൨. കായസംസഗ്ഗസിക്ഖാപദവണ്ണനാ

ദുതിയേ ഓതിണ്ണോതി യക്ഖാദീഹി വിയ സത്താ അന്തോ ഉപ്പജ്ജന്തേന രാഗേന വാ ഓതിണ്ണോ, കൂപാദീനി വിയ സത്താ അസമപേക്ഖിത്വാ രജ്ജനീയേ ഠാനേ രജ്ജന്തോ സയം വാ രാഗം ഓതിണ്ണോ, കായസംസഗ്ഗരാഗസമങ്ഗിസ്സേതം അധിവചനം. വിപരിണതേന ചിത്തേനാതി പരിസുദ്ധഭവങ്ഗസന്തതിസങ്ഖാതം പകതിം വിജഹിത്വാ അഞ്ഞഥാ പവത്തേന, വിരൂപം വാ പരിണതേന യഥാ പരിവത്തമാനം വിരൂപം ഹോതി, ഏവം വുത്തരാഗവസേന പരിവത്തേത്വാ ഠിതേന ചിത്തേനാതി അത്ഥോ. മാതുഗാമേന സദ്ധിന്തി തദഹുജാതായപി ജീവമാനകമനുസ്സിത്ഥിയാ സദ്ധിം. കായസംസഗ്ഗം സമാപജ്ജേയ്യാതി ഹത്ഥഗ്ഗഹണാദികആയസമ്പയോഗം കായമിസ്സീഭാവം സമാപജ്ജേയ്യ. ഹത്ഥഗ്ഗാഹം വാതിആദി പനസ്സ വിത്ഥാരേന അത്ഥദസ്സനം. തത്ഥ ഹത്ഥോ നാമ കപ്പരതോ പട്ഠായ യാവ അഗ്ഗനഖാ. വേണീ നാമ വിനന്ധിത്വാ വാ അവിനന്ധിത്വാ വാ സുദ്ധകേസേഹി വാ നീലാദിവണ്ണസുത്തകുസുമകഹാപണമാലാസുവണ്ണചീരകമുത്താവളിആദീസു അഞ്ഞതരമിസ്സേഹി വാ കതകേസകലാപസ്സേതം അധിവചനം. വേണിഗ്ഗഹണേന ചേത്ഥ കേസാപി ഗഹിതായേവ സദ്ധിം ലോമേഹി. ഇതി വുത്തലക്ഖണസ്സ ഹത്ഥസ്സ ഗഹണം ഹത്ഥഗ്ഗാഹോ, വേണിയാ ഗഹണം വേണിഗ്ഗാഹോ. അവസേസസ്സ സരീരസ്സ പരാമസനം അഞ്ഞതരസ്സ വാ അഞ്ഞതരസ്സ വാ അങ്ഗസ്സ പരാമസനം നാമ. യോ തം ഹത്ഥഗ്ഗാഹം വാ വേണിഗ്ഗാഹം വാ അഞ്ഞതരസ്സ വാ അഞ്ഞതരസ്സ വാ അങ്ഗസ്സ പരാമസനം സമാപജ്ജേയ്യ, തസ്സ സങ്ഘാദിസേസോ നാമ ആപത്തിനികായോ ഹോതീതി.

സാവത്ഥിയം ഉദായിത്ഥേരം ആരബ്ഭ കായസംസഗ്ഗസമാപജ്ജനവത്ഥുസ്മിം പഞ്ഞത്തം, അസാധാരണപഞ്ഞത്തി, അനാണത്തികം, ഇത്ഥിയാ ഇത്ഥിസഞ്ഞിനോ അന്തമസോ ലോമേന ലോമം ഫുസന്തസ്സാപി, ഇത്ഥിയാ വാ ഫുസിയമാനസ്സ സേവനാധിപ്പായേന വായമിത്വാ ഫസ്സം പടിജാനന്തസ്സ സങ്ഘാദിസേസോ. ഏകേന പന ഹത്ഥേന ഗഹേത്വാ ദുതിയേന ഹത്ഥേന ദിവസമ്പി തത്ഥ തത്ഥ ഫുസന്തസ്സ ഏകാവ ആപത്തി, അഗ്ഗഹേത്വാ ഫുസന്തോ പന സചേ സീസതോ യാവ പാദാ, താവ കായതോ ഹത്ഥം അമോചേന്തോയേവ ഫുസതി, ഏകാവ ആപത്തി, പഞ്ചന്നം അങ്ഗുലീനം ഏകതോ ഗഹണേപി ഏകായേവ. സചേ പന നാനിത്ഥീനം പഞ്ചങ്ഗുലിയോ ഏകതോ ഗണ്ഹാതി, പഞ്ച ആപത്തിയോ. ഇത്ഥിയാ വേമതികസ്സ, പണ്ഡകപുരിസതിരച്ഛാനഗതസഞ്ഞിസ്സ ച ഥുല്ലച്ചയം, തഥാ കായേന കായപ്പടിബദ്ധേന, അമനുസ്സിത്ഥിപണ്ഡകേഹി ച സദ്ധിം കായസംസഗ്ഗേപി. മനുസ്സിത്ഥിയാ പന കായപ്പടിബദ്ധേന കായപ്പടിബദ്ധാദീസു, പുരിസകായഫുസനാദീസു ച ദുക്കടം. ഇത്ഥിയാ ഫുസിയമാനസ്സ സേവനാധിപ്പായസ്സാപി കായേന അവായമിത്വാ ഫസ്സം പടിജാനന്തസ്സ, മോക്ഖാധിപ്പായേന ഇത്ഥിം ഫുസന്തസ്സ, അസഞ്ചിച്ച, അസ്സതിയാ, അജാനന്തസ്സ, അസാദിയന്തസ്സ, ഉമ്മത്തകാദീനഞ്ച അനാപത്തി. സീലവിപത്തി, മനുസ്സിത്ഥീ, ഇത്ഥിസഞ്ഞിതാ, കായസംസഗ്ഗരാഗോ, തേന രാഗേന വായാമോ, ഹത്ഥഗ്ഗാഹാദിസമാപജ്ജനന്തി ഇമാനേത്ഥ പഞ്ച അങ്ഗാനി. സമുട്ഠാനാദീനി പഠമപാരാജികേ വുത്തസദിസാനേവാതി.

കായസംസഗ്ഗസിക്ഖാപദവണ്ണനാ നിട്ഠിതാ.