൬. ഖീയനധമ്മസിക്ഖാപദവണ്ണനാ

ഛട്ഠേ അലം താവ തേ അയ്യേ വുട്ഠാപിതേനാതി വുച്ചമാനാതി വുട്ഠാപനസമ്മുതിയാ യാചിതായ സങ്ഘേന ഉപപരിക്ഖിപിത്വാ ‘‘യസ്മാ ബാലാ അബ്യത്താ ച അലജ്ജിനീ ച ഹോതി, തസ്മാ അലം താവ തുയ്ഹം ഉപസമ്പാദിതേനാ’’തി ഏവം നിവാരീയമാനാ. പച്ഛാ ഖീയനധമ്മന്തി പച്ഛാ അഞ്ഞാസം ബ്യത്താനം ലജ്ജിനീനം വുട്ഠാപനസമ്മുതിം ദിയ്യമാനം ദിസ്വാ ‘‘അഹമേവ നൂന ബാലാ’’തിആദീനി ഭണമാനാ യത്ഥ കത്ഥചി ഖീയേയ്യ. പാചിത്തിയന്തി ഏവം ഖീയനധമ്മം ആപജ്ജന്തിയാ പാചിത്തിയം.

സാവത്ഥിയം ചണ്ഡകാളിം ആരബ്ഭ ഏവം ഖീയനധമ്മം ആപജ്ജനവത്ഥുസ്മിം പഞ്ഞത്തം, പകതിയാ ഛന്ദാദീനം വസേന കരോന്തീനം ഖീയന്തിയാ, ഉമ്മത്തികാദീനഞ്ച അനാപത്തി. വുട്ഠാപനസമ്മുതിയാ യാചനം, ഉപപരിക്ഖിത്വാ ന ഛന്ദാദിവസേന പടിക്ഖിത്തായ ‘‘സാധൂ’’തി പടിസ്സവോ, പച്ഛാഖീയനന്തി ഇമാനേത്ഥ തീണി അങ്ഗാനി. സമുട്ഠാനാദീനി അദിന്നാദാനസദിസാനി, ഇദം പന ദുക്ഖവേദനന്തി.

ഖീയനധമ്മസിക്ഖാപദവണ്ണനാ നിട്ഠിതാ.