൧-൨-൩. പഠമകുമാരിഭൂതാദിസിക്ഖാപദവണ്ണനാ

കുമാരിഭൂതവഗ്ഗസ്സ പഠമദുതിയതതിയാനി തീഹി ഗിഹിഗതസിക്ഖാപദേഹി സദിസാനേവ. യാ പന താ സബ്ബപഠമാ ദ്വേ മഹാസിക്ഖമാനാ, താ അതിക്കന്തവീസതിവസ്സാതി വേദിതബ്ബാ. താ ഹി ഗിഹിഗതാ വാ ഹോന്തു, അഗിഹിഗതാ വാ, സമ്മുതികമ്മാദീസു ‘‘സിക്ഖമാനാ’’ഇച്ചേവ വത്തബ്ബാ, ‘‘ഗിഹിഗതാ’’തി വാ ‘‘കുമാരിഭൂതാ’’തി വാ ന വത്തബ്ബാ. ഗിഹിഗതായ ദസവസ്സകാലേ സിക്ഖാസമ്മുതിം ദത്വാ ദ്വാദസവസ്സകാലേ ഉപസമ്പദാ കാതബ്ബാ, ഏകാദസവസ്സകാലേ ദത്വാ തേരസവസ്സകാലേ കാതബ്ബാ, ദ്വാദസതേരസചുദ്ദസപന്നരസസോളസസത്തരസഅട്ഠാരസവസ്സകാലേ സിക്ഖാസമ്മുതിം ദത്വാ വീസതിവസ്സകാലേ ഉപസമ്പദാ കാതബ്ബാ. അട്ഠാരസവസ്സകാലതോ പട്ഠായ ച പനായം ‘‘ഗിഹിഗതാ’’തിപി ‘‘കുമാരിഭൂതാ’’തിപി വത്തും വട്ടതി. യാ പനായം ‘‘കുമാരിഭൂതാ’’തി വുത്താ സാമണേരീ, സാ ‘‘ഗിഹിഗതാ’’തി ന വത്തബ്ബാ, ‘‘കുമാരിഭൂതാ’’ഇച്ചേവ വത്തബ്ബാ. സിക്ഖാസമ്മുതിദാനവസേന പന സബ്ബാപി ‘‘സിക്ഖമാനാ’’തി വത്തും വട്ടതീതി.

പഠമകുമാരിഭൂതാദിസിക്ഖാപദവണ്ണനാ നിട്ഠിതാ.