൧. ആരഞ്ഞികസുത്തവണ്ണനാ

൧൮൧. ചതുത്ഥസ്സ പഠമേ അപ്പീച്ഛതംയേവ നിസ്സായാതിആദീസു ‘‘ഇതി അപ്പിച്ഛോ ഭവിസ്സാമീ’’തി ഇദം മേ ആരഞ്ഞികങ്ഗം അപ്പിച്ഛതായ സംവത്തിസ്സതി, ‘‘ഇതി സന്തുട്ഠോ ഭവിസ്സാമീ’’തി ഇദം മേ ആരഞ്ഞികങ്ഗം സന്തുട്ഠിയാ സംവത്തിസ്സതി, ‘‘ഇതി കിലേസേ സല്ലിഖിസ്സാമീ’’തി ഇദം മേ ആരഞ്ഞികങ്ഗം കിലേസസല്ലിഖനത്ഥായ സംവത്തിസ്സതീതി ആരഞ്ഞികോ ഹോതി. അഗ്ഗോതി ജേട്ഠകോ. സേസാനി തസ്സേവ വേവചനാനി.

ഗവാ ഖീരന്തി ഗാവിതോ ഖീരം നാമ ഹോതി, ന ഗാവിയാ ദധി. ഖീരമ്ഹാ ദധീതിആദീസുപി ഏസേവ നയോ. ഏവമേവന്തി യഥാ ഏതേസു പഞ്ചസു ഗോരസേസു സപ്പിമണ്ഡോ അഗ്ഗോ, ഏവമേവം ഇമേസു പഞ്ചസു ആരഞ്ഞികേസു യോ അയം അപ്പിച്ഛതാദീനി നിസ്സായ ആരഞ്ഞികോ ഹോതി, അയം അഗ്ഗോ ചേവ സേട്ഠോ ച മോക്ഖോ ച പവരോ ച. ഇമേസു ആരഞ്ഞികേസു ജാതിആരഞ്ഞികാ വേദിതബ്ബാ, ന ആരഞ്ഞികനാമമത്തേന ആരഞ്ഞികാതി വേദിതബ്ബാ. പംസുകൂലികാദീസുപി ഏസേവ നയോ.

ആരഞ്ഞികസുത്തവണ്ണനാ നിട്ഠിതാ.

അരഞ്ഞവഗ്ഗവണ്ണനാ നിട്ഠിതാ.