൧൩. കുലദൂസകസിക്ഖാപദവണ്ണനാ

തേരസമേ ഗാമം വാ നിഗമംവാതി ഏത്ഥ നഗരമ്പി ഗാമേ അന്തോഗധമേവ. ഉപനിസ്സായ വിഹരതീതിതത്ഥ പടിബദ്ധചീവരാദിപച്ചയതായ തം നിസ്സായ വസതി. പുപ്ഫദാനാദീഹി മനുസ്സാനം സദ്ധം വിനാസേന്തോ കുലാനി ദൂസേതീതി കുലദൂസകോ. മാലാവച്ഛരോപനാദയോ പാപകാ സമാചാരാ അസ്സാതി പാപസമാചാരോ. സോ ഭിക്ഖൂതി സോ കുലദൂസകോ ഭിക്ഖു. ആയസ്മാ ഖോ കുലദൂസകോ…പേ… അലം തേ ഇധ വാസേനാതി ഇമിനാസ്സ പബ്ബാജനീയകമ്മാരഹതം ദസ്സേതി. പബ്ബാജനീയകമ്മകതോ പനേസ യസ്മിം ഗാമേ വാ നിഗമേ വാ കുലദൂസകകമ്മം കതം, യസ്മിഞ്ച വിഹാരേ വസതി, നേവ തസ്മിം ഗാമേ വാ നിഗമേ വാ ചരിതും ലഭതി, ന വിഹാരേ വസിതും. ഏവഞ്ച സോ ഭിക്ഖൂതിഏത്ഥ സോതി പബ്ബാജനീയകമ്മകതോ അധിപ്പേതോ. ഛന്ദേന ഗച്ഛന്തീതി ഛന്ദഗാമിനോ, ഏസ നയോ സേസേസു. സോ ഭിക്ഖൂതി സോ ‘‘ഛന്ദഗാമിനോ’’തിആദീനി വദമാനോ. തസ്സ വചനസ്സ പടിനിസ്സഗ്ഗായ ഏവം വചനീയോ, ന കുലദൂസനനിവാരണത്ഥായ. കുലദൂസനകമ്മേന ഹി സോ ആപജ്ജിതബ്ബാ ആപത്തിയോ പുബ്ബേവ ആപന്നോ, ഏവം പനസ്സ വിസുമ്പി സങ്ഘമജ്ഝേപി വുച്ചമാനസ്സ അപ്പടിനിസ്സജ്ജതോ അപരം ദുക്കടം. ഏവഞ്ച സോതിആദി ഇതോ പുബ്ബേ വുത്തഞ്ച അവുത്തഞ്ച സബ്ബം ഉത്താനത്ഥമേവ. വിനിച്ഛയകഥാപി ദസമേ വുത്തസദിസായേവ.

അയം പന വിസേസോ – ഇദം സാവത്ഥിയം അസ്സജിപുനബ്ബസുകേ ഭിക്ഖൂ ആരബ്ഭ ഛന്ദഗാമിതാദീഹി പാപനവത്ഥുസ്മിം പഞ്ഞത്തം, അങ്ഗേസു ച യഥാ തത്ഥ പരക്കമനം, ഏവം ഇധ ഛന്ദാദീഹി പാപനം ദട്ഠബ്ബന്തി.

കുലദൂസകസിക്ഖാപദവണ്ണനാ നിട്ഠിതാ.

നിഗമനവണ്ണനാ

ഉദ്ദിട്ഠാ ഖോ…പേ… ഏവമേതം ധാരയാമീതിഏത്ഥ പഠമം ആപത്തി ഏതേസന്തി പഠമാപത്തികാ, പഠമം വീതിക്കമനക്ഖണേയേവ ആപജ്ജിതബ്ബാതി അത്ഥോ. ഇതരേ പന യഥാ തതിയേ ച ചതുത്ഥേ ച ദിവസേ ഹോതീതി ഏത്ഥ ‘‘തതിയകോ, ചതുത്ഥകോ’’തി വുച്ചതി, ഏവം യാവതതിയേ സമനുഭാസനകമ്മേ ഹോന്തീതി യാവതതിയകാതി വേദിതബ്ബാ. യാവതീഹന്തി യത്തകാനി അഹാനി. ജാനം പടിച്ഛാദേതീതി ജാനന്തോ പടിച്ഛാദേതി. തത്ഥായം പടിച്ഛാദനലക്ഖണസ്സ മാതികാ – ആപത്തി ച ഹോതി, ആപത്തിസഞ്ഞീ ച, പകതത്തോ ച ഹോതി, പകതത്തസഞ്ഞീ ച, അനന്തരായികോ ച ഹോതി, അനന്തരായികസഞ്ഞീ ച, പഹു ച ഹോതി, പഹുസഞ്ഞീ ച, ഛാദേതുകാമോ ച ഹോതി, ഛാദേതി ചാതി. തത്ഥ ആപത്തി ച ഹോതി, ആപത്തിസഞ്ഞീ ചാതി യം ആപത്തിം ആപന്നോ, സാ തേരസന്നം അഞ്ഞതരാ ഹോതി, സോപി ച തത്ഥ വത്ഥുവസേന വാ ‘‘ഇദം ഭിക്ഖൂനം ന വട്ടതീ’’തി നാമമത്തവസേന വാ ‘‘അയം ഇത്ഥന്നാമാ ആപത്തീ’’തി ആപത്തിസഞ്ഞീയേവ ഹുത്വാ ‘‘ന ദാനി നം കസ്സചി ആരോചേസ്സാമീ’’തി ഏവം ഛാദേതുകാമോവ ധുരം നിക്ഖിപിത്വാ അരുണം ഉട്ഠാപേതി, ഛന്നാ ഹോതി ആപത്തി. സചേ പനേത്ഥ അനാപത്തിസഞ്ഞീ വാ ഹോതി, അഞ്ഞാപത്തിക്ഖന്ധസഞ്ഞീ വാ, വേമതികോ വാ, അച്ഛന്നാവ ഹോതി. പകതത്തോതി അനുക്ഖിത്തോ സമാനസംവാസകോ. സോ ചേ പകതത്തസഞ്ഞീ ഹുത്വാ വുത്തനയേനേവ ഛാദേതി, ഛന്നാ ഹോതി. അനന്തരായികോതി യസ്സ ദസസു രാജചോരഅഗ്ഗിഉദകമനുസ്സഅമനുസ്സവാളസരീസപജീവിതബ്രഹ്മചരിയന്തരായേസു ഏകോപി നത്ഥി, സോ ചേ അനന്തരായികസഞ്ഞീ ഛാദേതി, ഛന്നാ ഹോതി. പഹൂതി യോ സക്കോതി ഭിക്ഖുനോ സന്തികം ഗന്തുഞ്ചേവ ആരോചേതുഞ്ച, സോ ചേ പഹുസഞ്ഞീ ഹുത്വാ ഛാദേതി, ഛന്നാ ഹോതി. ഛാദേതുകാമോ ച ഹോതി, ഛാദേതി ചാതിഇദം ഉത്താനമേവ. സചേപി ഹി സോ സഭാഗം ദിസ്വാ ‘‘അയം മേ ഉപജ്ഝായോ വാ ആചരിയോ വാ’’തി ലജ്ജായ നാരോചേതി, ഛന്നാവ ഹോതി. ഉപജ്ഝായാദിഭാവോ ഹി ഇധ അപ്പമാണം, സഭാഗമത്തമേവ പമാണം. അയം ‘‘ജാനം പടിച്ഛാദേതീ’’തിപദസ്സ സങ്ഖേപതോ അത്ഥവിനിച്ഛയോ.

താവതീഹന്തി തത്തകാനി അഹാനി, പടിച്ഛാദിതദിവസതോ പട്ഠായ യാവ ആരോചിതദിവസോ, താവ ദിവസപക്ഖമാസസംവച്ഛരവസേന യത്തകോ കാലോ അതിക്കന്തോ, തത്തകം കാലന്തി അത്ഥോ. അകാമാ പരിവത്ഥബ്ബന്തി ന കാമേന ന വസേന, അഥ ഖോ അകാമേന അവസേന പരിവാസം സമാദായ വത്ഥബ്ബം. തത്ഥ പടിച്ഛന്നപരിവാസോ സുദ്ധന്തപരിവാസോ സമോധാനപരിവാസോ ചാതി തിവിധോ പരിവാസോ. തത്ഥ പടിച്ഛന്നപരിവാസോ താവ യഥാപടിച്ഛന്നായ ആപത്തിയാ ദാതബ്ബോ. കസ്സചി ഹി ഏകാഹപ്പടിച്ഛന്നാ ആപത്തി ഹോതി, കസ്സചി ദ്വീഹാദിപ്പടിച്ഛന്നാ. കസ്സചി ഏകാ ആപത്തി ഹോതി, കസ്സചി ദ്വേ വാ തിസ്സോ വാ തദുത്തരി വാ. തസ്മാ പടിച്ഛന്നപരിവാസം ദേന്തേന പഠമമേവ വുത്തനയേന പടിച്ഛന്നഭാവം ഞത്വാ തതോ പടിച്ഛന്നദിവസേ ച ആപത്തിയോ ച സല്ലക്ഖേത്വാ സചേ ഏകാ ഏകാഹപ്പടിച്ഛന്നാ ഹോതി, ‘‘അഹം, ഭന്തേ, ഏകം ആപത്തിം ആപജ്ജിം സഞ്ചേതനികം സുക്കവിസ്സട്ഠിം ഏകാഹപ്പടിച്ഛന്ന’’ന്തി ഏവം പരിവാസം യാചാപേത്വാ ഖന്ധകേ (ചൂളവ. ൯൮) ആഗതനയേന കമ്മവാചം വത്വാ പരിവാസോ ദാതബ്ബോ. അഥ ദ്വീഹതീഹാദിപ്പടിച്ഛന്നാ ഹോതി, ദ്വീഹപ്പടിച്ഛന്നം തീഹപ്പടിച്ഛന്നം ചതൂഹപ്പടിച്ഛന്നം പഞ്ചാഹപ്പടിച്ഛന്നം…പേ… ചുദ്ദസാഹപ്പടിച്ഛന്നന്തിഏവം യാവ ചുദ്ദസദിവസാനി ദിവസവസേന യോജനാ കാതബ്ബാ, പഞ്ചദസദിവസപ്പടിച്ഛന്നായം ‘‘പക്ഖപ്പടിച്ഛന്ന’’ന്തി യോജനാ കാതബ്ബാ. തതോ യാവ ഏകൂനതിംസതിമോ ദിവസോ, താവ ‘‘അതിരേകപക്ഖപ്പടിച്ഛന്ന’’ന്തി, തതോ മാസപ്പടിച്ഛന്നം അതിരേകമാസപ്പടിച്ഛന്നം ദ്വേമാസപ്പടിച്ഛന്നം അതിരേകദ്വേമാസപ്പടിച്ഛന്നം തേമാസപ്പടിച്ഛന്നം…പേ… അതിരേകഏകാദസമാസപ്പടിച്ഛന്നന്തി ഏവം യോജനാ കാതബ്ബാ. സംവച്ഛരേ പുണ്ണേ ‘‘ഏകസംവച്ഛരപ്പടിച്ഛന്ന’’ന്തി, തതോ പരം അതിരേകസംവച്ഛരം ദ്വേസംവച്ഛരം ഏവം യാവ സട്ഠിസംവച്ഛരഅതിരേകസട്ഠിസംവച്ഛരപ്പടിച്ഛന്നന്തി, തതോ വാ ഭിയ്യോപി വത്വാ യോജനാ കാതബ്ബാ.

സചേ പന ദ്വേ തിസ്സോ തദുത്തരി വാ ആപത്തിയോ ഹോന്തി, യഥാ ‘‘ഏകം ആപത്തി’’ന്തി വുത്തം, ഏവം ‘‘ദ്വേ ആപത്തിയോ, തിസ്സോ ആപത്തിയോ’’തി വത്തബ്ബം. തതോ പരം പന സതം വാ ഹോതു, സഹസ്സം വാ, ‘‘സമ്ബഹുലാ’’തി വത്തും വട്ടതി. നാനാവത്ഥുകാസുപി ‘‘അഹം, ഭന്തേ, സമ്ബഹുലാ സങ്ഘാദിസേസാ ആപത്തിയോ ആപജ്ജിം ഏകം സുക്കവിസ്സട്ഠിം ഏകം കായസംസഗ്ഗം ഏകം ദുട്ഠുല്ലവാചം ഏകം അത്തകാമം ഏകം സഞ്ചരിത്തം ഏകാഹപ്പടിച്ഛന്നായോ’’തി ഏവം ഗണനവസേന വാ, ‘‘അഹം, ഭന്തേ, സമ്ബഹുലാ സങ്ഘാദിസേസാ ആപത്തിയോ ആപജ്ജിം നാനാവത്ഥുകായോ ഏകാഹപ്പടിച്ഛന്നായോ’’തി ഏവം വത്ഥുകിത്തനവസേന വാ, ‘‘അഹം, ഭന്തേ, സമ്ബഹുലാ സങ്ഘാദിസേസാ ആപത്തിയോ ആപജ്ജിം ഏകാഹപ്പടിച്ഛന്നായോ’’തി ഏവം നാമമത്തവസേന വാ യോജനാ കാതബ്ബാ. തത്ഥ നാമം ദുവിധം സജാതിസാധാരണം സബ്ബസാധാരണഞ്ച, തത്ഥ സങ്ഘാദിസേസോതി സജാതിസാധാരണം, ആപത്തീതി സബ്ബസാധാരണം, തസ്മാ ‘‘സമ്ബഹുലാ ആപത്തിയോ ആപജ്ജിം ഏകാഹപ്പടിച്ഛന്നായോ’’തി ഏവം സബ്ബസാധാരണനാമവസേനാപി വത്തും വട്ടതി. ഇദഞ്ഹി പരിവാസാദിവിനയകമ്മം വത്ഥുവസേന ഗോത്തവസേന നാമവസേന ആപത്തിവസേന ച കാതും വട്ടതിയേവ. തത്ഥ സുക്കവിസ്സട്ഠീതി വത്ഥു ചേവ ഗോത്തഞ്ച, സങ്ഘാദിസേസോതി നാമഞ്ചേവ ആപത്തി ച, തത്ഥ ‘‘സുക്കവിസ്സട്ഠിം കായസംസഗ്ഗ’’ന്തിആദിവചനേനാപി ‘‘നാനാവത്ഥുകായോ’’തിവചനേനാപി വത്ഥു ചേവ ഗോത്തഞ്ച ഗഹിതം ഹോതി, ‘‘സങ്ഘാദിസേസോ’’തിവചനേനാപി ‘‘ആപത്തിയോ’’തിവചനേനാപി നാമഞ്ചേവ ആപത്തി ച ഗഹിതാ ഹോതി, തസ്മാ ഏതേസു യസ്സ കസ്സചി വസേന കമ്മവാചാ കാതബ്ബാ.

കമ്മവാചാപരിയോസാനേ ച സചേ അപ്പഭിക്ഖുകോ ആവാസോ ഹോതി, സക്കാ രത്തിച്ഛേദം അനാപജ്ജന്തേന വസിതും, തത്ഥേവ ‘‘പരിവാസം സമാദിയാമി, വത്തം സമാദിയാമീ’’തി തിക്ഖത്തും വത്തം സമാദാതബ്ബം, സമാദിയിത്വാ തത്ഥേവ സങ്ഘസ്സ ആരോചേത്വാ പുന ആഗതാഗതാനം ഭിക്ഖൂനം ആരോചേന്തേന വത്തഭേദഞ്ച രത്തിച്ഛേദഞ്ച അകത്വാ പരിവസിതബ്ബം. സചേ ന സക്കാ ഹോതി പരിവാസം സോധേതും, നിക്ഖിത്തവത്തേന വസിതുകാമോ ഹോതി, തത്ഥേവ സങ്ഘമജ്ഝേ, ഏകപുഗ്ഗലസ്സ വാ സന്തികേ ‘‘പരിവാസം നിക്ഖിപാമി, വത്തം നിക്ഖിപാമീ’’തി പരിവാസോ നിക്ഖിപിതബ്ബോ, ഏകപദേനാപി ചേത്ഥ നിക്ഖിത്തോ ഹോതി പരിവാസോ, ദ്വീഹി പന സുനിക്ഖിത്തോയേവ, സമാദാനേപി ഏസേവ നയോ. നിക്ഖിത്തകാലതോ പട്ഠായ പകതത്തട്ഠാനേ തിട്ഠതി, അഥാനേന പച്ചൂസസമയേ ഏകേന ഭിക്ഖുനാ സദ്ധിം പരിക്ഖിത്തസ്സ വിഹാരസ്സ പരിക്ഖേപതോ, അപരിക്ഖിത്തസ്സ പരിക്ഖേപാരഹട്ഠാനതോ ദ്വേ ലേഡ്ഡുപാതേ അതിക്കമിത്വാ മഹാമഗ്ഗതോ ഓക്കമ്മ ഗുമ്ബേന വാ വതിയാ വാ പടിച്ഛന്നട്ഠാനേ നിസീദിത്വാ അന്തോഅരുണേയേവ വത്തം സമാദിയിത്വാ ആരോചേതബ്ബം. യമ്പി അഞ്ഞം ഭിക്ഖും പസ്സതി, തസ്സാപി ആരോചേതബ്ബമേവ. അരുണേ ഉട്ഠിതേ തസ്സ സന്തികേ വത്തം നിക്ഖിപിത്വാ വിഹാരം ഗന്തബ്ബം. സചേ സോ പുരേ അരുണേയേവ കേനചി കരണീയേന ഗതോ, വിഹാരം ഗന്ത്വാ യം സബ്ബപഠമം ഭിക്ഖും പസ്സതി, തസ്സ ആരോചേത്വാ നിക്ഖിപിതബ്ബം. ഏവം സല്ലക്ഖേത്വാ യാവ രത്തിയോ പൂരേന്തി, താവ പരിവത്ഥബ്ബം, അയം സങ്ഖേപതോ പടിച്ഛന്നപരിവാസവിനിച്ഛയോ, വിത്ഥാരോ പന സമന്തപാസാദികായ വിനയസംവണ്ണനായ (ചൂളവ. അട്ഠ. ൯൭) വുത്തനയേനേവ വേദിതബ്ബോ.

ഇതരേസു പന ദ്വീസു ‘‘ആപത്തിപരിയന്തം ന ജാനാതി, രത്തിപരിയന്തം ന ജാനാതീ’’തി (ചൂളവ. ൧൫൭) ഇമസ്മിം വത്ഥുസ്മിം ഖന്ധകേ അനുഞ്ഞാതോ സുദ്ധന്തപരിവാസോ നാമ, സോ ദുവിധോ ചൂളസുദ്ധന്തോ മഹാസുദ്ധന്തോതി, ദുവിധോപി ചേസ രത്തിപരിച്ഛേദം സകലം വാ ഏകച്ചം വാ അജാനന്തസ്സ ച അസ്സരന്തസ്സ ച തത്ഥ വേമതികസ്സ ച ദാതബ്ബോ. ആപത്തിപരിയന്തം പന ‘‘ഏത്തികാ അഹം ആപത്തിയോ ആപന്നോ’’തി ജാനാതു വാ, മാ വാ, അകാരണമേതം. തസ്സ ദാനവിധി ഖന്ധകേ ആഗതോ, വിനിച്ഛയകഥാ പന വിത്ഥാരതോ സമന്തപാസാദികായം (ചൂളവ. അട്ഠ. ൧൦൨) വുത്താ. ഇതരോ പന സമോധാനപരിവാസോ നാമ, സോ തിവിധോ ഹോതി ഓധാനസമോധാനോ അഗ്ഘസമോധാനോ മിസ്സകസമോധാനോതി. തത്ഥ ഓധാനസമോധാനോ നാമ അന്തരാപത്തിം ആപജ്ജിത്വാ പടിച്ഛാദേന്തസ്സ പരിവുത്ഥദിവസേ ഓധുനിത്വാ മക്ഖേത്വാ പുരിമായ ആപത്തിയാ മൂലദിവസപരിച്ഛേദേ പച്ഛാ ആപന്നം ആപത്തിം സമോദഹിത്വാ ദാതബ്ബപരിവാസോ വുച്ചതി. അഗ്ഘസമോധാനോ നാമ സമ്ബഹുലാസു ആപത്തീസു യാ ഏകാ വാ ദ്വേ വാ തിസ്സോ വാ സമ്ബഹുലാ വാ ആപത്തിയോ സബ്ബചിരപ്പടിച്ഛന്നായോ, താസം അഗ്ഘേന സമോധായ താസം രത്തിപരിച്ഛേദവസേന അവസേസാനം ഊനതരപ്പടിച്ഛന്നാനം ആപത്തീനം ദാതബ്ബപരിവാസോ വുച്ചതി. മിസ്സകസമോധാനോ നാമ നാനാവത്ഥുകായോ ആപത്തിയോ ഏകതോ കത്വാ ദാതബ്ബപരിവാസോ വുച്ചതി, അയം തിവിധേപി സമോധാനപരിവാസേ സങ്ഖേപകഥാ, വിത്ഥാരോ പന സമന്തപാസാദികായം (ചൂളവ. അട്ഠ. ൧൦൨) വുത്തോ, ഇദം ‘‘പരിവത്ഥബ്ബ’’ന്തി പദസ്സ വിനിച്ഛയകഥാമുഖം.

ഉത്തരി ഛാരത്തന്തി പരിവാസതോ ഉത്തരി ഛ രത്തിയോ. ഭിക്ഖുമാനത്തായാതി ഭിക്ഖൂനം മാനഭാവായ, ആരാധനത്ഥായാതി വുത്തം ഹോതി. പടിപജ്ജിതബ്ബന്തി വത്തിതബ്ബം. ഭിക്ഖുമാനത്തഞ്ച പനേതം പടിച്ഛന്നാപടിച്ഛന്നവസേന ദുവിധം. തത്ഥ യസ്സ അപ്പടിച്ഛന്നാപത്തി ഹോതി, തസ്സ പരിവാസം അദത്വാ മാനത്തമേവ ദാതബ്ബം, ഇദം അപ്പടിച്ഛന്നമാനത്തം. യസ്സ പടിച്ഛന്നാ ഹോതി, തസ്സ പരിവാസപരിയോസാനേ ദാതബ്ബം മാനത്തം പടിച്ഛന്നമാനത്തന്തി വുച്ചതി, ഇദം ഇധ അധിപ്പേതം. ഉഭിന്നമ്പി പനേതേസം ദാനവിധി വിനിച്ഛയകഥാ ച സമന്തപാസാദികായം (ചൂളവ. അട്ഠ. ൧൦൨) വുത്തനയേന വേദിതബ്ബാ, അയം പനേത്ഥ സങ്ഖേപോ. സചേ അയം വത്തം നിക്ഖിപിത്വാ പച്ചൂസസമയേ സമാദാതും ഗച്ഛതി, സബ്ബന്തിമേന പരിച്ഛേദേന ചതൂഹി ഭിക്ഖൂഹി സദ്ധിം പരിവാസേ വുത്തപ്പകാരം പദേസം ഗന്ത്വാ ‘‘മാനത്തം സമാദിയാമി, വത്തം സമാദിയാമീ’’തി സമാദിയിത്വാ നേസം ആരോചേത്വാ തതോ തേസു ഗതേസു വാ അഗതേസു വാ പുരിമനയേന പടിപജ്ജിതബ്ബം. യത്ഥ സിയാ വീസതിഗണോതി ഏത്ഥ വീസതിസങ്ഘോ ഗണോ അസ്സാതി വീസതിഗണോ. തത്രാതി യത്ര സബ്ബന്തിമേന പരിച്ഛേദേന വീസതിഗണോ ഭിക്ഖുസങ്ഘോ അത്ഥി, തത്ഥ. അബ്ഭേതബ്ബോതി അഭിഏതബ്ബോ, സമ്പടിച്ഛിതബ്ബോ, അബ്ഭാനകമ്മവസേന ഓസാരേതബ്ബോതി വുത്തം ഹോതി. അവ്ഹാതബ്ബോതി വാ അത്ഥോ. അബ്ഭാനകമ്മം പന പാളിവസേന ഖന്ധകേ (ചൂളവ. ൧൦൦ ആദയോ) വിനിച്ഛയവസേന സമന്തപാസാദികായം വുത്തം. അനബ്ഭിതോതി ന അബ്ഭിതോ അസമ്പടിച്ഛിതോ, അകതബ്ഭാനകമ്മോതി വുത്തം ഹോതി. അനവ്ഹാതോതി വാ അത്ഥോ. തേ ച ഭിക്ഖൂ ഗാരയ്ഹാതി യേ ഊനഭാവം ഞത്വാ അബ്ഭേന്തി, തേ ഭിക്ഖൂ ച ഗരഹിതബ്ബാ, സാതിസാരാ സദോസാ ദുക്കടം ആപജ്ജന്തീതി അത്ഥോ. അയം തത്ഥ സാമീചീതി അയം തത്ഥ അനുധമ്മതാ ലോകുത്തരധമ്മം അനുഗതാ ഓവാദാനുസാസനീ സാമീചി ധമ്മതാ. സേസമേത്ഥ വുത്തനയമേവാതി.

കങ്ഖാവിതരണിയാ പാതിമോക്ഖവണ്ണനായ

സങ്ഘാദിസേസവണ്ണനാ നിട്ഠിതാ.