൮. സദ്ധസുത്തവണ്ണനാ

൩൮. അട്ഠമേ അനുകമ്പന്തീതി ‘‘സബ്ബേ സത്താ സുഖീ ഹോന്തു അവേരാ അബ്യാപജ്ജാ’’തി ഏവം ഹിതഫരണേന അനുഗ്ഗണ്ഹന്തി. അപിച ഉപട്ഠാകാനം ഗേഹം അഞ്ഞേ സീലവന്തേ സബ്രഹ്മചാരിനോ ഗഹേത്വാ പവിസന്താപി അനുഗ്ഗണ്ഹന്തി നാമ. നീചവുത്തിന്തി പണിപാതസീലം. കോധമാനഥദ്ധതായ രഹിതന്തി കോധമാനവസേന ഉപ്പന്നോ യോ ഥദ്ധഭാവോ ചിത്തസ്സ ഉദ്ധുമാതലക്ഖണോ, തേന വിരഹിതന്തി അത്ഥോ. സോരച്ചേനാതി ‘‘തത്ഥ കതമം സോരച്ചം? യോ കായികോ അവീതിക്കമോ, വാചസികോ അവീതിക്കമോ, കായികവാചസികോ അവീതിക്കമോ, ഇദം വുച്ചതി സോരച്ചം. സബ്ബോപി സീലസംവരോ സോരച്ച’’ന്തി ഏവമാഗതേന സീലസംവരസങ്ഖാതേന സോരതഭാവേന. സഖിലന്തി ‘‘തത്ഥ കതമം സാഖല്യം? യാ സാ വാചാ ഥദ്ധകാ കക്കസാ ഫരുസാ കടുകാ അഭിസജ്ജനീ കോധസാമന്താ അസമാധിസംവത്തനികാ, തഥാരൂപിം വാചം പഹായ യാ സാ വാചാ നേലാ കണ്ണസുഖാ പേമനീയാ ഹദയങ്ഗമാ പോരീ ബഹുജനകന്താ ബഹുജനമനാപാ, തഥാരൂപിം വാചം ഭാസിതാ ഹോതി. യാ തത്ഥ സണ്ഹവാചതാ സഖിലവാചതാ അഫരുസവാചതാ, ഇദം വുച്ചതി സാഖല്യ’’ന്തി (ധ. സ. ൧൩൫൦) ഏവം വുത്തേന സമ്മോദകമുദുഭാവേന സമന്നാഗതം. തേനാഹ ‘‘സഖിലന്തി സമ്മോദക’’ന്തി.

സദ്ധസുത്തവണ്ണനാ നിട്ഠിതാ.