൩-൪. ഉപക്കിലേസസുത്താദിവണ്ണനാ

൨൩-൨൪. തതിയേ ന ച പഭാവന്തന്തി ന ച പഭാസമ്പന്നം. പഭിജ്ജനസഭാവന്തി താപേത്വാ താളകജ്ജനപഭങ്ഗുരം. അവസേസം ലോഹന്തി വുത്താവസേസം സജാതിലോഹം, വിജാതിലോഹം, പിസാചലോഹം, കിത്തിമലോഹന്തി ഏവംപഭേദം സബ്ബമ്പി ലോഹം. ഉപ്പജ്ജിതും അപ്പദാനേനാതി ഏത്ഥ നനു ലോകിയകുസലചിത്തസ്സപി സുവിസുദ്ധസ്സപി ഉപ്പജ്ജിതും അപ്പദാനേനേവ ഉപക്കിലേസതാതി? സച്ചമേതം, യസ്മിം പന സന്താനേ നീവരണാനി ലദ്ധപ്പതിട്ഠാനി, തത്ഥ മഹഗ്ഗതകുസലസ്സപി അസമ്ഭവോ, പഗേവ ലോകുത്തരകുസലസ്സ. പരിത്തകുസലം പന യഥാപച്ചയം ഉപ്പജ്ജമാനം നീവരണേഹി ഉപഹതേ സന്താനേ ഉപ്പത്തിയാ അപരിസുദ്ധം ഹോന്തം ഉപക്കിലിട്ഠം നാമ ഹോതി അപരിസുദ്ധദീപകപല്ലികവട്ടിതേലാദിസന്നിസ്സയോ പദീപോ വിയ. അപിച നിപ്പരിയായതോ ഉപ്പജ്ജിതും അപ്പദാനേനേവ തേസം ഉപക്കിലേസതാതി ദസ്സേന്തോ ‘‘യദഗ്ഗേന ഹീ’’തിആദിമാഹ. ആരമ്മണേ വിക്ഖിത്തപ്പവത്തിവസേന ചുണ്ണവിചുണ്ണതാ വേദിതബ്ബാ. ചതുത്ഥേ നത്ഥി വത്തബ്ബം.

ഉപക്കിലേസസുത്താദിവണ്ണനാ നിട്ഠിതാ.