൧൧. ദക്ഖിണാവിസുദ്ധികഥാവണ്ണനാ

൮൦൦-൮൦൧. ദക്ഖിണാവിസുദ്ധികഥായം വിസുജ്ഝേയ്യാതി ഏതസ്സ അത്ഥം ദസ്സേന്തോ ‘‘മഹപ്ഫലാ ഭവേയ്യാ’’തി ആഹ. ദായകസ്സേവ ചിത്തവിസുദ്ധി വിപാകദായികാ ഹോതീതി പടിഗ്ഗാഹകനിരപേക്ഖാ പടിഗ്ഗാഹകേന പച്ചയഭൂതേന വിനാ ദായകേനേവ മഹാവിപാകചേതനത്തം ആപാദികാ, പടിഗ്ഗാഹകനിരപേക്ഖാ വിപാകദായികാ ഹോതീതി അധിപ്പായോ. അഞ്ഞോ അഞ്ഞസ്സ കാരകോതി യദി ദായകസ്സ ദാനചേതനാ നാമ പടിഗ്ഗാഹകേന കതാ ഭവേയ്യ, യുത്തരൂപം സിയാതി കസ്മാ വുത്തം, നനു ലദ്ധികിത്തനേ ‘‘ദായകേന ദാനം ദിന്നം, പടിഗ്ഗാഹകേന വിപാകോ നിബ്ബത്തിതോതി അഞ്ഞോ അഞ്ഞസ്സ കാരകോ ഭവേയ്യാ’’തി വുത്തന്തി? സച്ചമേതം, പടിഗ്ഗാഹകേന വിപാകനിബ്ബത്തനമ്പി പന ദാനചേതനാനിബ്ബത്തനേന യദി ഭവേയ്യ, ഏവം സതി അഞ്ഞോ അഞ്ഞസ്സ കാരകോതി യുത്തരൂപം സിയാതി അധിപ്പായോ.

ദക്ഖിണാവിസുദ്ധികഥാവണ്ണനാ നിട്ഠിതാ.

സത്തരസമവഗ്ഗവണ്ണനാ നിട്ഠിതാ.