൧൦. നിദ്ദസവത്ഥുസുത്തവണ്ണനാ

൨൦. ദസമേ നിദ്ദസവത്ഥൂനീതി ആദിസദ്ദലോപേനായം നിദ്ദേസോതി ആഹ ‘‘നിദ്ദസാദിവത്ഥൂനീ’’തി. നത്ഥി ഇദാനി ഇമസ്സ ദസാതി നിദ്ദസോ. പഞ്ഹോതി ഞാതും ഇച്ഛിതോ അത്ഥോ. പുന ദസവസ്സോ ന ഹോതീതി തേസം മതിമത്തമേതന്തി ദസ്സേതും ‘‘സോ കിരാ’’തി കിരസദ്ദഗ്ഗഹണം. നിദ്ദസോതി ചേതം വചനമത്തം. തസ്സ നിബ്ബീസാദിഭാവസ്സ വിയ നിന്നവാദിഭാവസ്സ ച ഇച്ഛിതത്താതി ദസ്സേതും ‘‘ന കേവലഞ്ചാ’’തിആദി വുത്തം. ഗാമേ വിചരന്തോതി ഗാമേ പിണ്ഡായ ചരന്തോ. ന ഇദം തിത്ഥിയാനം അധിവചനം തേസു തന്നിമിത്തസ്സ അഭാവാ, സാസനേപി സേഖസ്സപി ന ഇദം അധിവചനം, കിമങ്ഗം പന പുഥുജ്ജനസ്സ. യസ്സ പനേതം അധിവചനം യേന ച കാരണേന, തം ദസ്സേതും ‘‘ഖീണാസവസ്സേത’’ന്തിആദി വുത്തം. അപ്പടിസന്ധികഭാവോ ഹിസ്സ പച്ചക്ഖതോ കാരണം. പരമ്പരായ ഇതരാനി യാനി പാളിയം ആഗതാനിം.

സിക്ഖായ സമ്മദേവ ആദാനം സിക്ഖാസമാദാനം. തം പനസ്സാ പാരിപൂരിയാ വേദിതബ്ബന്തി ആഹ ‘‘സിക്ഖാത്തയപൂരണേ’’തി. സിക്ഖായ വാ സമ്മദേവ ആദിതോ പട്ഠായ രക്ഖണം സിക്ഖാസമാദാനം. തഞ്ച അത്ഥതോ പൂരണേന പരിച്ഛിന്നം അരക്ഖണേ സബ്ബേന സബ്ബം അഭാവതോ, രക്ഖണേ ച പരിപൂരണതോ. ബലവച്ഛന്ദോതി ദള്ഹച്ഛന്ദോ. ആയതിന്തി അനന്തരാനാഗതദിവസാദികാലോ അധിപ്പേതോ, ന അനാഗതഭവോതി ആഹ ‘‘അനാഗതേ പുനദിവസാദീസുപീ’’തി. സിക്ഖം പരിപൂരേന്തസ്സ തത്ഥ നിബദ്ധഭത്തിതാ അവിഗതപേമതാ. തേഭൂമകധമ്മാനം അനിച്ചാദിവസേന സമ്മദേവ നിജ്ഝാനം ധമ്മനിസാമനാതി ആഹ ‘‘വിപസ്സനായേതം അധിവചന’’ന്തി. തണ്ഹാവിനയേതി ഭങ്ഗാനുപസ്സനാഞാണാനുഭാവസിദ്ധേ തണ്ഹാവിക്ഖമ്ഭനേ. ഏകീഭാവേതി ഗണസങ്ഗണികാകിലേസസങ്ഗണികാവിഗമസിദ്ധേ വിവേകവാസേ. വീരിയാരമ്ഭേതി സമ്മപ്പധാനസ്സ പഗ്ഗണ്ഹനേ. തം പന സബ്ബസോ വീരിയസ്സ പരിബ്രൂഹനം ഹോതീതി ആഹ ‘‘കായികചേതസികസ്സ വീരിയസ്സ പൂരണേ’’തി. സതിയഞ്ചേവ നിപകഭാവേ ചാതി സതോകാരിതായ ചേവ സമ്പജാനകാരിതായ ച. സതിസമ്പജഞ്ഞബലേനേവ ഹി വീരിയാരമ്ഭോ ഇജ്ഝതി. ദിട്ഠിപടിവേധേതി മഗ്ഗസമ്മാദിട്ഠിയാ പടിവിജ്ഝനേ. തേനാഹ ‘‘മഗ്ഗദസ്സനേ’’തി.

നിദ്ദസവത്ഥുസുത്തവണ്ണനാ നിട്ഠിതാ.

അനുസയവഗ്ഗവണ്ണനാ നിട്ഠിതാ.