൨. നത്ഥിഅരഹതോഅകാലമച്ചൂതികഥാവണ്ണനാ

൭൮൦. അയോനിസോ ഗഹേത്വാതി അലദ്ധവിപാകവാരാനമ്പി കമ്മാനം ബ്യന്തീഭാവം ന വദാമീതി അത്ഥം ഗഹേത്വാതി അധിപ്പായോ. കേചി പന ‘‘കമ്മാനം വിപാകം അപ്പടിസംവിദിത്വാ പുഗ്ഗലസ്സ ബ്യന്തീഭാവം ന വദാമീതി ഏവം അയോനിസോ അത്ഥം ഗഹേത്വാ’’തി വദന്തി.

൭൮൧. താവ ന കമതീതി ലദ്ധിയാ പടിക്ഖിപതീതി താവ ന കമതി, തതോ പരം കമതീതി ലദ്ധിയാ പടിക്ഖിപതീതി അധിപ്പായോ. ഏത്ഥ കിര ‘‘സതി ജീവിതേ ജീവിതാവസേസേ ജീവിതാ വോരോപേതീ’’തി വചനതോ അത്തനോ ധമ്മതായ മരന്തം കോട്ടേന്തസ്സ വാ സീസം വാ ഛിന്ദന്തസ്സ നത്ഥി പാണാതിപാതോതി ആചരിയാ വദന്തി. പാണോ പാണസഞ്ഞിതാ വധകചിത്തഉപക്കമമരണേസു വിജ്ജമാനേസുപി ന തേന ഉപക്കമേന മതോതി നത്ഥി പാണാതിപാതോതി അധിപ്പായോ. ഏവം പന മരന്തേന തേന ഏകചിത്തവാരമ്പി ധമ്മതാമരണതോ ഓരതോ ന മതോതി ദുബ്ബിഞ്ഞേയ്യമേതം.

നത്ഥിഅരഹതോഅകാലമച്ചൂതികഥാവണ്ണനാ നിട്ഠിതാ.