൩. ദുട്ഠുല്ലവാചാസിക്ഖാപദവണ്ണനാ

തതിയേ ഓതിണ്ണതാ ച വിപരിണതചിത്തതാ ച ദുട്ഠുല്ലവാചസ്സാദരാഗവസേന വേദിതബ്ബാ. മാതുഗാമന്തി ദുട്ഠുല്ലാദുട്ഠുല്ലസംലക്ഖണസമത്ഥം മനുസ്സിത്ഥിം. ദുട്ഠുല്ലാഹിവാചാഹീതി വച്ചമഗ്ഗപസ്സാവമഗ്ഗേമേഥുനധമ്മപ്പടിസംയുത്താഹി വാചാഹി. ഓഭാസേയ്യാതി അവഭാസേയ്യ, വണ്ണാവണ്ണയാചനആയാചനപുച്ഛനപടിപുച്ഛനആചിക്ഖണാനുസാസനഅക്കോസനവസേന നാനപ്പകാരം അസദ്ധമ്മവചനം വദേയ്യ. യഥാ തന്തി ഏത്ഥ ന്തി നിപാതമത്തം, യഥാ യുവാ യുവതിന്തി അത്ഥോ. ഏതേന ഓഭാസനേ നിരാസങ്കഭാവം ദസ്സേതി. മേഥുനുപസംഹിതാഹീതിഇദം ദുട്ഠുല്ലവാചായ സിഖാപത്തലക്ഖണദസ്സനം. സങ്ഘാദിസേസോതി ദ്വിന്നം മഗ്ഗാനം വസേന വണ്ണാവണ്ണേഹി വാ മേഥുനയാചനാദീഹി വാ ‘‘സിഖരണീസി, സംഭിന്നാസി, ഉഭതോബ്യഞ്ജനകാസീ’’തി ഇമേസു തീസു അഞ്ഞതരേന അക്കോസവചനേന വാ മാതുഗാമം ഓഭാസന്തസ്സ സങ്ഘാദിസേസോ നാമ ആപത്തിനികായോ ഹോതീതി.

സാവത്ഥിയം ഉദായിത്ഥേരം ആരബ്ഭ ദുട്ഠുല്ലവാചാഹി ഓഭാസനവത്ഥുസ്മിം പഞ്ഞത്തം, അസാധാരണപഞ്ഞത്തി, അനാണത്തികം, ഇത്ഥിയാ ഇത്ഥിസഞ്ഞിനോ അന്തമസോ ഹത്ഥമുദ്ദായപി വുത്തനയേന ഓഭാസന്തസ്സ സചേ സാ തമത്ഥം തസ്മിംയേവ ഖണേ ജാനാതി, സങ്ഘാദിസേസോ. പണ്ഡകേ ഥുല്ലച്ചയം. തസ്മിംയേവ ഇത്ഥിസഞ്ഞിനോ ദുക്കടം. പുനപ്പുനം ഓഭാസന്തസ്സ, സമ്ബഹുലാ ച ഇത്ഥിയോ ഏകവാചായ ഓഭാസന്തസ്സ വാചാഗണനായ ചേവ ഇത്ഥിഗണനായ ച ആപത്തിയോ. സചേ യം ഇത്ഥിം ഓഭാസതി, സാ ന ജാനാതി, ഥുല്ലച്ചയം. അധക്ഖകം ഉബ്ഭജാണുമണ്ഡലം ആദിസ്സ വണ്ണാദിഭണനേപി ഥുല്ലച്ചയം. പണ്ഡകേ ദുക്കടം, ഉബ്ഭക്ഖകം അധോജാണുമണ്ഡലം കായപ്പടിബദ്ധഞ്ച ആദിസ്സ വണ്ണാദിഭണനേ സബ്ബത്ഥ ദുക്കടം. അത്ഥധമ്മഅനുസാസനിപുരേക്ഖാരാനം ഉമ്മത്തകാദീനഞ്ച അനാപത്തി. സീലവിപത്തി, മനുസ്സിത്ഥീ, ഇത്ഥിസഞ്ഞിതാ, ദുട്ഠുല്ലവാചസ്സാദരാഗോ, തേന രാഗേന ഓഭാസനം, തങ്ഖണവിജാനനന്തി ഇമാനേത്ഥ പഞ്ച അങ്ഗാനി. അദിന്നാദാനസമുട്ഠാനം, കിരിയം, സഞ്ഞാവിമോക്ഖം, സചിത്തകം, ലോകവജ്ജം, കായകമ്മം, വചീകമ്മം, അകുസലചിത്തം, ദ്വിവേദനന്തി.

ദുട്ഠുല്ലവാചാസിക്ഖാപദവണ്ണനാ നിട്ഠിതാ.