൪. നിയതസ്സനിയാമകഥാവണ്ണനാ

൬൬൩-൬൬൪. സേസാ തേഭൂമകധമ്മാ അനിയതാ നാമാതി ഏത്ഥ അപ്പത്തനിയാമാനം ധമ്മേ സന്ധായ ‘‘തേഭൂമകധമ്മാ’’തി ആഹ. ഏതേവ ഹി സന്ധായ ‘‘തേഹി സമന്നാഗതോപി അനിയതോയേവാ’’തി വുത്തന്തി. ഇതി ഇമം വോഹാരമത്തം ഗഹേത്വാ ‘‘നിയതോ ബോധിസത്തോ പച്ഛിമഭവികോ ഭബ്ബോ ധമ്മം അഭിസമേതും ഓക്കമിതു’’ന്തി അധിപ്പായേന ‘‘നിയാമം ഓക്കമതീ’’തി യേസം ലദ്ധീതി അത്ഥയോജനാ. ഏവം പന വോഹാരമത്തസബ്ഭാവോ ‘‘നിയതോ’’തി വചനസ്സ, ധമ്മം അഭിസമേതും ഭബ്ബതാ ച ‘‘നിയാമം ഓക്കമതീ’’തി വചനസ്സ കാരണഭാവേന വുത്താ ഹോതി, ഭബ്ബതായേവ പന ഉഭയസ്സപി കാരണന്തി യുത്തം. അഞ്ഞേനാതി യദി നിയതോ നിയാമം ഓക്കമേയ്യ, മിച്ഛത്തനിയതോ സമ്മത്തനിയാമം, സമ്മത്തനിയതോ വാ മിച്ഛത്തനിയാമം ഓക്കമേയ്യ, ന ച തം അത്ഥീതി ദസ്സനത്ഥന്തി അത്ഥോ.

നിയതസ്സനിയാമകഥാവണ്ണനാ നിട്ഠിതാ.