൬. അഭിക്ഖുകാവാസസിക്ഖാപദവണ്ണനാ

ഛട്ഠേ സചേ ഭിക്ഖുനുപസ്സയതോ അദ്ധയോജനബ്ഭന്തരേ ഓവാദദായകാ ഭിക്ഖൂ ന വസന്തി, മഗ്ഗോ വാ അഖേമോ ഹോതി ന സക്കാ അനന്തരായേന ഗന്തും, അയം അഭിക്ഖുകോ നാമ ആവാസോ. തത്ഥ ‘‘വസ്സം വസിസ്സാമീ’’തി സേനാസനപഞ്ഞാപനപാനീയഉപട്ഠാപനാദീനി കരോന്തിയാ ദുക്കടം, സഹ അരുണുഗ്ഗമനാ പാചിത്തിയം. അയമേത്ഥ സങ്ഖേപോ, വിത്ഥാരോ പന സമന്തപാസാദികായം (പാചി. അട്ഠ. ൧൪൪ ആദയോ) വുത്തോ.

സാവത്ഥിയം സമ്ബഹുലാ ഭിക്ഖുനിയോ ആരബ്ഭ അഭിക്ഖുകേ ആവാസേ വസ്സം വസനവത്ഥുസ്മിം പഞ്ഞത്തം, യത്ഥ പന വസ്സൂപഗതാ ഭിക്ഖൂ പക്കന്താ വാ ഹോന്തി വിബ്ഭന്താ വാ കാലങ്കതാ വാ പക്ഖസങ്കന്താ വാ തത്ഥ വസന്തിയാ, ആപദാസു, ഉമ്മത്തികാദീനഞ്ച അനാപത്തി. അഭിക്ഖുകാവാസതാ, വസ്സൂപഗമനം, അരുണുഗ്ഗമനന്തി ഇമാനേത്ഥ തീണി അങ്ഗാനി. സമുട്ഠാനാദീനി ഏളകലോമസദിസാനേവാതി.

അഭിക്ഖുകാവാസസിക്ഖാപദവണ്ണനാ നിട്ഠിതാ.