൯. സേനാവാസസിക്ഖാപദവണ്ണനാ

നവമേ തതോ ചേ ഉത്തരീതി തിരത്തതോ ഉത്തരി ചതുത്ഥദിവസേ അത്ഥങ്ഗതേ സൂരിയേ സേനായ തിട്ഠതു വാ നിസീദതു വാ സയതു വാ, സചേപി ആകാസേ ഇദ്ധിയാ കഞ്ചി ഇരിയാപഥം കപ്പേതി, പാചിത്തിയമേവ.

സാവത്ഥിയം ഛബ്ബഗ്ഗിയേ ആരബ്ഭ അതിരേകതിരത്തം സേനായ വസനവത്ഥുസ്മിം പഞ്ഞത്തം, സാധാരണപഞ്ഞത്തി, അനാണത്തികം, തികപാചിത്തിയം, ഊനകതിരത്തേ അതിരേകസഞ്ഞിനോ, വേമതികസ്സ വാ ദുക്കടം. ഊനകസഞ്ഞിസ്സ, തതിയായ രത്തിയാ പുരാരുണാ നിക്ഖമിത്വാ പുന വസതോ, ഗിലാനസ്സ വാ ഗിലാനകരണീയേന വാ വസതോ, പടിസേനാരുദ്ധായ സേനായ, കേനചി പലിബുദ്ധസ്സ, ആപദാസു, ഉമ്മത്തകാദീനഞ്ച അനാപത്തി. തിരത്താതിക്കമോ, സേനായ സൂരിയസ്സ അത്ഥങ്ഗമോ, ഗിലാനതാദീനം അഭാവോതി ഇമാനേത്ഥ തീണി അങ്ഗാനി. സമുട്ഠാനാദീനി ഏളകലോമസദിസാനേവാതി.

സേനാവാസസിക്ഖാപദവണ്ണനാ നിട്ഠിതാ.