൨. ദുതിയപരിമണ്ഡലസിക്ഖാപദവണ്ണനാ

പടിക്ഖിത്തം ഗിഹിപാരുതന്തി ഖുദ്ദകവത്ഥുഖന്ധകേ പടിക്ഖിത്തം ഗിഹിപാരുതം. ഇദാനി ‘‘ന, ഭിക്ഖവേ’’തിആദിനാ (ചൂളവ. ൨൮൦-൨൮൧) സങ്ഖേപേന വുത്തമത്ഥമേവ വിത്ഥാരേത്വാ ദസ്സേതും ‘‘തത്ഥാ’’തിആദിമാഹ. യം കിഞ്ചി അഞ്ഞഥാ പാരുതന്തി സമ്ബന്ധോ. തസ്മാതി യസ്മാ സേതപടപാരുതാദി ഗിഹിപാരുതം നാമ, തസ്മാ. സേതപടാതി ഏതസ്സേവ വിവരണം. അഡ്ഢപാലകനിഗണ്ഠാതി അഡ്ഢം പാലേന്തീതി അഡ്ഢപാലകാ, അഡ്ഢപാലകാ ച തേ നിഗണ്ഠാ ചാതി അഡ്ഢപാലകനിഗണ്ഠാ. തേ ഹി ഉപരി ഏകമേവ സേതവത്ഥം ഉപകച്ഛകേ പവേസേത്വാ പരിദഹന്തി, ഹേട്ഠാ നഗ്ഗാപി അഡ്ഢമേവ പാലേന്തി. പരിബ്ബാജകാതി ഗിഹിബന്ധനം പഹായ പബ്ബജ്ജൂപഗതാ. ഉരം വിവരിത്വാതി ഹദയമജ്ഝം വിവരിത്വാ. അക്ഖിതാരകാമത്തന്തി അക്ഖിമത്തം. ആരാമേ വാതി ബുദ്ധൂപട്ഠാനാദികാലം സന്ധായ വുത്തം. അന്തരഘരേ വാതി അന്തരേ ഘരാനി ഏത്ഥ, ഏതസ്സാതി വാ ‘‘അന്തരഘര’’ന്തി ലദ്ധനാമേ ഗാമേ.

ദുതിയപരിമണ്ഡലസിക്ഖാപദവണ്ണനാ നിട്ഠിതാ.