൭-൮. ഓക്ഖിത്തചക്ഖുസിക്ഖാപദവണ്ണനാ

കിത്തകേന പന ഓക്ഖിത്തചക്ഖു ഹോതീതി ആഹ ‘‘യുഗമത്തം ഭൂമിഭാഗം പേക്ഖമാനോ’’തി. യുഗയുത്തകോ ഹി ദന്തോ ആജാനേയ്യോ യുഗമത്തം പേക്ഖതി, പുരതോ ചതുഹത്ഥപ്പമാണം ഭൂമിഭാഗം, ഇമിനാപി ഏത്തകം പേക്ഖന്തേന ഗന്തബ്ബം. യോ അനാദരിയം പടിച്ച തം തം ദിസാഭാഗം പാസാദം കൂടാഗാരം വീഥിം ഓലോകേന്തോ ഗച്ഛതി, ആപത്തി ദുക്കടസ്സ. ഹത്ഥിഅസ്സാദിപരിസ്സയാഭാവന്തി പരിസ്സയനട്ഠേന, അഭിഭവനട്ഠേന, വിഹേഠനട്ഠേന വാ പരിസ്സയോ, ഹത്ഥിഅസ്സാദിയേവ പരിസ്സയോ ഹത്ഥിഅസ്സാദിപരിസ്സയോ, തസ്സാഭാവം, ഹത്ഥിഅസ്സാദി ഉപദ്ദവാഭാവന്തി അത്ഥോ. ‘‘യഥാ ച ഏകസ്മിം ഠാനേ ഠത്വാ, ഏവം ഗച്ഛന്തോപി പരിസ്സയാഭാവം ഓലോകേതും ലഭതിയേവ, തഥാ ഗാമേ പൂജ’’ന്തി (സാരത്ഥ. ടീ. പാചിത്തിയ ൩.൫൮൨) വദന്തി.

ഓക്ഖിത്തചക്ഖുസിക്ഖാപദവണ്ണനാ നിട്ഠിതാ.