൭. ഗബ്ഭിനീവഗ്ഗോ

൧. ഗബ്ഭിനീസിക്ഖാപദവണ്ണനാ

ഗബ്ഭിനിവഗ്ഗസ്സ പഠമേ ‘‘ഗബ്ഭിനീ’’തി ജാനിത്വാ ഉപജ്ഝായായ വുട്ഠാപേന്തിയാ ഗണപരിയേസനാദീസു ച ഞത്തികമ്മവാചാദ്വയേ ച ദുക്കടം, കമ്മവാചാപരിയോസാനേ പാചിത്തിയം.

സാവത്ഥിയം സമ്ബഹുലാ ഭിക്ഖുനിയോ ആരബ്ഭ ഗബ്ഭിനിം വുട്ഠാപനവത്ഥുസ്മിം പഞ്ഞത്തം, ഗബ്ഭിനിയാ വേമതികായ അഗബ്ഭിനിയാ ഗബ്ഭിനിസഞ്ഞായ ചേവ വേമതികായ ച ദുക്കടം. ഉഭോസു അഗബ്ഭിനിസഞ്ഞായ, ഉമ്മത്തികാദീനഞ്ച അനാപത്തി. ഗബ്ഭിനിതാ, ‘ഗബ്ഭിനീ’തി ജാനനം, വുട്ഠാപനന്തി ഇമാനേത്ഥ തീണി അങ്ഗാനി. സമുട്ഠാനാദീനി അദിന്നാദാനസദിസാനി, ഇദം പന പണ്ണത്തിവജ്ജം, തിചിത്തം, തിവേദനന്തി.

ഗബ്ഭിനീസിക്ഖാപദവണ്ണനാ നിട്ഠിതാ.

൨. പായന്തീസിക്ഖാപദവണ്ണനാ

ദുതിയേ പായന്തിന്തി ഥഞ്ഞം പായമാനം, യം പായേതി, തസ്സ മാതാ വാ, ധാതി വാ. ഇദം വത്ഥുമത്തമേവേത്ഥ വിസേസോ, സേസം പഠമസിക്ഖാപദസദിസമേവാതി.

പായന്തീസിക്ഖാപദവണ്ണനാ നിട്ഠിതാ.

൩. പഠമസിക്ഖമാനസിക്ഖാപദവണ്ണനാ

തതിയേ ദ്വേ വസ്സാനീതി പവാരണാവസേന ദ്വേ സംവച്ഛരാനി. ഛസു ധമ്മേസൂതി പാണാതിപാതാവേരമണിആദീസു വികാലഭോജനാവേരമണിപരിയോസാനേസു ഛസു സിക്ഖാപദേസു. അസിക്ഖിതസിക്ഖന്തി പദഭാജനേ (പാചി. ൧൦൭൭) വുത്തനയേനേവ അദിന്നസിക്ഖം വാ കുപിതസിക്ഖം വാ. സിക്ഖമാനം വുട്ഠാപേയ്യാതി തേസു ഛസു ധമ്മേസു സിക്ഖനതോ, തേ വാ സിക്ഖാസങ്ഖാതേ ധമ്മേ മാനനതോ ഏവംലദ്ധനാമം അനുപസമ്പന്നം ഉപസമ്പാദേയ്യ. പാചിത്തിയന്തി പഠമസിക്ഖാപദേ വുത്തനയേനേവ കമ്മവാചാപരിയോസാനേ പാചിത്തിയം.

സാവത്ഥിയം സമ്ബഹുലാ ഭിക്ഖുനിയോ ആരബ്ഭ ഏവരൂപം സിക്ഖമാനം വുട്ഠാപനവത്ഥുസ്മിം പഞ്ഞത്തം, ധമ്മകമ്മേ തികപാചിത്തിയം, അധമ്മകമ്മേ തികദുക്കടം. ദ്വേ വസ്സാനി ഛസു ധമ്മേസു സിക്ഖിതസിക്ഖം സിക്ഖമാനം വുട്ഠാപേന്തിയാ, ഉമ്മത്തികാദീനഞ്ച അനാപത്തി. വുത്തനയേന അസിക്ഖിതസിക്ഖതാ, ധമ്മകമ്മതാ, കമ്മവാചാപരിയോസാനന്തി ഇമാനേത്ഥ തീണി അങ്ഗാനി. സമുട്ഠാനാദീനി പഠമേ വുത്തനയാനേവാതി.

പഠമസിക്ഖമാനസിക്ഖാപദവണ്ണനാ നിട്ഠിതാ.

൪. ദുതിയസിക്ഖമാനസിക്ഖാപദവണ്ണനാ

ചതുത്ഥേ സങ്ഘേന അസമ്മതന്തി യസ്സാ സങ്ഘേന അന്തമസോ ഉപസമ്പദാമാളകേപി പദഭാജനേ (പാചി. ൧൦൮൬) വുത്താ ഉപസമ്പദാസമ്മുതി ന ദിന്നാ ഹോതി, തം ഇമാ ദ്വേപി മഹാസിക്ഖമാനാ നാമ. ഇധ സങ്ഘേന സമ്മതം വുട്ഠാപേന്തിയാ, ഉമ്മത്തികാദീനഞ്ച അനാപത്തി. സേസം തതിയേ വുത്തസദിസമേവ, ഇദം പന കിരിയാകിരിയം ഹോതീതി.

ദുതിയസിക്ഖമാനസിക്ഖാപദവണ്ണനാ നിട്ഠിതാ.

൫. പഠമഗിഹിഗതസിക്ഖാപദവണ്ണനാ

പഞ്ചമേ ഗിഹിഗതന്തി പുരിസന്തരഗതം, ഇധാപി ഇദം വത്ഥുമത്തമേവ വിസേസോ. ഊനദ്വാദസവസ്സഞ്ച പരിപുണ്ണസഞ്ഞായ വുട്ഠാപേന്തിയാ കിഞ്ചാപി അനാപത്തി, സാ പന അനുപസമ്പന്നാവ ഹോതി. സേസം പഠമസിക്ഖാപദസദിസമേവാതി.

പഠമഗിഹിഗതസിക്ഖാപദവണ്ണനാ നിട്ഠിതാ.

൬-൭. ദുതിയതതിയഗിഹിഗതസിക്ഖാപദവണ്ണനാ

ഛട്ഠേ സബ്ബം തതിയേ വുത്തനയേന. സത്തമേപി സബ്ബം ചതുത്ഥേ വുത്തനയേനേവ വേദിതബ്ബന്തി.

ദുതിയതതിയഗിഹിഗതസിക്ഖാപദവണ്ണനാ നിട്ഠിതാ.

൮. പഠമസഹജീവിനിസിക്ഖാപദവണ്ണനാ

അട്ഠമേ സഹജീവിനിന്തി സദ്ധിവിഹാരിനിം. നേവ അനുഗ്ഗണ്ഹേയ്യാതി സയം ഉദ്ദേസാദീഹി നാനുഗ്ഗണ്ഹേയ്യ. ന അനുഗ്ഗണ്ഹാപേയ്യാതി ‘‘ഇമിസ്സാ, അയ്യേ, ഉദ്ദേസാദീനി ദേഹീ’’തി ഏവം ന അഞ്ഞായ അനുഗ്ഗണ്ഹാപേയ്യ. പാചിത്തിയന്തി ധുരേ നിക്ഖിത്തമത്തേ പാചിത്തിയം.

സാവത്ഥിയം ഥുല്ലനന്ദം ആരബ്ഭ ഏവരൂപേ വത്ഥുസ്മിം പഞ്ഞത്തം, സേസമേത്ഥ തുവട്ടവഗ്ഗേ ദുക്ഖിതസഹജീവിനിസിക്ഖാപദേ വുത്തസദിസമേവാതി.

പഠമസഹജീവിനിസിക്ഖാപദവണ്ണനാ നിട്ഠിതാ.

൯. നാനുബന്ധനസിക്ഖാപദവണ്ണനാ

നവമേ വുട്ഠാപിതം പവത്തിനിന്തി വുട്ഠാപിതം പവത്തിനിം യായ ഉപസമ്പാദിതാ, തം ഉപജ്ഝായിനിന്തി അത്ഥോ. നാനുബന്ധേയ്യാതി ചുണ്ണേന മത്തികായ ദന്തകട്ഠേന മുഖോദകേനാതി ഏവം തേന തേന കരണീയേന ന ഉപട്ഠഹേയ്യ. പാചിത്തിയന്തി നാനുബന്ധിസ്സന്തി ധുരേ നിക്ഖിത്തമത്തേ പാചിത്തിയം.

സാവത്ഥിയം സമ്ബഹുലാ ഭിക്ഖുനിയോ ആരബ്ഭ നാനുബന്ധനവത്ഥുസ്മിം പഞ്ഞത്തം. ബാലം പന അലജ്ജിനിം വാ അനനുബന്ധന്തിയാ, ഗിലാനായ, ആപദാസു, ഉമ്മത്തികാദീനഞ്ച അനാപത്തി. വുട്ഠാപിതപ്പവത്തിനിതാ, ദ്വേ വസ്സാനി അനനുബന്ധനേ ധുരനിക്ഖേപോ, അനുഞ്ഞാതകാരണാഭാവോതി ഇമാനേത്ഥ തീണി അങ്ഗാനി. സമുട്ഠാനാദീനി പഠമപാരാജികസദിസാനി, ഇദം പന അകിരിയം, ദുക്ഖവേദനന്തി.

നാനുബന്ധനസിക്ഖാപദവണ്ണനാ നിട്ഠിതാ.

൧൦. ദുതിയസഹജീവിനിസിക്ഖാപദവണ്ണനാ

ദസമേ നേവ വൂപകാസേയ്യാതി ന ഗഹേത്വാ ഗച്ഛേയ്യ. ന വൂപകാസാപേയ്യാതി ‘‘ഇമം, അയ്യേ, ഗഹേത്വാ ഗച്ഛാഹീ’’തി അഞ്ഞം ന ആണാപേയ്യ. പാചിത്തിയന്തി ധുരേ നിക്ഖിത്തമത്തേ പാചിത്തിയം.

സാവത്ഥിയം ഥുല്ലനന്ദം ആരബ്ഭ സഹജീവിനിയാ അവൂപകാസനവത്ഥുസ്മിം പഞ്ഞത്തം. സതി പന അന്തരായേ, പരിയേസിത്വാ ദുതിയികം അലഭന്തിയാ, ഗിലാനായ, ആപദാസു, ഉമ്മത്തികാദീനഞ്ച അനാപത്തി. സഹജീവിനിതാ, വൂപകാസവൂപകാസാപനേ ധുരനിക്ഖേപോ, അനുഞ്ഞാതകാരണാഭാവോതി ഇമാനേത്ഥ തീണി അങ്ഗാനി. സമുട്ഠാനാദീനി സമനുഭാസനസദിസാനീതി.

ദുതിയസഹജീവിനിസിക്ഖാപദവണ്ണനാ നിട്ഠിതാ.

ഗബ്ഭിനീവഗ്ഗോ സത്തമോ.