൩. തികനിദ്ദേസവണ്ണനാ

൯൦൯. അവിജ്ജാഭവതണ്ഹാഹി വിയ ഇസ്സാമച്ഛരിയദോമനസ്സാദിസഹായഭൂതേന ദോസേനപി ഭവാഭിസങ്ഖരണം ഹോതീതി ‘‘അകുസലമൂലാനേവ വട്ടമൂലാനീ’’തി. തേനാഹ ‘‘തീഹി…പേ… കഥിതോ’’തി.

൯൧൯. രൂപാരൂപാവചരവിപാകാനം സന്തപണീതഭാവേന ഉളാരതമത്താ തത്ഥ സാതിസയോ ഭവരാഗോ വുത്തോ.

൯൨൦. മാനേന ഠപനാതി മാനേന സേയ്യാദിവസേന അത്തനോ ഠപനാ. ഠപനാതി ച ദഹനാ, പഗ്ഗണ്ഹനാ വാ.

൯൨൧. തംസമ്പയുത്താതി ദോസസമ്പയുത്താ.

൯൨൨. തേസം വണ്ണഭേദന്തി തേസം ജീവാനം വണ്ണവിസേസം, തേസം വാ തഥാ കഥേന്താനം സുത്വാ. ബ്യാപീതി സകലലോകബ്യാപീ, സകലസരീരബ്യാപീ വാ. പരിമണ്ഡലോതി പരമാണുപ്പമാണോ ഹുത്വാ പരിമണ്ഡലോ. ആദി-സദ്ദേന അങ്ഗുട്ഠപ്പമാണോ വയപ്പമാണോതിആദികം സങ്ഗണ്ഹാതി.

൯൨൩. ഉതുവിപരിണാമജോ സീതാദിഉതുവിപരിവത്തജാതോ. ഓപക്കമികോ അത്തനോ, പരസ്സ വാ താദിസഉപക്കമനിബ്ബത്തോ. വിസമപരിഹാരജോ ചിരാസനചിരട്ഠാനാദിനാ കായസ്സ വിസമപരിഹരണതോ ജാതോ. സന്നിപാതജോ സഞ്ചയതോ പട്ഠായ പച്ചേകം വിസമാകാരതോ ദോസത്തയസമോധാനതോ ജാതോ. കമ്മസമുട്ഠാനോ ഉതുവിപരിണാമാദീഹി വിനാ കമ്മതോ സമുട്ഠിതോ. പിത്തസേമ്ഹവാതസമുട്ഠാനാ പന പിത്താദീനം അധികഭാവേനേവ വുത്താ. സബ്ബസ്സാപി ഹി രോഗസ്സ ദോസത്തയം ആസന്നകാരണം ദോസപ്പകോപേന വിനാ അഭാവതോ. കമ്മം പധാനകാരണം കതോകാസേ ഏവ തസ്മിം ഉപ്പജ്ജനതോ, ഇതരം പന തസ്സ സഹകാരികാരണം ദട്ഠബ്ബം. തയിദം പുബ്ബേകതഹേതുവാദിനോ പടിക്ഖിപന്തി. ഉപപജ്ജവേദനീയഫലമ്പി പുബ്ബേകതഹേതുകപക്ഖികമേവ അതീതദ്ധികത്താ കമ്മസ്സാതി അരുചിസൂചനത്ഥം കിര-സദ്ദഗ്ഗഹണം കരോതി ‘‘ഉപപജ്ജവേദനീയഞ്ച കിര പടിക്ഖിപന്തീ’’തി.

൯൨൪. ദാഹകാരണതായാതി രാഗാദിദസവിധഗ്ഗിദാഹസ്സ, നരകഗ്ഗിദാഹസ്സ ച കാരണതായ.

൯൨൬. പുഥുനിമിത്തസഭാവേസൂതി പുഥു നാനാകിലേസാദീനം കാരണസഭാവേസു.

൯൩൧. അദ്ദനം അദ്ദാ മദ്ദവോ, അനേകത്ഥത്താ ധാതൂനം തപ്പടിക്ഖേപേന അനദ്ദാതി ആഹ ‘‘അമുദുതാ വാ അനദ്ദാ’’തി.

൯൩൬. അയോനിസോമനസികാരഹേതുകത്താ ആവജ്ജനായ അകുസലാനുകൂലകിച്ചതാ ദട്ഠബ്ബാ.

തികനിദ്ദേസവണ്ണനാ നിട്ഠിതാ.