതോ, കായവാചാചിത്തതോ ച സമുട്ഠാതി. അനനുജാനാപേത്വാ ഉപസമ്പാദനതോ കിരിയാകിരിയം.

അനനുഞ്ഞാതസിക്ഖാപദവണ്ണനാ നിട്ഠിതാ.

൧൧. പാരിവാസികസിക്ഖാപദവണ്ണനാ

ദാരുണന്തി പാപം. പതിമാനേന്തന്തി ഓലോകേന്തം.

പാരിവാസികസിക്ഖാപദവണ്ണനാ നിട്ഠിതാ.

൧൨. അനുവസ്സസിക്ഖാപദവണ്ണനാ

ഏകന്തരികന്തി ഏകേന വസ്സേന അന്തരികം കത്വാ.

അനുവസ്സസിക്ഖാപദവണ്ണനാ നിട്ഠിതാ.

൧൩. ഏകവസ്സസിക്ഖാപദവണ്ണനാ

മാതികായം ഏകം വസ്സം ദ്വേതി ഏകന്തരികേ ഏകേകസ്മിം സംവച്ഛരേ ദ്വേ. ഏകന്തരികം വുട്ഠാപേന്തിയാതി ഇമസ്മിം വസ്സേ ഏകം, പുന ഏകന്തരികം ഏകന്തി ദ്വേ വുട്ഠാപേന്തിയാ അനാപത്തി.

ഏകവസ്സസിക്ഖാപദവണ്ണനാ നിട്ഠിതാ.

കുമാരിഭൂതവഗ്ഗോ അട്ഠമോ.