൯. ധമ്മട്ഠിതതാകഥാവണ്ണനാ

൬൨൭. അനന്തരപച്ചയതഞ്ചേവാതി അവിജ്ജാ സങ്ഖാരാനം അനന്തരപച്ചയോ അവിജ്ജായ യാ ഠിതതാ തതോ ഹോതി, തായ ഠിതതായ അനന്തരപച്ചയഭാവസങ്ഖാതാ ഠിതതാ ഹോതീതി അധിപ്പായോ. അനന്തരപച്ചയഗ്ഗഹണഞ്ചേത്ഥ അഞ്ഞമഞ്ഞപച്ചയഭാവരഹിതസ്സ ഏകസ്സ പച്ചയസ്സ ദസ്സനത്ഥന്തി ദട്ഠബ്ബം. തേന ഹി സബ്ബോ താദിസോ പച്ചയോ ദസ്സിതോ ഹോതീതി. അഞ്ഞമഞ്ഞപച്ചയതഞ്ചാതി അവിജ്ജാ സങ്ഖാരാനം പച്ചയോ, സങ്ഖാരാ ച അവിജ്ജായ. തത്ഥ അവിജ്ജായ സങ്ഖാരാനം പച്ചയഭാവസങ്ഖാതായ ഠിതതായ സങ്ഖാരാനം അവിജ്ജായ പച്ചയഭാവസങ്ഖാതാ ഠിതതാ ഹോതി, തസ്സാ ച ഇതരാതി അധിപ്പായോ.

ധമ്മട്ഠിതതാകഥാവണ്ണനാ നിട്ഠിതാ.