൩൦-൩൨. സമതിത്തികാദിസിക്ഖാപദവണ്ണനാ

സമതിത്തികന്തി ഭാവനപുംസകനിദ്ദേസോ, സമതിത്തികം കത്വാതി അത്ഥോ. ഏവമഞ്ഞേസുപി ഈദിസേസു ഠാനേസു അത്ഥോ ദട്ഠബ്ബോ. സമപുണ്ണന്തി (സാരത്ഥ. ടീ. പാചിത്തിയ ൩.൬൦൫) പത്തസ്സ അന്തോമുഖവട്ടിലേഖാസമപുണ്ണം. സമഭരിതന്തി ഏത്ഥാപി ഏസേവ നയോ. തഞ്ച ഖോ അധിട്ഠാനുപഗപത്തസ്സേവ, നേതരസ്സ. തേനാഹ ‘‘അധിട്ഠാനുപഗപത്തസ്സാ’’തിആദി. രചിതന്തി കതം, പക്ഖിത്തം പൂരിതന്തി അത്ഥോ. യം കിഞ്ചി യാവകാലികന്തി യാഗുഭത്തഫലാഫലാദിം യം കിഞ്ചി ആമിസജാതികം. യത്ഥ കത്ഥചീതി അധിട്ഠാനുപഗോ വാ ഹോതു, അനധിട്ഠാനുപഗോ വാ യത്ഥ കത്ഥചി പത്തേ. ഥൂപീകതാനീതി ഥൂപം വിയ കതാനി, അധിട്ഠാനുപഗസ്സ പത്തസ്സ അന്തോമുഖവട്ടിലേഖം അതിക്കമിത്വാ കതാനീതി അത്ഥോ. ഇദഞ്ച ‘‘യാമകാലികാദീനീ’’തി ഇമസ്സ വസേന വുത്തം, ‘‘യാവകാലിക’’ന്തി ഇമസ്സ പന വസേന വചനബ്യത്തയം കത്വാ ‘‘ഥൂപീകതമ്പി വട്ടതീ’’തി യോജേതബ്ബം. പി-സദ്ദേന അഥൂപീകതാനി വട്ടന്തീതി ഏത്ഥ കഥാവ നത്ഥീതി ദസ്സേതി. ഹേട്ഠാ ഓരോഹതീതി സമന്താ ഓകാസസബ്ഭാവതോ ചാലിയമാനം ഹേട്ഠാ ഭസ്സതി. തക്കോലവടംസകാദയോതി ഏത്ഥ മത്ഥകേ ഠപിതതക്കോലമേവ വടംസകസദിസത്താ തക്കോലവടംസകം. ആദിസദ്ദേന പുപ്ഫവടംസകകടുകഫലാദിവടംസകാനം (പാചി. അട്ഠ. ൬൦൫) ഗഹണം, ന തം ഥൂപീകതം നാമ ഹോതി പാടേക്കം ഭാജനത്താ പണ്ണാദീനം.

സമതിത്തികാദിസിക്ഖാപദവണ്ണനാ നിട്ഠിതാ.