൧൦. വോഹാരകഥാവണ്ണനാ

൩൪൭. വോഹാരകഥായം ഉദാഹു സോതാദീനിപീതി ഏകന്തലോകിയേസു വിസയവിസയീസു വിസയസ്സേവ ലോകുത്തരഭാവോ, ന വിസയീനന്തി നത്ഥേത്ഥ കാരണം. യഥാ ച വിസയീനം ലോകുത്തരഭാവോ അസിദ്ധോ, തഥാ വിസയസ്സ സദ്ദായതനസ്സ. തത്ഥ യഥാ അസിദ്ധലോകുത്തരഭാവസ്സ തസ്സ ലോകുത്തരതാ, ഏവം സോതാദീനം ആപന്നാതി കിന്തി താനിപി ലോകുത്തരാനീതി അത്ഥോ ദട്ഠബ്ബോ.

യദി ലോകുത്തരേ പടിഹഞ്ഞേയ്യ, ലോകുത്തരോ സിയാതി അത്ഥോ ന ഗഹേതബ്ബോ. ന ഹി ലോകുത്തരേ പടിഹഞ്ഞതീതി പരികപ്പിതേപി സദ്ദസ്സ ലോകുത്തരഭാവോ അത്ഥീതി അധിപ്പായോ. ‘‘ലോകിയേന ഞാണേനാ’’തി ഉദ്ധടം, ‘‘വിഞ്ഞാണേനാ’’തി പന പാളി, തഞ്ച വിഞ്ഞാണം സോതസമ്ബന്ധേന സോതവിഞ്ഞാണന്തി വിഞ്ഞായതീതി. അനേകന്തതാതി ലോകിയേന ഞാണേന ജാനിതബ്ബതോ ലോകിയോതി ഏതസ്സ ഹേതുസ്സ ലോകിയേ ലോകുത്തരേ ച സമ്ഭവതോ അനേകന്തഭാവോ സിയാതി അധിപ്പായോ.

വോഹാരകഥാവണ്ണനാ നിട്ഠിതാ.