൧൪. ചുദ്ദസമനയോ വിപ്പയുത്തേനസങ്ഗഹിതാസങ്ഗഹിതപദവണ്ണനാ

൪൫൬. ചുദ്ദസമനയേ ധമ്മായതനാദീനം അനാരമ്മണമിസ്സകസബ്ബചിത്തുപ്പാദഗതധമ്മഭാവതോ വിപ്പയോഗസ്സ അരുഹണം ദട്ഠബ്ബം. ജാതിആദിത്തയസ്സ ചേത്ഥ ധമ്മസഭാവമത്തത്താ ന കഥഞ്ചി സമ്പയോഗോ വിപ്പയോഗോ ച രുഹതി അജ്ഝത്തബഹിദ്ധധമ്മാനം സബ്ബധമ്മസമോധാനത്താ, അനിദസ്സനഅപ്പടിഘാദീനം അനാരമ്മണമിസ്സകസബ്ബചിത്തുപ്പാദത്താ. ദുക്ഖസച്ചാദിധമ്മാവ ഇധ തേഹി വിപ്പയുത്താനം സങ്ഗഹാസങ്ഗഹസബ്ഭാവാ ഗഹിതാതി.

പാളിഉദ്ദാനഗാഥായം സമുച്ഛേദേ ന ലബ്ഭന്തീതി പരിയോസാനേ നയേ ന ലബ്ഭന്തീതി അത്ഥോ. മോഘപുച്ഛകേന ചാതി അലബ്ഭമാനാ ച തേ മോഘപുച്ഛകേന ഹേതുനാ ന ലബ്ഭന്തി തേസം പുച്ഛായ മോഘത്താതി വുത്തം ഹോതി. അഥ വാ മോഘപുച്ഛകോ അട്ഠമോ നയോ, തേന ച സഹ ഓസാനനയേ ഏതേ ധമ്മാ വിപ്പയോഗസ്സപി അഭാവാ സബ്ബഥാപി ന ലബ്ഭന്തീതി അത്ഥോ.

ചുദ്ദസമനയവിപ്പയുത്തേനസങ്ഗഹിതാസങ്ഗഹിതപദവണ്ണനാ നിട്ഠിതാ.

ധാതുകഥാപകരണ-മൂലടീകാ സമത്താ.