൧. ബലകഥാവണ്ണനാ

൩൫൪. ഇന്ദ്രിയപരോപരിയത്തം അസാധാരണന്തി യഥാ നിദ്ദേസതോ വിത്ഥാരതോ സബ്ബം സബ്ബാകാരം ഠാനാട്ഠാനാദിം അജാനന്താപി ‘‘അട്ഠാനമേതം അനവകാസോ, യം ദിട്ഠിസമ്പന്നോ പുഗ്ഗലോ കഞ്ചി സങ്ഖാരം നിച്ചതോ ഉപഗച്ഛേയ്യാ’’തിആദിനാ (അ. നി. ൧.൨൬൮) ഠാനാട്ഠാനാനി ഉദ്ദേസതോ സങ്ഖേപതോ സാവകാ ജാനന്തി, ന ഏവം ‘‘ആസയം ജാനാതി അനുസയം ജാനാതീ’’തിആദിനാ (പടി. മ. ൧.൧൧൩) ഉദ്ദേസമത്തേനപി ഇന്ദ്രിയപരോപരിയത്തം ജാനന്തീതി ‘‘അസാധാരണ’’ന്തി ആഹ. ഥേരേന പന സദ്ധാദീനം ഇന്ദ്രിയാനം തിക്ഖമുദുഭാവജാനനമത്തം സന്ധായ ‘‘സത്താനം ഇന്ദ്രിയപരോപരിയത്തം യഥാഭൂതം പജാനാമീ’’തി (പടി. മ. ൨.൪൪) വുത്തം, ന യഥാവുത്തം ഇന്ദ്രിയപരോപരിയത്തഞാണം തഥാഗതബലന്തി അയമേത്ഥ അധിപ്പായോ ദട്ഠബ്ബോ. ‘‘ഉദ്ദേസതോ ഠാനാട്ഠാനാദിമത്തജാനനവസേന പടിജാനാതീ’’തി വുത്തം, ഏവം പന പടിജാനന്തേന ‘‘തഥാഗതബലം സാവകസാധാരണ’’ന്തി ഇദമ്പി ഏവമേവ പടിഞ്ഞാതം സിയാതി കഥമയം ചോദേതബ്ബോ സിയാ.

൩൫൬. സേസേസു പടിക്ഖേപോ സകവാദിസ്സ ഠാനാട്ഠാനഞാണാദീനം സാധാരണാസാധാരണത്താ തത്ഥ സാധാരണപക്ഖം സന്ധായാതി അധിപ്പായോ.

ബലകഥാവണ്ണനാ നിട്ഠിതാ.