൬-൧൧. ദുതിയമിത്തസുത്താദിവണ്ണനാ

൩൭-൪൨. ഛട്ഠേ പിയോ ച ഹോതി മനാപോ ചാതി കല്യാണമിത്തലക്ഖണം ദസ്സിതം. കല്യാണമിത്തോ ഹി സദ്ധാസമ്പന്നോ ച ഹോതി സീലസമ്പന്നോ സുതസമ്പന്നോ ചാഗസമ്പന്നോ വീരിയസമ്പന്നോ സതിസമ്പന്നോ സമാധിസമ്പന്നോ പഞ്ഞാസമ്പന്നോ. തത്ഥ സദ്ധാസമ്പത്തിയാ സദ്ദഹതി തഥാഗതസ്സ സമ്ബോധിം കമ്മഞ്ച കമ്മഫലഞ്ച, തേന സമ്ബോധിയാ ഹേതുഭൂതം സത്തേസു ഹിതസുഖം ന പരിച്ചജതി. സീലസമ്പത്തിയാ സത്താനം പിയോ ഹോതി ഗരു ഭാവനീയോ ചോദകോ പാപഗരഹീ വത്താ വചനക്ഖമോ. സുതസമ്പത്തിയാ സച്ചപടിച്ചസമുപ്പാദാദിപടിസംയുത്താനം ഗമ്ഭീരാനം കഥാനം കത്താ ഹോതി. ചാഗസമ്പത്തിയാ അപ്പിച്ഛോ ഹോതി സന്തുട്ഠോ പവിവിത്തോ അസംസട്ഠോ. വീരിയസമ്പത്തിയാ ആരദ്ധവീരിയോ ഹോതി അത്തഹിതപരഹിതപടിപത്തിയം. സതിസമ്പത്തിയാ ഉപട്ഠിതസ്സതീ ഹോതി. സമാധിസമ്പത്തിയാ അവിക്ഖിത്തോ ഹോതി സമാഹിതചിതോ. പഞ്ഞാസമ്പത്തിയാ അവിപരീതം പജാനാതി. സോ സതിയാ കുസലാകുസലാനം ധമ്മാനം ഗതിയോ സമന്നേസമാനോ പഞ്ഞായ സത്താനം ഹിതാഹിതം യഥാഭൂതം ജാനിത്വാ സമാധിനാ തത്ഥ ഏകഗ്ഗചിത്തോ ഹുത്വാ വീരിയേന സത്തേ അഹിതേ നിസേധേത്വാ ഹിതേ നിയോജേതി. തേന വുത്തം ‘‘പിയോ…പേ… നിയോജേതീ’’തി. സത്തമാദീനി ഉത്താനത്ഥാനി.

ദുതിയമിത്തസുത്താദിവണ്ണനാ നിട്ഠിതാ.

ദേവതാവഗ്ഗവണ്ണനാ നിട്ഠിതാ.