൩. അനുലോമപച്ചനീയവണ്ണനാ

൪൫-൪൮. അനുലോമേ വുത്തേസു സബ്ബേസു ഏകമൂലകാദീസു ഏകേകം പദം പരിഹാപേത്വാതി തത്ഥ ഏകമൂലകേ ചതുവീസതി പച്ചയപദാനി ഇധ ഏകമൂലകേ തേവീസതി, ഏകോ പന പച്ചയോ മൂലഭാവേന ഠിതോ അപുബ്ബതാഭാവതോ അഗണനൂപഗോ. തത്ഥ ദുമൂലകേ തേവീസതി പച്ചയപദാനി ഗണനൂപഗാനി, ഇധ ദുമൂലകേ ദ്വാവീസതീതി ഏവം പരിഹാപേത്വാതി അത്ഥോ.

അനുലോമതോ ഠിതസ്സ പച്ചനീയതോ അലബ്ഭമാനാനം സുദ്ധികപച്ചയാനഞ്ച അലബ്ഭമാനതം സന്ധായ ‘‘ലബ്ഭമാനപദാന’’ന്തി വുത്തം. ന ഹി അഞ്ഞഥാ പുച്ഛാവസേന കോചി പച്ചയോ അലബ്ഭമാനോ നാമ അത്ഥീതി. വിസ്സജ്ജനാവസേനേവ വാ പവത്തം അനുലോമപച്ചനീയദേസനം സന്ധായ ‘‘ലബ്ഭമാനപദാന’’ന്തി വുത്തം.

അനുലോമപച്ചനീയവണ്ണനാ നിട്ഠിതാ.

പുച്ഛാവാരവണ്ണനാ നിട്ഠിതാ.