(൨൨) ൨. അക്കോസകവഗ്ഗോ

൧-൨. അക്കോസകസുത്താദിവണ്ണനാ

൨൧൧-൨. ദുതിയസ്സ പഠമേ ദസഹി അക്കോസവത്ഥൂഹി അക്കോസകോതി ‘‘ബാലോസി, മൂള്ഹോസി, ഓട്ഠോസി, ഗോണോസി, ഗദ്രഭോസീ’’തിആദിനാ ദസഹി അക്കോസവത്ഥൂഹി അക്കോസകോ. ‘‘ഹോതു, മുണ്ഡകസമണ, അദണ്ഡോ അഹന്തി കരോസി, ഇദാനി തേ രാജകുലം ഗന്ത്വാ ദണ്ഡം ആരോപേസ്സാമീ’’തിആദീനി വദന്തോ പരിഭാസകോ നാമാതി ആഹ ‘‘ഭയദസ്സനേന പരിഭാസകോ’’തി. ലോകുത്തരധമ്മാ അപായമഗ്ഗസ്സ പരിപന്ഥഭാവതോ പരിപന്ഥോ നാമാതി ആഹ ‘‘ലോകുത്തരപരിപന്ഥസ്സ ഛിന്നത്താ’’തി, ലോകുത്തരസങ്ഖാതസ്സ അപായമഗ്ഗപരിപന്ഥസ്സ ഛിന്നത്താതി അത്ഥോ. ദുതിയേ നത്ഥി വത്തബ്ബം.

അക്കോസകസുത്താദിവണ്ണനാ നിട്ഠിതാ.

൩-൧൦. സീലസുത്താദിവണ്ണനാ

൨൧൩-൨൨൦. തതിയേ (ദീ. നി. ടീ. ൨.൧൪൯) ദുസ്സീലോതി ഏത്ഥ ദു-സദ്ദോ അഭാവത്ഥോ ‘‘ദുപ്പഞ്ഞോ’’തിആദീസു (മ. നി. ൧.൪൪൯) വിയ, ന ഗരഹണത്ഥോതി ആഹ ‘‘അസീലോ നിസ്സീലോ’’തി. ഭിന്നസംവരോതി ഏത്ഥ സമാദിന്നസീലോ കേനചി കാരണേന സീലഭേദം പത്തോ, സോ താവ ഭിന്നസംവരോ ഹോതു. യോ പന സബ്ബേന സബ്ബം അസമാദിന്നസീലോ ആചാരഹീനോ, സോ കഥം ഭിന്നസംവരോ നാമ ഹോതീതി? സോപി സാധുസമാചാരസ്സ പരിഹരണീയസ്സ ഭേദിതത്താ ഭിന്നസംവരോ ഏവ നാമ. വിനട്ഠസംവരോ സംവരരഹിതോതി ഹി വുത്തം ഹോതി. തം തം സിപ്പട്ഠാനം. മാഘാതകാലേതി ‘‘മാ ഘാതേഥ പാണീന’’ന്തി ഏവം മാഘാതഘോസനം ഘോസിതദിവസേ. അബ്ഭുഗ്ഗച്ഛതി പാപകോ കിത്തിസദ്ദോ. അജ്ഝാസയേന മങ്കു ഹോതിയേവ വിപ്പടിസാരിഭാവതോ.

തസ്സാതി ദുസ്സീലസ്സ. സമാദായ വത്തിതട്ഠാനന്തി ഉട്ഠായ സമുട്ഠായ കതകാരണം. ആപാഥം ആഗച്ഛതീതി തം മനസോ ഉപട്ഠാതി. ഉമ്മീലേത്വാ ഇധലോകന്തി ഉമ്മീലനകാലേ അത്തനോ പുത്തദാരാദിവസേന ഇധലോകം പസ്സതി. നിമീലേത്വാ പരലോകന്തി നിമീലനകാലേ ഗതിനിമിത്തുപട്ഠാനവസേന പരലോകം പസ്സതി. തേനാഹ ‘‘ചത്താരോ അപായാ’’തിആദി. പഞ്ചമപദന്തി ‘‘കായസ്സ ഭേദാ’’തിആദിനാ വുത്തോ പഞ്ചമോ ആദീനവകോട്ഠാസോ. വുത്തവിപരിയായേനാതി വുത്തത്ഥായ ആദീനവകഥായ വിപരിയായേന ‘‘അപ്പമത്തോ തം തം കസിവണിജ്ജാദിം യഥാകാലം സമ്പാദേതും സക്കോതീ’’തിആദിനാ. പാസംസം സീലമസ്സ അത്ഥീതി സീലവാ. സീലസമ്പന്നോതി സീലേന സമന്നാഗതോ സമ്പന്നസീലോതി ഏവമാദികം പന അത്ഥവചനം സുകരന്തി അനാമട്ഠം. ചതുത്ഥാദീനി ഉത്താനത്ഥാനേവ.

സീലസുത്താദിവണ്ണനാ നിട്ഠിതാ.

അക്കോസകവഗ്ഗവണ്ണനാ നിട്ഠിതാ.